GNU/Linux குறிப்பேடு

முதல் தமிழ் கணினிப் பணிச்சூழல் (First Tamil Computer Desktop Environment)

2009-08-27T14:17:00.006+05:30

இந்திய மொழிகளிலேயே முதன் முதலாக தமிழில் கணினிக்குப் பணிச்சூழல் வெளிவந்தது தமிழ் மொழியில் தான் என்பது இதைப் படிக்கும் பலருக்கும் தெரிந்திருக்கலாம்.

(இங்கே உள்ள படங்களின் மேல் சொடுக்கிப் பெரிதாக்கிப் பார்க்கலாம்)

GNU/Linux இற்கான KDE பணிச்சூழலே இவ்வாறு முதன் முறையாகத் தமிழ் இடைமுகப்பைக் கொண்டு வெளி வந்தது.

October 22 ம் நாள் 2000ம் ஆண்டு வெளிவந்த KDE 2.0 பதிப்பு இவ்வாறு தமிழ் இடைமுகப்பினை முதன்முறையாக உள்ளடக்கியிருந்தது.

பரவலாக தமிழ்ச்சூழலில் GNU/Linux பயன்பாடு வந்துவிட்டது. சொற்பமாயினும் சிலபேர் தமிழாக்க முயற்சிகளில் பங்கெடுக்கிறார்கள். இலங்கையில் மொரட்டுவைப் பல்கலைக்கழகத்தை மையப்படுத்தி சர்வேஸ் போன்றவர்கள் பங்குபெறும் தமிழாக்க வேலைகள் நடைபெறுகின்றன. தமிழகத்தில் தமிழ் உபுண்டு குழும அங்கத்தவர்கள் பலர் தமிழாக்கத்தில் ஈடுபடுகின்றனர். இதெல்லாம் எமது தலைமுறையினர்.

முன்னர் தமிழாக்கத்தில் ஈடுபட்டிருந்த தலைமுறையினரும் தொடர்ச்சியாகப் பங்களித்து வருகின்றனர்.

இந்த முதல் தமிழ் KDE வந்த காலம் அவ்வாறானதல்ல. தொழிநுட்ப ரீதியாக, ஆளணி வள ரீதியாக மிகப்பெரிய சவால்களுக்கு முகம் கொடுத்தே தமிழாக்க வேலைகளைச் செய்ய வேண்டி இருந்திருக்கும்.

இந்த வேலைகளைப் பொறுப்பெடுத்து சீராகச் செய்திருந்தவர்கள் Siva, Gomathi, Dinesh, Venkat, Vasee எனும் பெயர்களுடையவர்கள் என்று நான் தேடிய மூலங்களில் காணக்கிடைக்கினறன.

tamillinix yahoo group ஒரு பெரும் கடல் அங்கே மூழ்கினால் தமிழ் க்னூ லினக்ஸ் வரலாற்றின் முத்துக்களை நிறையப் பெற்றுக்கொள்ளலாம்.

இதில் வசீகரன் குழுவினர் பின்னர் இந்த தமிழ் இடைமுகப்புக்கொண்ட KDE இனை உள்ளடக்கி தமிழ் Knoppix நிகழ் வட்டினை உருவாக்கி வெளியிட்டிருந்தனர். அதுபற்றி பின்னரொருபோது விளக்கமாக எழுதுகிறேன்.

இந்த அருமையான தமிழ் இடைமுகப்பு வந்து பல ஆண்டுகளுக்குப்பிறகுதான் Microsoft எனும் பெரு வணிக நிறுவனத்தின் தமிழ் இடைமுகப்புப் பொதி வெளியிடப்பட்டது (அதுவும் சமூக உழைப்பைத் திருடி).

இலாப நோக்கற்ற சமூக அக்கறையும், மொழி மீதான நேசமும் கூட்டுழைப்பும் கணிமை உலகில் செய்திருக்கும் வியத்தகு சாதனைகளுக்கு தமிழ்ச்சூழலில் இது ஒரு நல்ல எடுத்துக்காட்டு.

இடைமுகப்பானது UTF-8 TSCII குறிமுறையில் அமைந்துள்ளது. இப்பொழுதுபோல் அக்காலத்தில் ஒருங்குறி ஆதரவு பரவலாக இருக்கவில்லை. கூடவே ஒருங்குறி தொடர்பான விவாதங்கள் பெருமளவில் ஓயாமலிருந்தது.

இங்கே KOffice இல் தமிழைக் காண்கிறோம் அக்காலத்தில் இருந்த சொற்ப அலுவலகச்செயலிகளுள் ஒன்று. இது இப்போது மிக சீர்படுத்தப்பட்ட நிலையில் இருக்கிறது. TSCII இலிருந்து ஒருங்குறிக்கு மாறியபோது தமிழர்கள் Koffice இனைக் கைவிட்டார்கள். நீண்டகாலத்துக்குப்பிறகே ஒருங்குறி ஆதரவு அதில் கிடைத்தது. இப்போது எல்லோரும் Openoffice பற்றி பேச ஆரம்பித்துவிட்டோம்.

மயிலை98 இனை அடிப்படையாகக்கொண்ட TSCII விசைப்பலகை உள்ளீட்டு முறை ஒன்று அமைக்கப்பட்டிருந்தது. இது தவிர தமிழ் VP என்றெல்லாம் உள்ளீட்டு முறைகள் இருந்தன. இந்த உள்ளீட்டு முறைகளின் வரலாறு குறித்து பின்னர் விரிவாக ஆய்வு செய்து எழுத வேண்டும்.

இது முனையத்தில் தமிழைக் கொண்டுவர அக்காலத்தில் எடுக்கப்பட்ட முயற்சி. தமிழ் முனையம் ஒன்றை சாத்தியப்படுத்தலாம் என்ற நம்பிக்கைகளின் தொடக்கம். இப்போது ஒருங்குறி வந்தபின் இதைவிட மோசமான நிலையில் தான் தமிழ் முனையப் பயன்பாடு இருக்கிறது. ஒரேயகல எழுத்துக்கள் என்ற பிரச்சினை தாண்டப்படமுடியாத சிக்கல். இப்போது ஏறத்தாழ தமிழ் முனையம் தொடர்பான முயற்சிகள் கைவிடப்பட்ட நிலைக்கு வந்துவிட்டது. வரைகலைப் பயனர் இடைமுகம் எல்லாவற்றையும் செய்யத்தொடங்கிவிட்டது.

UTF8-TSCII codec இனை Hans Peter Bieker என்பவர் உருவாக்கியளித்துள்ளார்.

இங்கே நான் சொல்லத்தவறிய தகவல்களையும் தவறுகளையும் போதாமைகளையும் அறிந்தவர்கள் பினூட்டம் வழியாக திருத்தி நிரப்பி விடுங்கள்.

இப்பதிவுக்கு ஆதாரமாக அமைந்தவை:

தமிழ்ழிலின்ஸ் yahoo குழும மடற்களஞ்சியம் http://tech.groups.yahoo.com/group/tamilinix/
http://tamillinux.sourceforge.net/
எனது சொந்த அனுபவங்கள்

கட்டற்ற மென்பொருள் கருத்தரங்கு - திருக்கோணமலை

2009-04-16T12:24:00.005+05:30

கடந்த மார்ச் மாதம் 28ம் நாள் திருக்கோணமலை லியோ கழகத்தினதும் (Leo club of Trinco new city) MIC Computers நிறுவனத்தினதும் அனுசரணையில் கோணேஸ்வரா இந்துக்கல்லூரியின் சம்பந்தர் மண்டபத்தில் கட்டற்ற மென்பொருள் தொடர்பான அறிமுகக் கருத்தரங்கு நடைபெற்றது.

நிகழ்ச்சியின் உள்ளடக்கங்களை இங்கே பார்க்கவும்.

நூற்றுக்கும் மேற்பட்டவர்கள் இக்கருந்தரங்கில் கலந்துகொண்டதும் இறுதிவரை ஆர்வத்துடன் பங்கெடுத்ததும் மகிழ்ச்சி தருவதாய் அமைந்தது.

இவ்வெற்றியில் பெரும்பங்கெடுத்த நிகழ்ச்சி ஏற்பாட்டாளர்கள், குறிப்பாக ஜெகந்த் நன்றிக்குரியவர்.

கருத்தரங்கின் முன்பாதியில் பெரும்பாலும் கட்டற்ற மென்பொருள் இயக்கம் தொடர்பான சித்தாந்த ரீதியான அறிமுகங்களும் விளக்கங்களுமே இடம்பெற்றன.
கவனம் சிதறாமல் இவ்விஷயங்களைக்கேட்டுக்கொண்டிருந்து கேள்வி நேரத்தில் தத்துவம் சார்ந்த பல கேள்விகளையும் கேட்கத்தொடங்கினார்கள்.

திருக்கோணமலையில் இடம் பெறும் கட்டற்ற மென்பொருள் தொடர்பான முதல் கருத்தரங்கு இதுவேயாகும். கலந்துகொண்ட பலர் லினக்ஸ் என்ற சொல்லையே அன்றுதான் முதன் முறையாகக் கேள்விப்படுபவர்களாகவும் இருந்தனர்.

அப்படி இருந்தும் ஒவ்வொரு கேள்வி நேர இடைவெளிகளின் போதும் அடுக்கடுக்காக கேள்விகளைக் கேட்டதுடன், க்னூ/லினக்சினைத் தங்கள் சொந்தப்பாவனைக்குப் பயன்படுத்துவது தொடர்பான மிகுதியான ஆர்வத்தையும் வெளியிட்டனர்.

இக்கருத்தரங்கில் வழங்கப்படுவதற்கென "உபுண்டு க்னூ/லினக்ஸ் திருக்கோணமலைப் பதிப்பு" என்ற பெயரில் தனியான வழங்கல் ஒன்று வடிவமைக்கப்பட்டது.

இவ்வழங்கல் தொடர்பான மேலதிக விபரங்கள் இந்த வலைப்பதிவில் காணலாம்.

கருத்தரங்கின் இரண்டாம் பாதி இவ்வழங்கலை அடிப்படையாகக்கொண்ட செயன்முறை விளக்கங்களாகவே அமைந்திருந்தது.

பொதுவான மாற்று மென்பொருட்கள், தமிழ்ப்பயன்பாடு, நிறுவல் போன்றவை இவ்வழங்கலை அடிப்படையாக்கொண்டு விளக்கப்பட்டது.

இறுதிப்பகுதியில் முப்பரிமாண இடைமுகப்புடன் கூடிய compiz fusion இனை அறிமுகப்படுத்தி நிகழ்த்திக்காட்டியபோது அரங்கு நிறைந்த கைதட்டல் ஓசையும் ஆரவாரமும் எழுந்தது எதிர்பாராத இன்ப அதிர்ச்சி. :-)

வரைகலை வேலைகளுடன் தொழின்முறையாக தொடர்புகள் கொண்டுள்ள ஆர்வலர் ஒருவரை நான் க்னூ/லினக்சுக்கு முற்றாக மாற வேண்டாம் இரட்டை இயங்குதளங்களைப் பயன்படுத்துங்கள் என்று அறிவுறுத்தியபோது அவர் பெரும் ஏமாற்றமடைந்து சோர்ந்து போனது மறக்க முடியாத சம்பவம்.

தொழிநுட்ப ரீதியாக கவரப்பட்டதை விட, க்னூ/லினக்சினைப் பயன்படுத்த வேண்டும் என்ற ஆர்வத்தைக் கருத்தியல் ரீதியாகப் பெறவேண்டுமென்ற நோக்கத்தோடு வடிவமைக்கப்பட்டிருந்த நிகழ்ச்சி நிரல் வெற்றியளித்திருந்தமை, மூடிய மென்பொருட்களுக்கு எதிரான உணர்வை பல வழிகளிலும் ககலந்துகொண்டவர்கள் வெளிப்படுத்தியதிலிருந்து அறிந்துகொள்ளக்கூடியதாயிருந்தது.

இக்கருத்தரங்கின் வெற்றி அடுத்தடுத்து இப்பரப்பில் தொடர்ச்சியான கருத்தரங்குகளைப், பயிற்சிப்பட்டறைகளை நடத்துவதற்கான தளத்தையும் அமைத்துத்தந்துள்ளது.

திருக்கோணமலையை அடிப்படையாகக்கொண்டு க்னூ/லினக்ஸ் பயனர் குழுமம் ஒன்றினை தொடக்கி வைக்கக்கூடிய புறநிலைகளும் கனிந்து வந்துள்ளன.

கலந்துகொண்ட மாணவர்கள் அனைவருக்கு லியோ கழகத்தினரால் சான்றிதழ்கள் வழங்கப்பட்டன.

உபுண்டு க்னூ/லினக்ஸ் திருக்கோணமலைப்பதிப்பின் வட்டுக்களும், நான்குபக்கக் கையேடு ஒன்றும் கலந்துகொண்ட அனைவருக்கும் விநியோகிக்கப்பட்டன.

குறிப்பு:

[படங்களில் உள்ளபடி இடைவேளையில் தாகம் தீர்க்க பெப்சி வழங்கப்பட்டது. நான்குமணி நேரம் தொடர்ச்சியாக உரத்துப்பேசியபடி இருந்தேன். தாகம். வேறு தெரிவு இருக்கவில்லை. பெப்சி,கோக் அவற்றின் துணை உற்பத்திகள் உடலுக்கும் உலகுக்கும் தீங்கான பானங்கள் அவற்றைக் குடிப்பதை முடிந்தவரை தவிர்த்துக்கொள்ளுங்கள்]

GNU/Linux: "எழுதுபவர்களுக்கு" ஒரு மென்பொருள்

2009-04-05T01:54:00.002+05:30

நண்பரோடு தொலைபேசிக்கொண்டே Gnomefiles வலைத்தளத்தை மேய்ந்துகொண்டிருந்தபோது இந்த ஆர்வமூட்டும் மென்பொருள் கண்ணில் பட்டது.

இது "எழுதுபவர்களுக்கானது".

எழுதுங்கள்; எழுதுவதை மட்டுமே செய்யுங்கள் என்பதே இதன் அடிப்படைக் கோட்பாடு.

எழுதும் மனநிலையை சிதைக்கும் ஏராளம் விஷயங்கள் குறுக்கிட்டுக்கொண்டிருக்கும் கணித்திரை எழுத்துச் சூழலில் கணித்திரை எழுத்தாளர்களுக்கு மிகவும் உதவும் ஒரு மென்பொருள் இது.

Pyroom என்று பெயரிடப்பட்டுள்ள இது வழக்கமான உரைதிருத்திகளைப் (Text Editors) போன்றதுதான். ஆனால் என்ன, நீங்கள் எழுதத்தொடங்கிவிட்டால் வேறு எதையும் நீங்கள் பார்க்க வேண்டியதில்லை. எங்கேயும் கவனம் சிதற வேண்டியதில்லை. நீங்கள் எழுதுவதை மட்டுமே நீங்கள் கவனிக்க முடியும்.

எழுத்தாளர்களின் உளவியல் அறிந்து இதனை வடிவமைத்திருக்கிறார்கள்.

"எழுதுவதைத் தவிர உங்களுக்கு வேறு வழியில்லை" ;)

உங்கள் கணினியின் திரையை கருமை நிரப்பிவிட எழுதும் திடலை மட்டுமே நீங்கள் பார்க்க முடியும்.

திடலைச் சுற்றியிருக்கும் எல்லைக்கோட்டினைக்கூட நீங்கள் அகற்றி விடலாம்.

படத்தில் இருக்கும் கருப்பில் பச்சை நிற இடைமுகப்பு எனக்கு வசதியாக இருக்கிறது. வேண்டுமானால் நீங்கள் உங்களுக்கு வேண்டியபடி நிறங்களை அமைத்துக்கொள்ளலாம்.

இந்த வலைப்பதிவை இம்மென்பொருள் கொண்டே எழுதிக்கொண்டிருக்கிறேன். உண்மையிலேயே மிகவும் பயனுள்ளதாய்ப் படுகிறது

தமிழ் ஒருங்குறிக்கு ஆதரவுண்டு. ஒன்றுக்கு மேற்பட்ட ஆவணங்களை எழுதும் விதமாக Buffer அடிப்படையிலான வசதி உண்டு. தானாக குறிப்பிட்ட நேரத்துக்கொருமுறை ஆவணத்தைச் சேமித்துவிடுகிறது. வேகமாக விசைப்பலகை கொண்டே அனைத்து இயக்கங்களையும் கட்டுப்படுத்த முடியும்.

பொதுமக்கள் உரிமத்தில் அமைந்த கட்டற்ற மென்பொருள்தான் இது என்பதையும் சொல்லவேண்டுமா என்ன?

பத்திரிக்கை நிறுவனங்களில் தட்டெழுத்தாளர்கள் இவ்வாறான கருந்திரை முனையங்களைப் பயன்படுத்துவதை நான் பார்த்திருக்கிறேன்.

நம் வலைப்பதிவாளர்களுக்கு மிகவும் பயன்படும் மென்பொருள்.

பயன்படுத்திப் பார்த்துவிட்டுக் கருத்துச்சொல்லுங்கள்.

எழுதுங்கள், எழுதுங்கள்; எழுதும்போது எழுதுவதை மட்டுமே செய்யுங்கள் ;-)

திருக்கோணமலை நிகழ்வட்டு - Trincomalee GNU/Linux Live CD

2009-03-27T13:03:00.003+05:30

நாளை நடைபெறவுள்ள GNU/Linux கருத்தரங்கில் பங்குபற்றும் அனைவருக்கும் ubuntu 8.10 நிகழ்வட்டுக்கள் வழங்குவதென முன்னர் முடிவெடுக்கப்பட்டிருந்தது. GNU/Linux தொடர்பான அறிமுகம் திருக்கோணமலையில் முதன்முறையாக நாளைதான் இடம்பெறப்போகிறது என்பதாலும், அங்கே வருபவர்கள் பெரும்பாலும் க்னூ/லின்க்ஸ் பயன்படுத்தும் அடிப்படைகளையும் கூட அறிந்திருக்க வாய்ப்பற்றவர்கள் என்பதாலும் இணையப்பயன்பாடு மிகக்குறைவாகவே காணப்படுவதாலும் ubuntu 8.10 போதுமான அறிமுகத்தையும் பயன்பாட்டு எளிமையையும் வழங்காது என உணர்ந்தேன்.

ubuntu 8.10 இல் உள்ள பிரச்சினைகள்,

1. தமிழ் மொழி இடைமுகப்பு இணையம் மூலமே நிறுவப்படவேண்டியுள்ளது.

2. பயன்பாட்டிலுள்ள உள்ளீட்டு வடிவங்கள் இயல்பிருப்பாக இல்லை.

3. mp3, DVD போன்றவற்றை இயக்கத்தேவையான மென்பொருட்கள் இல்லை

4. க்னூ/லினக்சின் கவர்ச்சிகரமான மென்பொருட்கள் அதில் உள்ளடங்கி இல்லை.

இவற்றை களையுமுகமாக உபுண்டுவை அடிப்படையாகக்கொண்ட புதிய வழங்கல் ஒன்றினை உருவாக்க வேண்டியிருந்தது.

remastersys பயன்படுத்தி இப்புதிய வழங்கலை உருவாக்கினேன். ஏற்கனவே நூலகம் நிகழ்வட்டு உருவாக்கிக்கிடைத்த அனுபவங்கள் மிகவும் பயனளித்தது.

பெரிய பிரச்சினை இடப்பற்றாக்குறைதான். நெருக்கப்பட்ட iso படிமம் 700 மெகாபைட்டுக்கு குறைவாக இருந்தாக வேண்டும் (DVD வழங்க முடியாது. செலவு, DVD Drive பிரச்சினைகள்)

எனவே உபுண்டுவின் பின்வரும் முக்கிய பொதிகள் அகற்றப்படவேண்டியிருந்தது.

* Help Documents
* F-Spot
* Evolution
* GNOME Games

இவைதவிர வேறும் பல மென்பொருட்கள் அகற்றப்பட்டது.

கூடவே,

* Pidgin அகற்றப்பட்டு Kopete ஆக் பிரதியிடப்பட்டது. (webcam வசதிக்காக)

* மிக நீண்ட மனப்போராட்டத்துக்கும் சமரசங்களுக்கும் பின்னர் Ekiga அகற்றப்பட்டு Skype நிறுவப்பட்டது.

* இடப்பிரச்சினையாலும், நிகழ்வட்டில் வேகம் தேவைப்படுவதாலும் Openoffice Calc அகற்றப்பட்டு Gnumeric நிறுவப்பட்டது.

* Totem அகற்றப்பட்டு VLC நிறுவப்பட்டது. (இது அனைத்து கோப்பு வடிவங்களையும் பிரச்சினையின்றி இயக்க உதவும்)

புதிதாக தமிழ் பயன்பாட்டுக்குத்தேவையான பொதிகளும் தமிழ் இடைமுகப்புப்பொதியும் நிறுவப்பட்டது. இதில் தமிழ் இடைமுகப்பானது பயனர் தெரிவின் அடிப்படையில் செயற்படுமாறே அமைக்கப்பட்டது. தமிழ் இடைமுகப்பை விட ஆங்கில இடைமுகப்புடன் கருத்தரங்கில் வட்டுக்கள் வழங்கப்பட வேண்டிய சூழல் உண்டு. முற்றிலும் புதியதொன்றாக அல்லாமல் க்னூ/லினக்சினை ஓரளவு பழக்கப்பட்ட ஒன்றாகவே பயனர் பார்க்க வேண்டும் என்று எதிர்பார்க்கிறேன்.

ஆனால் பார்வையாளர்களைக் கவருமுகமாக தமிழ் இடைமுகப்பை மாற்றிக்கொள்ளும் வழிமுறைகளும், தமிழ் இடைமுகப்பும் திரையில் காண்பிக்கப்படும். தமிழ் இடைமுகப்பாக்கத்தில் பங்குபற்றும் வழிமுறைகளும் விளக்கப்படும்.

தமிழ் 99, பாமினி, இலங்கையின் தரப்படுத்தப்பட்ட தளக்கோலம், ஆங்கில ஒலியியல் ஆகியவை உள்ளீட்டு முறைகளாக உள்ளடக்கப்பட்டுள்ளன.

முதல் தடவை க்னூ/லினக்சை இவ்வட்டு மூலமாகவே அறிமுகப்படுத்த வேண்டியுள்ளதால் ஆர்வமூட்டக்கூடிய பல மென்பொருட்களைக் காட்சிப்படுத்த வேண்டிய தேவையும் எழுகிறது.
மிகச்சிரமப்பட்டு இடமொதுக்கி பின்வரும் பொதிகள் நிறுவப்பட்டுள்ளன.

* Kdenlive video editor
* Audacity
* Hydrogen Drum machine

இப்பொதிகள் பயனுள்ள "விளையாட்டுக்களாக" வும் இருக்கும் என்பதால் Games அகற்றப்பட்டுள்ளது ;-)

நேரப்பற்றக்குறை காரணமாக இடைமுகப்பின் எழுத்துரு, அழகு போன்றவற்றை கவனிக்க முடியாமல் போய்விட்டது.

திருக்கோணமலை நிகழ்வட்டுக்கான Wallpaper வடிவமைப்புக்காக திருக்கோணமலைக் கடற்கரையை அழகாக ஒளிப்படம் எடுத்துத் தந்துதவிய வி. பிரஷாந்தனுக்கு நன்றிகள்.

அவரது ஒளிவண்ணத்தில் உருவான Wallpaper இதோ :

கருத்தரங்கினை ஒழுங்குபடுத்தி அதற்கான உழைப்பினைச் செலுத்திக்கொண்டிருக்கும் ஜெகந்த்துக்கு சிறப்பு நன்றிகள்.

வட்டினைத் தரவிறக்கத்துக்கு வழங்குவதற்கான வசதிகள் தற்போது இல்லை.

நாளை திருக்கோணமலையில் GNU/Linux கருத்தரங்கு.

2009-03-27T11:22:00.001+05:30

நாளை 28-03-2009 சனிக்கிழமை திருக்கோணமலை இந்துக்கல்லூரியில் பிற்பகல் 2 மணிக்கு க்னூ/லினக்ஸ் தொடர்பான கருத்தரங்கு ஒன்று நடைபெறவுள்ளது.

திட்டமிடப்பட்டுள்ள நிகழ்ச்சி ஒழுங்கு வருமாறு:

1. Software and Types of software
* Software
* Closed Source
* Open Source
* Free software

Software Of the session
Q&A

2. Software Politics
* Monopoly
* Piracy

Software Of the session
Q&A

3. GNU Project, RMS and Linux

* History
* Distros

Software Of the session
Q&A

4. Pros and Cons of GNU/Linux

Software Of the session
Q&A

5. GNU/Linux and IT Industry

FOSS on Windows
Software Of the session
Q&A

6. திருக்கோணமலை நிகழ்வட்டு introduction

Software Of the session
Q&A

7. திருக்கோணமலை நிகழ்வட்டு In use

Software Of the session
Q&A

8. Discussion

திருக்கோணமலை நகரத்தைச்சேர்ர்ந்த கணினிப் பயனாளர்கள், மாணவர்கள் உள்ளடங்கிய 100 பேர் பங்குபற்றும் நிகழ்ச்சியாக இது அமையும்.

கலந்துகொள்ள விரும்புபவர்கள் என்னை (077 2260165) அல்லது ஜெகந்த் (077 5385895)ஐ நாளை காலைக்கிடையில் தொடர்புகொள்ளவும்.

கலந்துகொள்ளும் அனைவருக்கும் க்னூ/லினக்ஸ் கையேடு, திருக்கோணமலை நிழ்வட்டு, சிற்றுண்டிகள் வழங்கப்படும்.

கியூப மக்களின் கருத்தியலுக்கு மிக அருகாமையில் கட்டற்ற மென்பொருள் இயக்கம் இருக்கிறது.

2009-02-14T03:24:00.002+05:30

இவ்வாரம் கியூபா (கூபா) நாடு தன் க்னூ/லினக்ஸ் வழங்கலான "நோவா" வினை வெளியிட்ட செய்தி ஊடகங்களை பற்றிகொண்டுவிட்டது.

நோவா:

இது பிரபலமான ஜென்ட்டூ லினக்ஸ் இனை அடிப்படையாகக் கொண்ட வழங்கல். அதனால் மற்றைய (எடுத்துக்காட்டாக உபுண்டு) வழங்கல்கள் போன்று இருமக்கோப்புகளிலிருந்தல்லாது மூல நிரலிலிருந்து மென்பொருட்களை நிறுவிக்கொள்ளும்.

சீனா, வெனிசுவேலா, பிறேசில், ஆகிய நாடுகள் தமக்கென உத்தியோகபூர்வமாக லினக்ஸ் வழங்கல்களை இதற்கு முன்னர் உருவாக்கிக்கொண்டுள்ளன.

லத்தீன் அமெரிக்காவில் உருவாகிவரும் ஏகாதிபத்திய எதிர்ப்பு அரசுகள் க்னூ/லினக்ஸ் மீதான தங்கள் ஆதரவை தொடர்ச்சியாக வெளிப்படுத்தி வருகின்றன.

நோவா, ஹவனாவில் நடைபெற்ற "தொழிநுட்ப இறையாண்மை" மாநாட்டில் வைத்து வெளியிடப்பட்டுள்ளது.

நோவா க்னூ/லினக்ஸ் பற்றிய சிறு விளக்கப்படம் Youtube இல் உள்ளது.

சில பின்னணித் தகவல்கள்:

கியூபா பொருளாதார, தொழிநுட்ப ரீதியாக தலையெடுத்து விடுவதை எல்லா விதத்திலும் அமுக்குமுகமாக ஐக்கிய அமெரிக்கா மிக இறுக்கமான பொருளாதாரத்தடையை விதித்துள்ளது.

இதன் காரணமாக தொழிநுட்ப உபகரணங்களை கியூபாவுக்கு விற்றல் தடுக்கப்பட்டுள்ளது

கியூபா மிக அண்மைக்காலத்தில் தான் தனிப்பட்ட பாவனைக்கான கணினிகளை விற்கும் அனுமதியை வர்த்தகர்களுக்கு வழங்கியிருந்தது.

கியூபாவுக்கான ஒளிநார் இணையப்பாட்டை அணுக்கம் அமெரிக்காவால் தடை செய்யப்பட்டுள்ளது. (இது இணையத்தொடர்புக்கும், வேகத்துக்கும் இன்றியமையாதது)

மைக்ரோசொஃப்ட் மென்பொருட்கள் சட்டபூர்வமாக கியூபாவுக்கு விற்கப்படுவது அமெரிக்க அரசால் தடை செய்யப்பட்டுள்ளது.

கியூபத் தரப்பில் இச்செய்தி தொடர்பாக வெளியிட்ட கருத்துக்கள் சில :

எல்லாம் சுதந்திரத்துக்கும் இறையாண்மைக்கும் என்ற வகையில், கியூப மக்களின் கருத்தியலுக்கு மிக அருகாமையில் கட்டற்ற மென்பொருள் இயக்கம் இருக்கிறது.

தனியுரிமை மென்பொருட்கள், ஒருவர் அறியாதபடிக்கு பின்கதவுகளையும் கெடுதியான நிரல்களையும் கொண்டிருக்கமுடியும். கட்டற்ற மென்பொருட்களில் அவ்வாறில்லை.

மைக்ரோசொஃப்டின் மென்பொருட்கள் மூடிய நிரல்களாக இருப்பதால், அந்நிரல்களில் அமெரிக்க அரசின் நலன் சார்ந்த செயற்பாடுகள் பொதியப்பட்டிருக்கக்கூடும் என்ற சந்தேகமும் வெவ்வேறு வர்த்தைகளூடு வெளிப்படுத்தப்பட்டுள்ளது.

தொழிநுட்பத்துறையின் பன்னாட்டு இளம் சமுதாயம் கியூபா, கம்யூனிசம் தொடர்பாய் இச்செய்தி தொட்டு என்ன உரையாடிக்கொள்கிறார்கள்?

பார்க்க:

http://linux.slashdot.org/article.pl?sid=05/05/19/1213245&tid=106&tid=219

Damn, for a minute there, I thought we could use his celebrity power to start convincing people that Linux really is cool.

I can Imagine Castro doing a commercial for Linux:

"Linux. Works for computers as old as myself!" (smokes cigar)

America is pretty much the only country not trading with Cuba directly. In spite of that, millions in US currency flow into Cuba every month through indirect routes, including the sizable Cuban population who fled to the US for love of freedom. Overall, Cuba has a national GDP of $33.92 billion, which gives them a far better per-capita than most other countries with similar poverty levels.

The reality simply is that Cuba is run by a corrupt and incompetant military dictator whose only prior qualification was being a spoiled rich kid and lawyer. The complete mismanagement of the economy by his everlasting regime led to scarcity, and the spoils system inherent in any communist regime has led to a disparity whereby most Cubans live in abject poverty, but the priveledged few live in opulant comfort.

Cuba is not even a good example of how a communist ought to be run, but it is an excellent example of how communist governments eventually are run.

//Oh come on, cut the hypocricy.

Fulgencio Batista was a ruthless dictator, but that was all fine and dandy with the US because he was friendly with them. Not so with Cubans, which why Castro et al managed to overthrow him starting off with only 16 people.

And in Chile, Salvadore Allende was democratically elected, yet the US helped to overthrow him because he wasn't right-wing enough for them, and so that bastard Pinochet got run run roughshod over Chile for the next few decades. And that was all okay.

And in the Dominican Republic, Rafael Trujillo ("he may be a son of a bitch, but he's our son of a bitch") ran a brutal dictatorship all with the help of the US. So why was he okay?

And in Nicaragua, Anastasio Somoza ran a disgraceful dictatorship all nicely sponsored by the US for decades. But once again, somehow that was okay but Sandinistas were not.

And let's not forget that good buddy of the US, Saddam Hussein, who received assloads of military equipment because it suited the interests of the US.

US history is so overrun with embarassing stuff like this it's depressing. But the worst part is that it keeps happening, and most Americans just don't seem to give a damn.//

இச்செய்தி தொடர்பான கியூபாவின் உத்தியோகபூர்வ அறிக்கையினை தேடிப்பார்த்தேன் இணையத்தில் சிக்கவில்லை.உங்களில் எவருக்காவது தேடிப்பெற முடிந்தால் தொடுப்பினை பின்னூட்டம் வழியாகத் தாருங்கள்.

படங்களைப் படிக்கிறது கூகிள்

2008-12-22T12:16:00.002+05:30

இப்பதிவு கட்டற்ற மென்பொருளோடோ க்னூ லினக்சோடோ நேரடியான சம்பந்தமுடையதல்ல.

ஆனால் கணிமை உலகின் கவனிக்கத்தகுந்த மாற்றங்களுள் ஒன்றினை இச்செய்தி குறிகாட்டுவதாகப் படுவதால் இங்கே பகிரப்படுகிறது.

கூகிள் தேடுபொறியின் படங்களைத்தேடும் பொறியில் புதிய வசதி ஒன்று சேர்க்கப்பட்டுள்ளது.

நீங்கள் தேடும் குறிச்சொல்லுக்கான கோட்டுப்படம் வேண்டுமா, ஒளிப்படம் வேண்டுமா, Clip art வேண்டுமா அல்லது முகங்கள் வேண்டுமா எனத் தேடு பொறிகொண்டு தீர்மானிக்கக்கூடிய வசதிதான் அது.

இதுவரை காலமும் தேடு பொறிகள் எழுத்துக்களை மட்டுமே வாசித்தன. பின்னர் அண்மையில் படங்களாக உள்ள எழுத்துக்களை ஒளிசார் எழுத்துணரி கொண்டு வாசித்துத் தேடும் வசதிகள் பரீட்சிக்கப்பட்டன. ஆனால் அதுவும் கூட எழுத்துக்கள் தொடர்பானதே.

தற்போது வந்திருக்கும் இந்த வசதி படங்களை வாசிக்க தொடங்கியிருக்கிறது.

படவுணர்தல் (Image Recognition) தொழிநுட்பம் புதியதல்ல. ஒத்த படங்களைத் தேடிக்கண்டறியவும் படத்தின் நிறங்களை முடிந்தவரை ஆய்ந்தறியவும் வல்ல மென்பொருட்கள் பயன்பாட்டிலுள்ளன.

எனது கணினியிலும் கூட அவ்வப்போது ஒத்த படங்களைத் தேடிக் களைய இவ்வாறான கருவிகளைப் பயன்படுத்தியுள்ளேன்.

கூகிள் குரோம் வெளியிடப்பட்டபோது, தன்னியக்க முறையில் மில்லியன் கணக்கான வலைப்பக்கங்களுடன் அதனைச் சோதனை செய்ய இவ்வாறான படவுணர்தல் தொழிநுட்பமே பயன்படுத்தப்பட்டதாக அதன் ஆவணங்களில் தெரிவித்திருந்தார்கள்.

படங்களின் hash பெறப்பட்டு அது ஒப்பிடப்படுதல்.

இதன் அடுத்த படிக்கே கூகிள் இப்போது நகர்ந்திருக்கிறது.

படங்களின் சூத்திரம், படங்களின் வகைகளுக்குள் பொதிந்திருக்கும் "கோலங்கள்" இவற்றைப்பயன்படுத்தும் தேடும் முறையைக் கொண்டுவந்திருக்கிறது.

இது வேறு பல இடங்களில் ஏற்கனவே சோதிக்கப்பட்டதாயினும் தேடுபொறியொன்றில் இதனைப்பொருத்தும் சிந்தனை புதியது.

முகங்கள் கொண்ட படங்களைப் பிரித்தறிதல் இதன் சுவையான பெறுபேறு.

படங்களின் "கோலங்களை" அதன் சமன்பாடுகளை ஆய்வு செய்யும் இப்புதிய ஆய்வுப்பாதை இன்னும் சுவையான, ஆக்கபூர்வமான பல பெறுபேறுகளை மனிதருக்குப் பெற்றுத்தரும்.

தனக்கான மட்டுப்பாடுகளுடன் இதன் சாத்தியங்கள் பரந்து விரிந்து கிடக்கிறது.

சிறுவயதில் அம்மம்மா வீட்டில் இருந்த ஒலிநாடா இயக்கி (tape player) ஒன்று இத்தனையாவது பாடல் வேண்டும் என்று விசையை அழுத்தினால் சரியாக அந்தப்பட்டின் தொடக்கத்தில் போய் நிற்பது கண்டு புல்லரித்து வியந்திருக்கிறேன். (அப்போது இறுவட்டுக்கள் வரத்தொடங்கிய காலம்) பின்னர், பாடல் முடிவில் ஒரு ஒலியற்ற இடைவெளி இருக்கும் எனும் எளிய கோலம் தான் இந்த வசதியின் சூத்திரம் என்று ஒலியற்ற இடைவெளிகள் சிலவற்றை பதிவு செய்து சோதித்துத் தெளிந்துகொண்டேன்.

படங்களைப் படிக்கும் முறையும் இவ்வாறானதே.

இனி படங்களில், அசைபடங்களில், ஒலிக்கோப்புக்களில் உள்ள கோலங்களை அறிந்து உணர்ந்து தேடித்தரும் வசதிகளை மனிதர் மனிதருக்கு வழங்கத்தொடங்குவர்.

இசை என்ற குறிச்சொல்லில் தேடி, தவில் இசை மட்டும் கொண்ட ஒலிக்கோப்புக்கள் வரும்படியாக தேடலை வடிகட்டிக்கொள்ளும் வசதி உபயோகமானதுதானே?

உபுண்டுகளில் தமிழ் எழுத்துருக்கள் பயன்பாட்டில் உள்ள வழுக்களும் தீர்வும்

2008-11-03T15:28:00.001+05:30

(உபுண்டு தமிழ் குழுமத்துக்கு கா. சேது எழுதிய மடல்)

நண்பர்களே,

உபுண்டு 8.04 (ஹார்டி) வந்த பின், தமிழ் எழுத்துருக்கள் தொடர்பாக 4
வழுக்கள் இருப்பதாகச் சென்ற வாரம் எழுதியிருந்தேன்.

//இன்ட்ரெபிடிலும் ஹார்டியிலும் தமிழ் பயன்பாட்டுகளுக்கு எழுத்துருகள்
தொடர்பாக ஒரே விதமாக 4 வகை வழுக்கள். விவரமான அறிக்கை எழுத
ஆரமபித்துள்ளேன். சற்று பொறுக்கவும். தெரிந்த தீர்வுகள் எல்லாம் தற்காலிக
நடவடிக்கைகளே. சரியான தீர்வுகள் நோக்கிச் செல்ல அடுத்த கட்ட
நடுவடிக்கைகளுக்கு நாம் செல்ல வேண்டும். அது வழு அறிக்கைகளை டெபியன் /
உபுண்டு மேம்பாட்டாளர்களிடம் முன்வைத்து முற்றாக எல்லாவற்றையும்
தீர்ப்பது. //

அது எனது அக்டோபர் 28
https://lists.ubuntu.com/archives/ubuntu-l10n-tam/2008-October/001633.html
மடலில் நான் எழுதியது. 3 மாதங்கள் முன் உபுண்டு இன்ட்ரெபிட் ஆல்பாவை
நிறுவி அதன் பின் அம்மடல் இட்ட தினம் வரையிலான எல்லா மேம்பபாடுகளையும்
இற்றைபடுத்தியிருந்த எனது வன்தட்டிலுள்ள இயங்குதளத்தில் நான்
கண்ணடிருந்தவைகள் அடிப்படையில் அவ்வாறு குறிப்பிட்டிருந்தேன்.

ஆனால் அதன் பின் அதற்கு சில வாரங்கள் முன்னரே பதிவிறக்கி வைத்திருந்த
பீட்டா இறுவட்டை முதன் முறையாக நிகழ்வட்டாக இயக்கிப்பார்க்கையில்
முதலாவதும் முக்கியதுமான வழுவான மங்கல் பிரச்சினையில் ஒரு மாற்றம்
இருப்பதைக் கண்டேன். ஆரம்பத்தில் இயல்பாக வரும் லோகித் தமிழ் தரும்
ttf-indic-fonts-core உட்பட்ட நிறுவலில் முன்னர் உபுண்டு 8.04 வில் போல
இருப்பினும் தமிழ் மொழிப்பாவணைக்கு அவசியமான மேலதிகப் பொதிகளை
இடுகையில் ttf-tamil-fonts பொதி இற்றறைப்படுத்தப்பட்ட பின் மங்குதல்
இல்லாமலும் எழுத்துகள் சிதையாமலும் முன்னனேற்றப்பட்ட தோற்றத்துக்கு
மாறுகின்றன. பின்னர் வந்த இறுதி வெளியீட்டை புதிதாக வன்தட்டில் நிறுவி
இயக்குகையிலும் அம்மாற்றம் நிரந்தரமானது என்பது தெளிவானது.

ஆனால் sans/serif/monospace எழுத்துருக்கள் பயன்பாடுகளில் தமிழ்
எழுத்துருவங்கள் மங்கலாதல் மற்றும் சீரற்றல் இல்லாவிடினும் அவற்றின் உருவ
இயல்புகள் TSCu- Paranar போலத்தான் உள்ளது. முன்னர் Hinting=Slight என்ற
தீர்விற்குப்பின் லோகித் தமிழ் இயல்பான உருவங்களின் துல்லியம் (அல்லது
வடிவழகு) இந்த TSCu- Paranar இயல்பில் இல்லை என்பது என் கருத்து.
மேலும் இம்மடலில் நான் சுட்டிக்காட்டுகின்ற ஏனைய 3 வழுக்களில்
கடைசியானதற்கு TSCu எழுத்துருக்களே காரணி என்பதும் புலனாகியுள்ளது.

வழு 2 யைப்பற்றி சில (ஏப்பிரல் - மே) வழு 1 பற்றிய மடல்களில்
குறிப்பிட்டிருந்தேன. இத் திரைக்காட்சியைப் பாருங்கள்:
http://i34.tinypic.com/2w5t5dc.jpg . ஆங்கில மொழியிடச் சூழலில்
Appearance Preferences, Font Rendering Details தேர்வுகளுக்கான
பெட்டகங்களில் எழுத்துக்கள் தெரிவது போல்லல்லாமல் தமிழ்
மொழியிடச்சூழிலில் வெற்றுக்கட்டங்களாகத் தென்படுதல். இது லோகித் தமிழ்
எழுத்துருவின் மேதாதிக்கதினால் என்பதை கணித்துள்ளேன். லோகித் தமிழ்
எழுத்துருவை அகற்றினல் இவ்வழுவும் அகல்கிறது!

வழு 3 ஆனது http://ubuntuforums.org/showthread.php?t=889079 .
"படருதல்" பிரச்சினை. பயர்பாக்ஸ் 3 ஐ தமிழ் மொழியிடச்சூழிலில்
இயக்குகையில் சில வலைப்பக்கங்களில் சில இடங்களில் ஆங்கில
எழுத்துக்களுக்குப் பதிலாக தமிழ் எழுத்துக்கள் பின்னிப் பினைந்துத்
தெரிவது. காட்டாக http://i37.tinypic.com/httsg6.jpg திரைகாட்சியில்
இல் எனது வன்தட்டில் முன்னைய நிறுவலில் பீட்டா வரை மேம்படுத்திய போது,
""ibus" மடலாற்ற குழுமத்திற்கு நான் இட்ட மடலை தமிழ் மொழியிடச்சூழிலில்
FF3 இல் பார்க்கையில் அவ்வழு இருப்பதையும் ஆங்கில மொழியிடச்சூழிலில்
இல்லாதிருப்பதையும் காணலாம். (அதன் வலைத்தளப் பக்கம் :
http://groups.google.com/group/ibus-user/browse_thread/thread/1e1461e4b4cd244
). இப்போதும் இறுதி வெளியீட்டுல் பார்க்கையில் அப்பக்கத்திலும் மற்றும்
Google / Yahoo அல்லாத http://www.unicode.org/review/pr129.html
பக்கதத்திலும் இந்த "படரல்" வழு கண்டுள்ளேன். லோகித் தமிழ் எழுத்துருவை
அகற்றினல் இதுவும் அகல்கிறது

வழு 4 ஆனது TSCu எழுதுருக்களின் ஆதிக்கத்தினால் கூகிள் அஞ்சல் இடைமுகப்பு
மற்றும் பலகணியில் (task bar) இயக்கப்பட்டுக் கொண்டிருக்கும் செயல்
நிரல்களைக் காட்டும் கீற்றுகளிலும், ஆஸ்கியின் மேல் (128-255) அரங்கில்
உள்ள குறியீடுகள் (- அம்புக்குறிகள், elipses) அவற்றிற்கான குறியேற்ற
இடங்களில் பொருத்தப்பட்ட தஸ்கி எழுத்துருவங்களைக் காண்பித்தல். (இதன்
திரைக்காட்சியை அடுத்த மடலில் இடுவேன்) . எல்லா TSCu எழுத்துக்களயும்
அகற்றினல் இவ்வழு ஏற்படுவதில்லை.

மேற் காட்டிய எல்லா 4 வழுக்களையும் இல்லாதாக்க வேண்டுமாயின் லோகித்
தமிழ் மற்றும் எல்லா TSCu எழுத்துருக்களையும் அகற்றுவது ஒரு தீர்வு.
ஆயினும் அவ்வாறு அகற்றி சூரியன்டாட்காம் நிறுவியிருப்பினும்
sans/serif/monospace எழுத்துருக்கள் தமிழ் எழுத்துருவங்களுக்கு
உபுண்டு-கட்சியில் போல Free fonts இல் உள்ள வடிவழகைத்தான் காட்டுகின்றன.
அதாவது ஈகார உயிர்மெய்களில் விசிறி அகன்று தோன்றும். ஆக பயனர்
sans/serif/monospace எழுத்துருக்களுக்கை முன்னிருப்பாக பயன்படுத்தும்
ஒவ்வொரு செயல் நிரல்களிலும் மாற்றாக சூரியன்டாட்காம் அல்லது வேறு ஏதாவது
வழுக்களற்ற எழுத்துருக்களை அமைக்க வேண்டியிருக்கும்.

மேலும் லோகித் தமிழ் மற்றும் TSCu எழுத்துருக்கள் எல்லாம் கட்டற்ற
மென்பொருள்களாக அளிக்கப்படுவதால் அவற்றை அகற்ற வேண்டும் என்ற நிலைப்பாடு
அவ்வளவு ஏற்கத்தக்கதல்ல. டெபியன் எட்ச், பெடோரா 9 மற்றும் மாண்டிரீவா
2009 ஆகியனவற்றில் இவற்றினால் ஏற்படாத பிரச்சினைகள் உபுண்டுவில்தான்
ஏற்பட்டு வருகிறது என்பதையும் கண்டுள்ளேன்.

எனவே வேண்டிய தீர்வு, லோகித் தமிழ் மற்றும் TSCu எழுத்துருக்களை
அகற்றாமல் sans/serif/monospace எழுத்துருக்கள் நாம் விரும்பும்
எழுத்துருவத்தில் உள்ள தமிழிற்கான எழுத்துருவங்களை அவைகளின் இயல்பாக
ஏற்றிக்கொள்ளுமாறு நாம் கட்டுப்படுத்த இயலுமை எனக் கருதுகிறேன். அது
சாத்தியம்தானா என்ற வினாவுடன் நேற்று /etc/fonts/ கீழ்ழுள்ள அடைவுகள்
மற்றும் கோப்புக்கள் பல ஆய்வு செய்து சோதனைகள் சில செய்து இயலும்
என்பதைக் கண்டறிந்தேன்.

இந்த திரைக்காட்சியைப் பாருங்கள்: http://i34.tinypic.com/25a6szo.jpg

லோகித் தமிழ் மற்றும் TSCu எழுத்துருக்களை அகற்றாமல்
sans/serif/monospace எழுத்துருக்களுக்கு சூரியன்டாட்காமை
விருப்பத்தேர்வாக்கத் (preferred) தேவையான தொடர்பை (sym link) ஆக்கி
மேலும் Hinting=Slight என்பதையும் பாவித்து அமைத்தபின் எனக்கு
பிடித்தவிதத்தில் வடிவழகுடன் இப்போது எனது உபுண்டு 8.10 உள்ளது.
மேற்காட்டிய திரைக்காட்சியில் போல.

ஆயினும் அது நான் தற்போது பயன்படுத்தும் LCD 19" திரையுடன். மேலும்
கேடீஈ மற்றும் சுபுண்டுகளில் இதுவரை சோதிக்கவில்லை. எனவே தாங்கள் யாவரும்
வெவ்வேறு பணிச்சூழல்களிலும் திரைகளிலிலும் சோதனைகளை செய்து பார்க்கத்
தேவையான படிகளை இன்றோ நாளையோ அடுத்த மடலில் ஆங்கிலத்தில் எழுதுவேன்.
போதிய நேரம் கிடைப்பின் தமிழிலும் எழுதி pdf ஆக்கி இணைப்பேன் (தமிழில்
மடல் இருப்பின் சோதனைகளின் போது வாசிக்கவியலா நிலை ஏற்படக்கூடும்
என்பதால்தான் pdf எண்ணம்).

வலைப்பதிவிற்கு பின்னர் கொணரலாம். நான் செய்யாவிடில் நண்பர்
மயூரன்அதைச்செய்து உதவி விடுவார் :>)

~சேது

உபுண்டு 8.10 alpha வின் பாரதூரமான வழு.

2008-10-15T23:20:00.000+05:30

[இது தமிழ் உபுண்டு மடற்குழுவுக்கு சேது அனுப்பிய மடல். ஒவ்வொரு தொழிநுட்ப விஷயத்தையும் அதன் ஆழம்வரை சென்று ஆராய்ந்து எழுதும் சேதுவை அவருக்கென ஒரு வலைப்பதிவைத்தொடங்கும்படி கேட்டுக்கேட்டு அலுத்துப்போய்விட்டது ;-). அவரது நேர நெருக்கடி புரிந்துகொள்ளத்தக்கதே. அவர் வலைப்பதிவு ஆரம்பிக்கும்வரை மடற்குழுக்களில் மறைந்துகிடக்கும் அவரது முக்கியமான எழுத்துக்களை இக்குறிப்பேட்டில் தர எண்ணம். அவர் வலைப்பதிவு தொடங்கும்போது இவற்றை இலகுவாக எடுத்து அங்கே போட்டுக்கொள்ளலாம்]

(Intrepid Ibex என்பதே உபுண்டுவின் 8.10 பதிப்பின் பெயர்)

நான் பல வாரங்கள் முன் அல்பா-3 நிறுவலில் இல் தொடங்கி அதன் பின் வந்த எல்லா
மேம்பாடுகளையும் சேர்த்து தற்போது பீட்டா (இன்று வரையான) மேம்பாடுகளுடன் சோதித்து
வருகிறேன்.

முதலில் எழுத்துப்பெயர்த்தல் பற்றி:

Intrepid = இன்ரெபிட் அல்லது இன்ட்ரெபிட் அல்லது இந்தெரபிட் எழுத்துப்பெயர்ப்புகளில்
ஒன்றாக இருக்கலாம் என நினைக்கிறேன். trepid போன்ற வார்த்தைகளில் "tre" ஈற்றில் உள்ள
உயிர் ஒலி இகரமாக பலுக்கப்படுவதில்லை மாறாக கூடுதலாக அதில் எகரம் அண்மித்தே
இருப்பதாகக் கருதுகிறேன். ர வுக்குப்பதில் ற வாக இருக்க வேண்டுமா என்பது என் மனதில்
உள்ள இன்னொரு வினா.

Ibex = ஐபெக்ஸ் என்றிருக்கலாம்.

ஈற்றில் மெய் வரா என்ற விதியை கடைபிடிப்பதாயின் "பிட்" => "பிட்டு" , "க்ஸ்" => "க்சு"
என மாற்ற வேண்டும்.

எனினும் எழுத்துபெயர்ப்பு / தமிழாக்கம் சரியாக இருக்கவேண்டும் என்பது அவ்வளவு
முக்கியமல்ல . வெளியீட்டை உபுண்டு - 8.10 - பீட்டா என்றே கூடுதலாக அழைத்துக்கொள்ளலாம்
தானே?

பார்க்க : http://www.ubuntu.com/ மற்றும் http://www.ubuntu.com/testing/intrepid/beta பக்கங்களில் Ubuntu 8. 10
என்றுதான் அறிமுகப்படுத்தப்படுகிறது.

அடுத்து உபுண்டு, குபுண்டு மற்றும் சுபுண்டு 8.10 அல்பா வெளியீட்டுக்களில் இருந்த ஒரு
பாரதூரமான வழு, மற்றும் பீட்டா வெளியீட்டில் உள்ள அதற்கான தற்காலிக வழு தவிர்க்கும்
பாதுகாப்பு நடவடிக்கை, தற்போதைய நிலவரங்கள் பற்றி தாங்கள் யாவரும் அறிந்திருத்தல் நன்று.

http://www.ubuntu.com/testing/intrepid/beta#Known%20Issues என்ற பக்கத்தைப்
பார்க்கவும். அதில் முதலாவதாகச் சுட்டிக்காட்டப்படும் பிரச்சினைதனான் அவ்வழுவினால் ஏற்பட்டது :

A problem that could result in corruption of the firmware on Intel
GigE ethernet hardware has led to the disabling of the e1000e driver
in the Linux kernel included in Ubuntu 8.10 Beta. Ethernet devices
that use this driver cannot be used with Ubuntu 8.10 Beta; support for
this hardware will be re-enabled in daily builds immediately after
Beta and this issue will be resolved for the Ubuntu 8.10 final
release. https://bugs.launchpad.net/bugs/263555

மேற்கூறிய அவ்வழு (26355) அறிக்கை பக்கம் சென்று பாருங்கள். e1000e இயக்கி பாவிக்கும்
இன்டெலின் Ethernet வன்பொருட்கள் சில கணினிகளில் (முக்கியமாக மடிக்கணினிகளில்)
பாவிக்கவியலா அளவிற்கு 8.10 அல்பாக்களில் இருந்த அவ்வழுவினால் பாதிக்கப்பட்டிருதமை
பற்றிய தகவற்கள் அங்கு காணலாம். மற்றும் இவ் வழுப் பிரச்சினைக் காரணமாக உபுண்டு
வெளியீட்டாளர்களுக்கு எதிராகவும் சார்பாகவும் பல காரசார விவாதங்கள் அங்கு காணலாம்.

சுருக்காமாக பட்டியலிடுவதாயின்:

1)

2008 ஆகஸ்ட் முதல் செப்டெம்பர் 24 முன் வெளியிடப்பட்டு வந்த (லினக்ஸ் kernel
2.6.27-4.6 க்கு முன்னர் வந்த) 2.6.27 வரிசை kernal rc வெளியீடுகள் சில இன்டெல்
பிணைய வன்பொருட் பாகங்கள் (network parts) பாவிக்கும் NVRAM ஐ மாசுபடுத்தக்கூடிய
வழுவை கொண்டிருந்தன. அப் பிரச்சினையால் பாதிக்கப்பட்டவை e1000e இயக்கி (driver)
பயன்படுத்தும் ich8 மற்றும் ich9 பாலவமைப்பினாலான இன்டெல் வன்பொருள் பாகங்கள் உள்ள
கணினிகள். முக்கியமாக பல சமீபகால மடிக்கணினிகள். பாதிப்பின் பாரதூர தாக்கம் என்னவெனின் சிலரின் கணினிகளில், பிணையம் தொடர்பான வன்பொருட்கள் எந்த இயங்குத்தளத்திலும் முற்றாகப் பாவிக்கியலா வண்ணம் பழுதானதாகும்!

2)

செப்டெம்பர் 24 இல் வெளிவந்த 8.10 அல்பா (kernel 2.6.27-4.6) முதல் பின்னர்
ஒக்டோபர் 2 வாக்கில் வெளிவந்த பீட்டா மற்றும் அதன் பின்னர் சில நாட்கள் வரை வெளிவந்த
தினசரி ஆக்கங்கள் (Daily Builds) ஆகியவற்றில் சம்பந்தப்பட்ட வன்பொருட்களின்
பாதுகாப்புக்காக இன்டெல் e1000e இயக்கி பயன்படுத்தும் கணினிகளில் பிணைய அமைப்பை
செயலிழக்கச் செய்யும் தற்காலிக நடவடிக்கை உள்ளடக்கினர். அதானது அவ்வெளியீடுகளில் ஒன்றை
நிறுவப்படும் கணினியில் இன்டெல் e1000e இயக்கி பாவிக்கும் வன்பொருள் இருப்பின் அது
பழுதைடையா வண்ணம் அவ்வியங்குத்தளத்தில் மட்டும் பிணைய / இணைய தொடர்புகள் இயங்காமல்
இருக்கும் நடவடிக்கை. அதே e1000e இருக்கும் கணினிகளில் பழைய வழுவற்ற kernel உள்ள
வேறு லினக்ஸ் மற்றும் விண்டோ இயங்குதளங்களில் பிணைய / இணைய தொடர்புகள் பிரச்சினைகள் இல்லாமல் இயங்கும. அதாவது வன்பொருள் பழுதாகும் சாத்தியக்கூறுகளை முற்றாக அகற்றவே அந் நடவடிக்கை.

3)

பின்னர் ஒக் 7 வெளியிடப்பட்ட 20081007 தினசரி ஆக்கத்திலிருந்து வழு முழுவதும்
களையப்பட்ட kernel தான் உள்ளடக்கப்படுவதாக வழு அறிக்கை பக்கத்தில் ஒரு மடலில்
https://bugs.launchpad.net/ubuntu/+source/linux/+bug/263555/comments/166
கூறப்பட்டுள்ளது. ஆயினும் அதன் பின்னரரும் தங்கள் e1000e இயக்கி உள்ள கணினிகளில் வழு
அகற்றப்பட்ட நிறுவலில் இருந்து வலைத்தொடர்புகளை ஏற்படுத்த இயலாதுள்ளதாக மூவர்
அப்பக்கத்தில் அறிவித்துள்ளனர். (அவற்றிற்கு வேறு காரணங்கள் இருக்கலாம் என நினைக்கிறேன்).

4)

தற்போது உபுண்டு 8.10 - பீட்டா
(http://www.ubuntu.com/testing/intrepid/beta) அல்லது குபுண்டு 8.10 - பீட்டா
(https://wiki.kubuntu.org/IntrepidIbex/Beta/Kubuntu) பதிவிறிக்கி நிறுவி
சோதிதித்துப்பார்க்க விரும்பின் முதலில் தங்கள் கணினியில் உள்ள பிணைய அமைப்புக்கான இயக்கி
(ethernet driver) என்னவென கண்டறியுங்கள்.

அத்துடன் சுபுண்டு 8.10 - பீட்டா (http://cdimage.ubuntu.com/xubuntu/releases/8.10/beta/)
விற்கும் அவ்வாறே.

எந்த இயக்கி பயன்படுத்தப்படுகிறது என்பதை அறிய முதலில் பயன்படுத்தப்படும்
இடைமுகப்புக்களின் வன்பொருள் முகவரிக்களை ("HWaddr" of Network interfaces)
கண்டறிய பின்வரும் கட்டளையை ஒரு முனையத்தில் கொடுக்கவும்.

ifconfig |grep HWaddr

காட்டாக எனது intel-D945GNT motherboard உள்ள கணினியில் உள்ள ஒரே இடைமுகப்பிற்கு
வரும் மறுமொழி பின்வருமாறு:

eth0 Link encap:Ethernet HWaddr 00:19:d1:13:26:ba

ஒன்றுக்கு மேற்பட்ட இடைமுகப்புக்கள் இருப்பின் (மேலதிக PCI அட்டைகளாக ) அவற்றிற்கான
HWaddr களும் மேற்காட்டியது போல eth1, eth2, ... என்ற வரிகளில் வரும். (eth0,
eth1,.. என்பன logical names எனப்படும்)

அடுத்து முனையத்தில் பின்வரும் கட்டளை கொடுங்கள் :

sudo lshw -C net

தங்கள் பயனர்க்கணக்கிற்கான கடவுச்சொல் கேட்பின் கொடுத்தபின் வரும் மறுமொழி வரிகளில் ஒவ்வோர்
இடைமுகப்புக்கான விவரங்கள் இருக்கும். மேலே நாம் கண்ட "HWaddr" என்பது இங்கு "serial"
என இருக்கும். அதற்கான விவரங்களில் "product:" என்பதற்கு தெரிவிக்கப்படுவது எந்த
இயக்கி பயன்படுத்தப்படுகிறது என்பது பற்றி.

காட்டாக எனது கணினியில் இக்கட்டளை இடுகையில் வரும் முழுப்பதில் பின்வருமாறு:

sethu@IntrepidAlpha-sethu-desktop:~$ sudo lshw -C net
[sudo] password for sethu:
*-network
description: Ethernet interface
product: 82801G (ICH7 Family) LAN Controller
vendor: Intel Corporation
physical id: 8
bus info: pci@0000:04:08.0
logical name: eth0
version: 01
serial: 00:19:d1:13:26:ba
size: 100MB/s
capacity: 100MB/s
width: 32 bits
clock: 33MHz
capabilities: pm bus_master cap_list ethernet physical tp mii
10bt 10bt-fd 100bt 100bt-fd autonegotiation
configuration: autonegotiation=on broadcast=yes driver=e100
driverversion=3.5.23-k4-NAPI duplex=full firmware=N/A ip=192.168.0.2
latency=32 link=yes maxlatency=56 mingnt=8 module=e100 multicast=yes
port=MII speed=100MB/s
*-network DISABLED
description: Ethernet interface
physical id: 1
logical name: pan0
serial: d2:2b:82:44:f1:a0
capabilities: ethernet physical
configuration: broadcast=yes driver=bridge driverversion=2.3
firmware=N/A link=yes multicast=yes

மேற்காட்டியதில் எனது கணினியின் பிணையதிற்கான ஒரே வன்பொருள் இடைமுகப்பு eth0
பாவிக்கும் இயக்கி "82801G (ICH7 Family) LAN Controller" என அறிகிறோம். (அது
இந்த வழுவினால் பாதிப்படையாதது)

தங்கள் கணினியில் எந்தவொரு பிணைய வன்பொருள் இடைமுகப்புக்கும் ICH8 அல்லது ICH9 குடும்ப
e1000e இயக்கி பயன்படுத்தப்படுவதாயின் பீட்டா வெளியீட்டை பதிவிறக்கி நிறுவாமல் பின்வரும்
மாற்று நடவடிக்கைளில் ஒன்றைச் செய்யுங்கள் எனப் பரிந்துரைக்கிறேன்:

i)

காத்திருந்து இம்மாதக் கடைசியில் வரவுள்ள இறுதி வெளியீட்டை நிறுவுவது .

ii)

அல்லது இறுதி வெளியீடு வரும் முன் இடைக்காலத்தில் வரவுள்ள Release Candidate
(RC) இறுவட்டை வெளிவந்தபின் பதிவிறக்கி நிறுவுவது.

iii)

RC வரும் வரை முன் இப்போதே வேண்டுமெனின் கடைசியாக வந்த தினசரி ஆக்க இறுவட்டை
பதிவிறக்கி நிறுவுவது. உபுண்டு, குபுண்டு, சுபுண்டு ஆகியனவற்றிற்கான தினசரி ஆக்க
நிகழ்வட்டு அடங்கிய இறுவட்டுக்கள் உள்ள இடங்கள் பின்வருமாறு :

http://cdimage.ubuntu.com/daily-live/
http://cdimage.ubuntu.com/kubuntu/daily-live/
http://cdimage.ubuntu.com/xubuntu/daily-live/

5.

இவ்வழுவின் மூல காரணி முதலில் வந்த 2.6.27-rc kernel மேம்பாடுகள். ( வழு
அறிக்கைப பக்கம் : http://bugzilla.kernel.org/show_bug.cgi?id=11382 ) .
பெடோரா, மாண்டிரீவா, ஜெனட்டூ லினக்ஸ், சூசே மேம்பாட்டாளர்களும் இவ்வழுவை தவிர்ப்பதற்கான
நடவடிக்கைகளில் ஈடுபட்டனர் எனத்தெரிகிறது. உபுண்டு மேம்பாட்டாளர்களுக்கு எதிராக கடுமை
விமர்சனங்கள் எழக் காரணம் வன்பொருள் பாதிக்கக்கூடிய வழுவுள்ளது என அறிந்தபின்னும் அடுத்து
வெளியிடப்பட்ட அல்பா வரும் வரையிலான இடைக்காலத்தில் வழுவுடன் வெளியிடப்பட்டிருந்த
அல்பாவை உடனடியாக மீள்வாங்காமல் விட்டது எனத்தெரிகிறது.

தற்போது கூட http://www.kubuntu.org/ க்கு செல்லும் ஒரு புதுப்பயனர் குபுண்டு பீட்டா
பற்றிய விளம்பரப்படுத்தும் தொடுப்பை சொடுக்கி
http://www.kubuntu.org/news/8.10-beta வழியாக
https://wiki.kubuntu.org/IntrepidIbex/Beta/Kubuntu என்ற அறிவிப்பு பக்கம்
சென்று இறுவட்டை பதிவிறக்குகையில் எங்கும் இவ்வழு பற்றியோ ஏனைய இருக்கும் பிரச்சினைகள்
பற்றியோ அறியாமலே இருக்கலாம். உபுண்டுவிற்கான அறிவிப்பு பக்கத்தில் (
http://www.ubuntu.com/testing/intrepid/beta ) "Known Issues" பக்கதிற்கு
தொடுப்பு உண்டு. சுபுண்டு பீட்டா அறிவிக்கும்
http://www.xubuntu.org/news/intrepid/beta பக்கதிலிருந்து "Release Notes"
என்ற தொடுப்பு கொடுக்கும்
https://wiki.ubuntu.com/Xubuntu/IntrepidIbex/BetaAnnouncement பக்கத்தில்
இவ்வழு இருந்திருப்பதைப்பற்றி தெளிவாக தகவல் உள்ளது. இவ்வாறு வெவ்வேறு உபுண்டவின்
விநியோங்களிக்கிடையே ஒருமித்த விதமாகவில்லாமல் இருப்பதும் ஒரு குறைபாடுதான்.

எந்த பயனரும் அல்பா, பீட்டா போன்ற சோதனை வெளியீடுகளை பதிவிறக்கி சோதிக்க விரும்பின்,
ஏற்கனவே இருக்கும் வழுக்கள் மற்றையப் பிரச்சினைகள் பற்றி முற்றாக அறிந்த பின்னரே
முற்படவேண்டும். முக்கியமாக மேம்பாட்டாளர்களுக்கான மடலாற்ற குழும மடல்களை வாசிக்கவும்
வேண்டும். சோதனை வெளியீடுகளைப் பாவிக்கையில் மென்பொருட்கள் பழுது, தரவுக்கோப்புக்கள்
இழப்பு மற்றும் வன்பொருள் பழுது ஏற்படுவது அரிதாக இருப்பினும் அவை ஏற்பட ஒரு
சாத்தியக்கூறும் இல்லை என யாரும் உத்தரவாதம் அளிப்பதில்லை என்பதையும் நோக்கவும். எனவே
சோதனைகளில் ஈடுபட முன் இவற்றை கருத்தில் எடுத்து முடிவு செய்யுங்கள்.

உபுண்டு 8.04 : தமிழர்களே தற்போதைக்குத் தள்ளிப்போடுங்கள்!

2008-04-26T00:11:00.001+05:30

உபுண்டுவின் புதிய பதிப்பான 8.04 தற்போது வெளிவந்துவிட்டது.

அவசியமான சிறப்பான பல மேம்பாடுகளுடன் இப்புதிய பதிப்பு உருவாக்கப்பட்டுள்ளது.

ஆனால் தமிழ்ப்பயனர்களான எம்மை இப்பதிப்பு ஏமாற்றிவிட்டது. தமிழ் எழுத்துக்கள் எந்த எழுத்துருவை மாற்றினாலும் தெளிவாகத்தெரியாத புது பிரச்சினை ஒன்று இப்பதிப்பில் இருக்கிறது.

பிரச்சினைக்கான காரணத்தைக் கண்டறிவதில் தீவிர ஈடுபாடு காட்டி வருகிறோம்.

காரணம் கண்டறியப்பட்டு தீர்வு கண்டடையப்பட்டதும் தமிழப்பயன்பாட்டுக்கு ஏற்றவண்ணம் இப்புதிய பதிப்பினை உங்களுக்காக மாற்றியமைத்துத்தரும் வகையில் புதிய தபுண்டு வெளியாகும்.

அதுவரை தபுண்டு வெளியீடும் தள்ளிப்போடப்பட்டுள்ளது.

ஆகவே, தமிழ், இணையப்பயன்பாட்டை முக்கியமாகக்கருதும் தமிழ்ப்பயனர்கள் இப்போதைக்கு உங்கள் உபுண்டு இயங்குதளத்தை 8.04 இற்கு இற்றைப்படுத்த வேண்டாம் எனப்பரிந்துரைக்கிறேன்.

7.10 இப்போதைக்கு மிகச்சிறப்பாகப் பணியாற்றுகிறது.

இப்பரிந்துரை உபுண்டு குடும்பத்தின் ஏனைய வழங்கல்களான குபுண்டு, எடியுபுண்டு, எக்ஸ் உபுண்டு ஆகியவற்றுக்கும் பொருந்தி வருவதே.

இப்பிரச்சினை தொடர்பான தகவல்களும் மேலதிக செய்திகளும் பின்னூட்டம் வழியாக தொடர்ச்சியாக இற்றைப்படுத்தப்படும்.

பெங்குயின்கள் பறக்கப்பழகிய நாளொன்றில்...

2008-04-19T01:43:00.000+05:30

Youtube நிகழ்படங்களை மேசைத்தளத்துக்குக் கொண்டுவரும் Totem Plugin

2008-04-09T20:12:00.001+05:30

கூகிள் தனது app engine ஐ அறிவித்திருக்கிறது. கணினி வலையமைப்புக்களின் போக்கு அடுத்தடுத்த கட்டங்களுக்கு நகர்கிறது. வலைப்பக்கங்கள் செயலிகளாக மாறிக்கொண்டிருக்க்கின்றன. ஆனால் அதே நேரத்தில் உங்கள் கணினிச்செயலிகள் வலையோடு தம்மை இறுகப்பிணைத்துக்கொள்ளவும் ஆரம்பித்துவிட்டன.

இந்த அடிப்படையில் அண்மையில் வெளிவந்த க்னோம் 2.22 மேசைச்சூழலின் புதிய முன்னேற்றங்களில் ஒன்றுதான் இந்தச் சொருகுபொருள் (plugin).

உபுண்டு, ஃபெடோரா போன்ற வழங்கல்களில் இயல்பிருப்பாக வந்து தொலைக்கிறது என்பதைத்தாண்டி இந்த டோட்டம் இயக்கியை நான் பாட்டுக்கேட்கவோ படம் பார்க்கவோ பயன்படுத்துவதில்லை.

ஆனால் இந்த youtube சொருகுபொருளோடு தன்னைக்கொஞ்சம் திரும்பிப்பார்க்க வைத்திருக்கிறது totem.

உங்கள் totem player இனை திறந்து வைத்துக்கொண்டு அதில் youtube நிகழ்படங்களைத்தேடி, அதிலேயே பார்க்கக்கூடிய வசதியை இது தருகிறது. கூடவே related videos, search results எல்லாவற்றையும் சிறு படங்களாகப் பக்கப்பட்டையில் காண்பிக்கிறது.

உலாவியைப்பயன்படுத்தி youtube தளத்திற்குப்போய் படம்பார்ப்பதை விட இந்த வழிமுறை கொஞ்சம் ஆர்வமூட்டும்படியாக இருப்பதென்னவோ உண்மைதான்.
கூடவே வலைச்செயலிகளை விட, ஒரு மேசைத்தள media player என்ற வகையில் பெறக்கூடிய கூடுதல் வசதிகளையும் பெற முடிகிறது.

இயல்பிருப்பாக வரும் சொருகுபொருளில் வழுக்கள் உண்டு. வழு நீக்கப்பட்டு மேம்படுத்தப்பட்ட இந்தச்சொருகினை பெற்றுச் சொருகிக்கொள்ளுங்கள்.

இம்மென்பொருள் கட்டற்றது. பைத்தான் மொழியில் எழுதப்பட்டது.

இதனை மேலும் சீர்படுத்தச் சில யோசனைகள்:

1. youtube மட்டுமல்லாது ஏனைய நிகழ்படப்பகிர்வுச் சேவைகளையும் உள்ளடக்கலாம்.

2. youtube இனது சொல்திருத்தியைப் பயன்படுத்ததக்கதாக்கலாம்.

3. தமிழில் "தமிழ்" என்று தேடினால் "tamil", "thamiz" போன்ற தேடல் முடிவுகளையும் தரக்கூடியவண்ணம் மாற்றியமைக்கலாம்.

4. தரவிறக்க வசதியினைச் சேர்க்கலாம்.

5. நேரடியாக எமது நிகழ்படங்களைத் தரவேற்றும் வசதி இருந்தால் சிறப்பு.

6. பின்னூட்டங்களைப்படிக்க, அனுப்பக்கூடிய வசதி.

இந்த வசதிகளை வழங்க பகிர்வுத்தளங்களின் API ஒத்துழைக்கவேண்டும்.

முயன்றுபாருங்கள்.

புதிய க்னோம் தற்போது புதிதாக வந்த வழங்கல்களில் காணப்படுகிறது. அடுத்து வரும் உபுண்டுவும் இதனையே கொண்டிருக்கிறது.

பாலுறவுக்கு ஒரு பயன்மிகு மென்பொருள் - Cycle

2008-03-29T20:21:00.000+05:30

முதல் "மாதப்போக்கினை"(menstruation) விரைவில் எதிர்கொள்ளவுள்ள, எதிர்கொண்டுவிட்ட பெண்களுக்கு உதவக்கூடிய மென்பொருள்(Software) இது. அதிலும் குறிப்பாக அவர்கள் ஆண் பாலுறவுத் துணைவர்களைப்(sex partners) பெற்றிருக்கும் நிலையில் இம்மென்பொருள் மிகவும் பயன் தரக்கூடியதாக இருக்கும்.

மாதந்தோறும் மாதப்போக்கு ஆரம்பிக்கும் நாட்கள், கருத்தடை மருந்துகளை உபயோகிக்கும் நாட்கள் போன்ற உள்ளீடுகளைக்கொண்டு இம்மென்பொருள் எதிர்வுகூரல்களைச் செய்கிறது.

இம்மென்பொருளின் பெயர்

கருவுற விரும்புபவர்கள் சேர்க்கை(intercourse) கொள்ளக்கூடிய நாட்களையும், கருவுறாமல் தவிர்க்கக்கூடிய நாட்களையும் பருமட்டாகக் கணக்கிட்டு அறிவிப்பதுடன், குழந்தை பெற விரும்பும் பட்சத்தில் குழந்தையின் பிறக்கும் திகதியை தீர்மானிக்கக்கூடிய, அதற்கான சேர்க்கை நாளைக் கணக்கிடக்கூடிய வசதிகளையும் இது தருகிறது.

கருவுறும் (அல்லது கருவுறா) நாட்களைக் கணக்கிடுவதற்கு பல முறைவழிகள் உண்டு. அதில் நாட்காட்டி முறை (Calendar-based method) பிரபலமானது.

(நாட்காட்டி முறை தொடர்பான மேலதிக விளக்கங்களுக்கு இங்கே செல்லுங்கள்)

கருவுற விரும்புபவர்கள் சரியான நாட்களைத் தேர்ந்தெடுத்துக்கொள்ள இது மிகவும் பயன்படும்.

கருவுற விரும்பாதவர்களுக்கு ஏனைய கருத்தடை முறைகளோடு ஒப்பிடும்போது நாட்காட்டி முறை அவ்வளவு நம்பத்தகுந்ததல்ல. ஆனாலும் மிக அடிப்படையான ஒரு முறை என்ற அளவில் பரவலாகப் பயன்படுத்தக்கூடியதாக இருக்கிறது. (மற்றைய கருத்தடை வழிகள் எல்லோருக்கும் தடையின்றிப் பெறத்தக்கதாக எல்லா நேரத்திலும் இருந்துவிடுவதில்லை)

இம்மென்பொருளின் கணிப்பீடுகள் மிகவும் பருமட்டானவை. இதனை நூறுவீதம் நம்ப வேண்டாம். 'அங்கீகரிகப்பட்ட' உறவில் சேர்ந்து வாழ்பவர்கள் கருவுற விரும்பாவிடில் இம்மென்பொருளின் எதிர்வுகூரல் தவறும் பட்சத்திலும் கூட மாற்று வழிகளை இலகுவில் பெற முடியும். ஏனையவர்கள் மிகவும் அவதானமாக இருக்கவும்.

இதனைப்பயன்படுத்தும் வழிமுறைகள் மிக எளிமையானவை.

ஒவ்வொரு மாதத்திலும் மாதப்போக்கு ஆரம்பிக்கும் நாளை இதிலுள்ள நாட்காட்டியில் சொடுக்கிக் குறித்து வைத்துக்கொள்ளுங்கள். ஆகக்குறைந்தது ஆறு மாத காலத்துக்கு குறித்து வைக்க வேண்டும். கருத்தடை மருந்து பயன்படுத்துபவர்கள் அந்தத் தகவலையும் குறித்து வைக்கக்கூடிய வசதிகள் உண்டு.

இவ்வாறு குறித்து வைத்ததும் கருவுறக்கூடிய நாட்கள் பச்சை நிறத்தில் காண்பிக்கப்படும். கருவுறா நாட்கள் மெல்லிய brown நிறத்தில் காண்பிக்கப்படும்.

ஏனைய எதிர்வுகூரல்கள் கணிப்பீடுகளைப் பெறும் வழிமுறைகள் மென்பொருளின் உதவிக்குறிப்புக்களில் விளக்கப்பட்டுள்ளது.

பலர் பயன்படுத்தும் கணினிகளில் உங்கள் சொந்தத் தரவுகளைக் கடவுச்சொல் கொடுத்து பூட்டி வைத்துக்கொள்ள முடியும்.

மென்பொருள் பைத்தன் மொழியில் wxpython பயன்படுத்தி எழுதப்பட்டுள்ளது.
முற்றிலும் கட்டற்ற மென்பொருள்
க்னூ/லினக்சில் பிரச்சினைகள் எதுவுமின்றி இயங்கும்.

மென்பொருளைப்பெற்றுக்கொள்ள இங்கே செல்லுங்கள்.

டெபியன்/உபுண்டு இயங்குதளங்களில்
apt-get install cycle ன்ற ஆணையை வழங்கி நிறுவிக்கொள்ளலாம்.

கருவுறுதல், மாதப்போக்கு தொடர்பான மருத்துவ அறிவுள்ளவர்கள் இங்கே சொல்லப்பட்ட தகவல்களில் தவறெதுவும் இருந்தால், இம்மென்பொருள், நாட்காட்டி முறை ஆகியவற்றைப்பற்றிய மேலதிக தகவல்களைப் பகிர்ந்துகொள்ள விரும்பினால் இங்கே பின்னூட்டமிட்டு உரையாட முன்வாருங்கள்.

பொன்விழி தமிழ் ஒளிசார் எழுத்துணரி க்னூ/லினக்சில்! -Tamil OCR on GNU/Linux

2008-03-02T04:20:00.001+05:30

நீண்டகாலத்துக்கு முன்பே வெளிவந்ததொன்றாக இருந்தபோதும் நானறிந்தவரை தற்போதும் ஓரளவு வேலை செய்யக்கூடிய நிலையிலிருக்கும் ஒரேயொரு ஒளிசார் எழுத்துணரி (OCR) பொன்விழி தான்.

தமிழ் விக்கிபீடியாவில் தமிழ்க் கணிமையின் வரலாற்றினைப் பதிவு செய்யுமுகமாகக் காலக்கோடொன்றினை உருவாக்கும் பணிகளுக்காக இணையத்தில் தகவல்தேடிக்கொண்டிருந்தபோது. இந்தப்பொன்விழியை மறுபடி ஒருமுறை தற்செயலாகச் சந்திக்க நேர்ந்தது.

பொன்விழி ஆரம்பத்தில் நிறையப்பணத்துக்கு விற்கப்படதாக அறிகிறோம். பின்னர் சிடாக் மென்பொருள் தொகுப்பு இறுவட்டில் இது இலவசமாக வழங்கப்பட்டது.

தற்போதும் இது மூடிய மூல மென்பொருளே. இதன் உரிம ஒப்பந்தம் குறித்து நான் பயன்படுத்தும் பதிப்பில் எந்தத்தகவலும் இல்லை.

ஆனால் எரிச்சல் என்னவென்றால் இம்மென்பொருள் வின்டோசுக்கு மட்டுமே.

சரி வந்தால் வா போனால் போ என்று வைன் (WINE) பயன்படுத்தி இதனை எனது க்னூ/லினக்சில் நிறுவிப்பார்க்கலாம் என்று முயன்றபோது, எந்தப்பிரச்சினையும் இல்லாமல் அழகாக நிறுவிப் பயன்படுத்தக்கூடியதாக இருந்தது.

ஆனால் சற்றே வேகம் குறைவு போல் தோன்றுகிறது. வின்டோசில் இதனை நான் பயன்படுத்திப்பார்த்ததில்லை என்பதால் வேகத்தை ஒப்பிட முடியவில்லை.

வைன் கொண்டு பொன்விழியை நிறுவியபின் அதனோடு விளையாடிய அனுபவம் சுவையானது..

1.

xsane மென்பொருளைப்பயன்படுத்தி என்னிடமிருந்த புத்தகங்கள் இரண்டின் பக்கங்களை scan செய்துகொண்டேன்.

கவனிக்க : greyscale, 300 dpi

2.

Gimp மென்பொருளைப்பயன்படுத்தி அதனை 1 பிட் கறுப்பு வெள்ளைப்படமாக மாற்றி bmp வடிவில் சேமித்துக்கொண்டேன்.

3.

பொன்விழியை இயக்கி, அதன் பட்டியல் பட்டையில் ocr என்பதன்கீழ் recognize என்பதை தெரிவு செய்தேன்.
படத்திலுள்ள எழுத்தின் வடிவம் நேரானதா சரிந்ததா என்று கேட்டது. சரிந்தது என்று சொன்னேன். (அநேகமாக புத்தகங்கள் சரிந்த எழுத்தையே கொண்டிருக்கின்றன)

4.

புதிதாகத் திறந்த சாளரத்தில் என்னுடைய bmp படத்தினை திறந்து recognize என்பதைச்சொடுக்கியதும் நினைத்ததை விட வேகமாக படத்தின் எழுத்துக்களை பிரித்துணர்ந்து கொண்டது.

5.

பிரித்துணரப்பட்ட உரைப்பகுதியை rtf வடிவில் சேமித்துக்கொண்டேன்.
சேமித்த கோப்பினை பின்னர் abiword இல் திறந்து TAM_Maduram எழுத்துருவுக்கு மாற்றினேன். உரைப்பகுதி அழகாகத்தெரிந்தது. ஆனால் ^ குறியீடுகள் குழப்பம் விளைவித்தன.
find&replace கட்டளையைப்பயன்படுத்தி அந்தக்குறியீடுகளை ஒரேசொடுக்கலில் நீக்கிக்கொண்டேன்.

7.

உரைப்பகுதியை நகலெடுத்து சுரதாவின் பொங்குதமிழ் செயலியைப்பயன்படுத்தி ஒருங்குறிக்கு மாற்றிக்கொண்டேன்.

----

மேலே படங்களில் காட்டப்பட்ட உரைப்பகுதியை விடத் துல்லியமாக எழுத்துணரப்பட்ட கவிதைப்புத்தகம் ஒன்றின் பக்கத்தைக்காட்டும் படங்கள் இதோ.

----

எழுத்துணர்ந்து ஒருங்குறிக்கு மாற்றியபின் கிடைத்த வெளியீடுகள் இவை. மூலப் படங்களும் தந்திருக்கிறேன். ஒப்பிட்டுப்பாருங்கள். (எந்தவிதமான திருத்தங்களோ மாற்றங்களோ செய்யப்படவில்லை)

இறந்து போன மனைவியுடன் கணவணையும் சேர்த்து எரிக்கும்
கிட்டம் இரு வழிகளில் ஆபத்தானது, ஒன்று அவன் ஆண் என்ற
காரணத்தாலேயே அவ்வாறு செய்ய முடியாது. இரண்டாவதாக,
அவ்வாறு செய்தால் சாதி, வலுவான ஒரு உயிரை இழக்க தேரும்.
இவற்றை வீட்ட'£ல்', அவனுக்கு முடிவு கட்டும் இரண்டு இணக்க
மான வழிகள் உள்ளன. நான் இணக்கமான வழிகள் என்வ்'
குறிப்பிடுவதற்குக் காரணம். குழுவிற்கு அந்த ஆண் ஒரு பெரும்
சொத்தாக இகுப்பது தான்.

எதிரி முறுவலுடன்வந்தான்

மக்கள்முறுவலுடன்வரவேற்றனர்
மண்அங்குலம்அங்குலமாகப் பறிபோனது
எதிரிபுகழுரைகளுடன்வந்தான்
மக்கள்மகிழ்வுடன்வரவேற்றனர்
மண்ஏக்கர்ஏக்கராகப் பறிபோனது
எதிரி பரிசுகளோடு வந்தான்

மக்கள்நன்றியுடன்வரவேற்றனர்
மண்சதுரமைல்களாகப் பறிபோனது
மக்கள்விழிப்புற்றபோதுஎதிரி
முனறப்புடன்கையில்ஆயுதங்களுடன்
கவசவாகனமேறி வந்தான்

மக்கள்ஆயுதத்தரித்த போது
மண்ணைஅபகரித்தவனால்

மண்ணைஆளஇயலவில்லை
எதிரி போர்நிறுத்தம் பற்றிப் பேசினான்
அமைதி பற்றியும்

ஆயுதக்களைவு பற்றியும் பேசினான்
மக்கள்போரைநிறுத்திஅமைதி பற்றிப்பேச

ஆயுதங்களைக்களைந்த பின்
மண்மீண்டும் '

அங்குலம்அங்குலமாக

ஏக்கர்ஏக்கராகச்

ணுரமைல்களாப் பறிபோனது
ஷி-யின்இனிய சொற்கள்
வலியஆயுதங்கலிலுங் கொடியன

----

எழுத்துணரும் துல்லியத்தைக்கூட்டுவதற்கான வழிமுறைகள் பல உண்டு.
நூலில் பயன்படுத்தப்பட்டுள்ள எழுத்துரு துல்லியத்தைத் தீர்மானிக்கும் மிக முக்கியமான காரணியாகப்படுகிறது.

----

பொன்விழி தொடர்பான மேலதிக தகவல்களைப்பெறப் பின்வரும் தொடுப்புக்களைப் பார்வையிடுங்கள்.

http://thoughtsintamil.blogspot.com/2005/04/blog-post_111389400657312187.html

http://www.bhashaindia.com/Patrons/Review/TaSWTamilOCR.aspx?lang=ta

http://www.tamiloviam.com/html/Nettan31.Asp

http://www.tamilvu.org/tsdf/html/cwswoap1.htm

http://www.ildc.gov.in/GIST/htm/ocr_spell.htm

GNU/Linux - சொற்களின் அரசியல் / லினக்ஸ் இலவசமல்ல!

2008-01-27T21:31:00.000+05:30

மாயா தனது பதிவில் "இலவச மென்பொருட்கள்" என்ற சொல்லினைப் பயன்படுத்தியிருந்தார்.
அத்தோடு அங்கே தரப்பட்ட தொடுப்புக்களும் சொல்லவந்த கருத்தும் க்னூ/லினக்ஸ் சார்ந்ததாக அமைந்திருந்தது கவனத்தைக் கவர்ந்தது.

இந்தச் சொற்பயன்பாட்டின் குழப்பம், அதன் பாரதூர விளைவுகள் மிகப்பரவலானது. மாயா க்னூ/லினக்ஸ் தொடர்பான தனது நல்லபிப்பிராயத்தை வெளிப்படுத்தியிருப்பது மகிழ்ச்சியளிக்கும் விடயமே. சொற் பயன்பாட்டில் ஏற்பட்ட குழப்பம் முழுமையாக அவருடைய தவறல்ல. சரியான விளக்கங்களை கொடுக்க வேண்டியது நமது கடமை.

ஆங்கில மொழிப்பயன்பாட்டில் ஏற்பட்ட இந்த குழறுபடி தேவையில்லாமல் வீண் குழப்பங்களை நிறைய உருவாக்கிவிட்டது. நேரடியாகத் தமிழிலேயே நாம் இச்சொற்களை பயன்படுத்த முனைவோமானால் குழப்பங்கள் வராது.

மாயா கேட்டுக்கொண்டதற்கிணங்க இச்சொற்பயன்பாடு குறித்து சில விளக்கங்களைத் தருகிறேன்.

க்னூ/லினக்ஸ் பற்றிய உரையாடலின்போது பின்வரும் சொற்களை நாம் அவதானமாகக் கையாளவேண்டியிருக்கிறது. ஏனெனில் சிறு தவறும் பெரிய தத்துவ, கோட்பாட்டு குழப்பங்களை உண்டாக்கிவிடக்கூடியவை.

இலவச மென்பொருள் :

இந்தச்சொல் தன்னளவில் விளக்குவதைப்போன்றே இந்த வகை மென்பொருட்கள் விலை கொடுத்து வாங்கத் தேவையில்லாதன. எடுத்துக்காட்டாக ரியல் ப்ளேயரை நீங்கள் இணையத்தில் இலவசமாகத் தரவிறக்கிக்கொள்ளலாம். Winamp இலவசமாகக் கிடைக்கிறது. இவை எல்லாம் இலவச மென்பொருட்கள்.
மைக்ரோசொஃப்ட் நிறுவனம் கூட ஏராளமான இலவச மென்பொருட்களை வழங்குகிறது.

இலவச மென்பொருட்கள் எத்தகைய உரிம ஒப்பந்தத்தோடும் வெளிவரலாம் (Lisence Agreement). அவை உங்களை உளவு பார்க்கலாம். வின்டோசில் மட்டுமே கட்டாயம் பயன்படுத்தப்பட வேண்டும் என்று கட்டுப்பாடு விதிக்கலாம். உங்கள் வலைத்தளத்தில் ஏற்றி வைத்து மற்றவர்களோடு பகிரக்கூடாது என்று கட்டுப்படுத்தலாம். பெரும்பாலும் இவை இப்படித்தான் வெளிவருகின்றன.

அனுபவத்தில் இலவச மென்பொருட்கள் ஆபத்தானவையாகவே இருக்கின்றன. எந்தவொரு இலவச மென்பொருளும் (கட்டற்ற இலவச மென்பொருள் அல்லாதவை) ஏதோ ஒரு விதத்தில் உங்கள் சுதந்திரங்களைக் கட்டுப்படுத்துபவையாக உளவறிபவையாகவே இருக்கின்றன.

நச்சுநிரல்கள் (viruses) அனைத்துமே இலவச மென்பொருட்கள்.

இவற்றை ஆங்கிலத்தில் "Free ware" என்போம்.

தனியுரிமை மென்பொருள்

இவை ஒரு தனி நபருக்கோ நிறுவனத்திற்கோ தனியுரிமையானவை. இம்மென்பொருள் தொடர்பான எல்லா உரிமையும் அவர்களுக்கே உரியதாக இருக்கும். இவற்றை அவர்கள் சில கட்டுப்பாடுகளுடன் நீங்கள் பயன்படுத்த அனுமதிப்பர்.

தனியுரிமை மென்பொருட்கள் காசுகொடுத்து வாங்கப்பட வேண்டியனவாக இருக்கும். அல்லது அவை இலவச மென்பொருட்களாக இருக்கும்.

ஆப்பிள் மாக்கின்டோஷ் இயங்குதளம் ஒரு தனியுரிமை மென்பொருள். இதனை நீங்கள் காசு கொடுத்து வாங்க வேண்டும். "win zip" ஒரு தனியுரிமை மென்பொருள் ஆனால் காசுகொடுத்து வாங்கத்தேவயில்லை. இலவசமாக வழங்கப்படுகிறது. இலவச மென்பொருள்.

பெரும்பாலும் தனியுரிமை மென்பொருட்கள் தமது உரிம ஒப்பந்தத்தில் தாம் உங்கள் மீது விதிக்கும் கட்டுப்பாடுகளை மிகத்தெளிவாகவே வரையறுப்பர். என்ன, நாங்க கேட்டுக்கேள்வி இல்லாமல் License agreement இனை next கொடுத்து கண்ணை மூடிக்கொண்டு தாண்டிப்போவதால் இந்தக் கட்டுப்பாடுகளை பெரும்பாலான வேளைகளில் அறிந்திருப்பதில்லை.

அந்த ஒப்பந்தங்கள் எல்லாம் பொதுவில் சொல்வது என்ன என்றால், இந்த மென்பொருள் அவர்களுக்கே சொந்தமானது, அதனை பயன்படுத்துவதற்கான அனுமதியை நீங்கள் சில கட்டுப்பாடுகளுடன் பெற்றுக்கொண்டிருக்கிறீர்கள் என்பதைத்தான்.

விலை கொடுத்து வாங்கினால் என்ன, இலவச மென்பொருளாய் இருந்தல் என்ன இந்த ஒப்பந்தங்களின் படி அவை தனியுரிமை மென்பொருட்களே ஆகும்.

இவற்றை நாம் ஆங்கிலத்தில் "proprietary Software" என்போம்.

மூடிய மூல மென்பொருள் / மூடிய ஆணைமூல மென்பொருள்

கடந்த சில காலங்களுக்கு முன் வெற்றிகரமான மென்பொருள் வணிக உத்தியாக இத்தகைய மென்பொருட்கள் கருதப்பட்டு வந்தன.
அதனால் இவை பிரபலமானவையாகவும் இருக்கின்றன.

இந்த மென்பொருட்களை உருவாக்குபவர்கள்/ உருவாக்கும் நிறுவனம் மென்பொருளின் மூல நிரலை/ஆணைமூலத்தை (source code) மிக மிக இரகசியமாக பேணுவதோடு தான் மறைத்து வைத்துக்கொள்ளும். மென்பொருள் எவ்வாறு எழுதப்பட்டுள்ளது, அது எவ்வாறு இயங்குகிறது என்பதைப்பற்றி எல்லாம் பயனர் அறிந்துகொள்ளாமல் பார்த்துக்கொள்வார்கள். பயனர்கள் மென்பொருளை பயன்படுத்த மட்டுமே அனுமதிக்கப்படுவர் என்பதே இதன் மறைமுக விளைவு.

ஒரு நிறுவனம், குறிப்பிட்ட பணி ஒன்றைச்செய்யும் மென்பொருளை நேரமும் பணமும் செலவழித்து உருவாக்கும்போது, அதன் இயக்க முறைகளை, ஆணைமூலத்தினை மற்றவர்கள் இலகுவில் பார்த்து அறிந்து தாமும் போட்டியாக மென்பொருட்களை உருவாக்கி விடாமல் தடுப்பதற்கு இம்முறை பெரிதும் உதவுகிறது.

அநேகமாக இன்று கற்பிக்கப்படும் மென்பொருட் கட்டுமான, வடிவமைப்புக் (Software architecture and Design) கோட்பாடுகள் மூடிய ஆணைமூல மென்பொருள் விருதிக்கானவையே

இலவச மென்பொருட்களும் , காசு கொடுத்து வாங்க வேண்டிய மென்பொருட்களும் மூடிய மூலமாக இருக்கலாம்.

நல்ல எடுத்துக்காட்டுக்களாக, blogger, yahoo services, opera browser, google, MS Office போன்றவற்றைக் குறிப்பிடலாம்.

இதனை ஆங்கிலத்தில் "closed source software" என்போம்.

திறந்த மூல மென்பொருள் / திறந்த ஆணைமூல மென்பொருள்

இது மிகவும் அவதானமாகக் கையாள வேண்டிய சொல்.

வெவ்வேறு அர்த்தங்களில் வெவ்வேறு தேவைகளுக்காக இச்சொல் பயன்படுத்தப்படுகிறது.

எது திறந்த ஆணைமூல மென்பொருள்?

இதற்கு இரு வேறு பதில்கள் இருக்கின்றன.

1. OSI நிறுவனத்தால் அங்கீகரிக்கப்பட்ட உரிம ஒப்பந்தத்தைக்கொண்ட மென்பொருட்கள்.

2. மென்பொருளின் ஆணைமூலத்தைக் கிடைப்பில் வைத்திருக்கும் மென்பொருள்.

இந்த இருவேறு பதில்களுக்குரிய மென்பொருட்களும் இன்று இணையம் பூராகவும் திறந்த ஆணைமூல மென்பொருள் என்ற பெயரில் பரந்து கிடக்கின்றன.

இச்சொல் பெரும்பாலும் ஏமாற்று வேலையாகவே பயன்படுத்தப்படுகிறது.

எடுத்துக்காட்டாக மைக்ரோசொஃப்ட் நிறுவனம் கூட திறந்த ஆணைமூலம் என்ற சொல்லைப் பயன்படுத்துகிறது. (இந்தத் தொடுப்பைப் போய்ப்பாருங்கள். ச்சும்மா அதிர்ந்து போவீர்கள்!! ) ஆம். அவர்கள் சில மென்பொருட்களுக்கு ஆணைமூலத்தைத் திறந்து வைத்துவிட்டு திறந்த ஆணைமூலம் என்கிறார்கள். இது ஒரு ஏமாற்று நாடகம். மூடிய ஆணைமூல வடிவம் தொடர்ச்சியான தோல்வியைப் பல வழிகளிலும் சந்தித்து வருவதால், தமது நலன்களைக் காத்துக்கொண்டு அதனை எதிர்கொள்ள அவர்கள் இந்த ரெண்டும் கெட்டான் சொல்லைப் பயன்படுத்துகிறார்கள்.

அவர்கள் திறந்து வைத்திருக்கும் மூல நிரலை நீங்கள் பார்க்க முடியும் . ஆனால் சுதந்திரமாகப் பயன்படுத்த முடியாது. அதற்கு ஏகப்பட்ட கட்டுப்பாடுகளை விதிக்கும் உரிம ஒப்பந்தத்தை நீங்கள் ஏற்றுக்கொள்ள வேண்டும்.

மூடிய ஆணை மூல மென்பொருட்கள் உறுதியற்றவை, பாதுகாப்பில் மிகப்பலவீனமானவை, வினைத்திறன் குறைந்தவை என்று இன்று பரவலாக ஏற்றுக்கொள்ளப்பட்டுவிட்டதால், தமது மென்பொருள் சிறந்தது, பாதுகாப்பானது, வினைத்திறன் கூடியது என்பதை விளம்பரப்படுத்த திறந்த ஆணைமூலம் என்கிறார்கள்.

OSI நிறுவனம் இன்று கேலிக்கூத்தாகிப்போய்விட்டது.

வேறு பலர் "திறந்த ஆணைமூலம்" என்ற சொல் பிரபலமாகிவிட்டதால், விளம்பரத்தன்மை வாய்ந்ததாக இருப்பதால் எந்தக் கேள்வியும் சிந்தனையும் இல்லாமல் தமது மென்பொருட்களைத் திறந்த ஆணைமூலம் என்கிறார்கள்.

மூடிய ஆணைமூல மென்பொருள் விருத்தி முறை தோல்விகண்டுவிட்டதால் இன்று திறந்த ஆணைமூல விருத்தி முறை பரவலாக ஏற்றுக்கொள்ளப்பட்டுள்ளது.
அந்த அடிப்படையில் இச்சொல்லைப் பயன்படுத்தலாமே ஒழிய இச்சொல் அரசியல் ரீதியில் அர்த்தமற்றது.

இச்சொல்லைப் பயன்படுத்துவதைத் தவிர்ப்பது நல்லதென நான் பரிந்துரைக்கிறேன்.

இதனை ஆங்கிலத்தில் "Open Source Software" என்பர்

கட்டற்ற மென்பொருள்

(சுதந்திர மென்பொருள் / தளையறு மென்பொருள் / விடுதலை மென்பொருள் என்றும் சொல்லலாம்)

இவ்வகையில் அடங்கும் மென்பொருட்களே அரசியல் ரீதியில் மிக முற்போக்கானவை.

மற்றைய வகை மென்பொருட்களிலிருந்து கட்டற்ற மென்பொருளை வேறுபடுத்துவது அதன் உரிம ஒப்பந்தமேயாகும்.

குறித்த மென்பொருளின் உரிம ஒப்பந்தம் பின்வரும் சுதந்திரங்களை உங்களுக்குத் தருகிறதா என்று பாருங்கள்.

சுதந்திரம் 0: எந்த நோக்கத்துக்காகவும் மென்பொருளை இயக்குவதற்கான சுதந்திரம்.

சுதந்திரம் 1: மென்பொருள் எவ்வாறு இயங்குகிறது என்பதைக் கற்றுக்கொள்வதற்கும், உங்கள் தேவைகளுக்கேற்றபடி அதனை உள்வாங்கிக்கொள்வதற்குமான சுதந்திரம் (ஆணைமூலம் கிடைக்கக்கூடியதாக இருப்பது இதற்கு முன்நிபந்தனையாகும்)

சுதந்திரம் 2: மென்பொருளின் படிகளை/நகல்களை/பிரதிகளை மீள் விநியோகம் செய்வதற்கான சுதந்திரம். இதன்மூலம் நீங்கள் உங்கள் அயலவர்களுக்கு உதவ முடியும்.

சுதந்திரம் 3: மென்பொருளை மேம்படுத்துவதற்கும், திருத்தியமைப்பதற்கும் அவ்வாறு திருத்தியமைக்கப்பட்ட மென்பொருளை மக்கள் மத்தியில் விநியோகிப்பதற்குமான சுதந்திரம். இதனால் முழுச் சமுதாயமும் பயன்பெற முடியும். (ஆணைமூலம் கிடைக்கக்கூடியதாக இருப்பது இதற்கு முன்நிபந்தனையாகும்)

இந்தச் சுதந்திரங்களை ஒப்பந்தம் உங்களுக்குத் தருமாயின் அது ஒரு கட்டற்ற மென்பொருளாகும்.

இதில் மென்பொருளின் விலை பற்றி எங்குமே குறிப்பிடப்படவில்லை.

ஆம். கட்டற்ற மென்பொருளை இலவசமாகத்தான் வழங்க வேண்டும் என்ற கட்டாயம் எப்போதும் இல்லை. நீங்கள் தாராளமாகக் கட்டற்ற மென்பொருளைக் காசுக்கு விற்கலாம். எந்த தடையும் இல்லை. காசுக்கு விற்கப்படுவதும் கட்டற்ற மென்பொருளே. மேற்கண்ட சுதந்திரங்களை அது பயனருக்கு உறுதிப்படுத்தினால் போதுமானது.

இந்த இடத்திலேயே மாயாவின் பதிவில் "லினக்ஸ் ஒரு இலவச மென்பொருள் இல்லையா?" என்று எழுப்பப்பட்ட கேள்விக்கு பதிலளிக்க வேண்டியுள்ளது.

லினக்ஸ் கரு என்பது எப்போதும் விற்கப்படக்கூடாதது அல்ல.

எடுத்துக்காட்டாக லினக்ஸ் கருவினைக் கொண்டிருக்கும் எத்தனையோ இயங்குதளங்கள் காசுக்கு விற்கப்படுகிறது. அப்போது நீங்கள் அங்கே உள்ளடக்கப்பட்டுள்ள லினக்ஸ் கருவினைக் காசு கொடுத்தே வாங்க வேண்டும். மிக நல்ல எடுத்துக்காட்டு நீங்கள் நன்கறிந்த ரெட்ஹாட் ( red hat GNU/Linux)
இதன் Enterprise edition இலவசமல்ல. ஆனால் அது கட்டற்ற மென்பொருள்.

வேறும் சில கட்டற்ற மென்பொருட்கள் இலவசமல்ல.

கட்டற்ற மென்பொருட்கள் பொதுவாகப்பயன்படுத்தும் நன்கறியப்பட்ட உரிம ஒப்பந்தம் GPL ஆகும் (க்னூ பொதுமக்கள் உரிமம்) இது தவிர வேறு பல உரிமங்களும் உண்டு.

கட்டற்ற மென்பொருட்கள் ஆங்கிலத்தில் Free software எனத் துரதிஷ்ட வசமாகப் பயன்படுத்தப்படுவதே இந்தக் குழப்பங்களுக்கெல்லாம் காரணம் உண்மையில் இந்தச்சொல் freedom software என்ற அர்த்தத்திலேயே பயன்படுத்தப்படுகிறது.

கட்டற்ற மற்றும் திறந்த ஆணைமூல மென்பொருள்

இது அடிக்கடிச் சண்டைபோட்டுக்கொண்டிருக்கும் இரு முகாம்களைச் சமாளித்து ஒன்றிணைப்பதற்கான முயற்சியாகக் கண்டுபிடிக்கப்பட்ட சொல்.

பல திறந்த ஆணைமூலக் காரருக்கு தம்மைக் கட்டற்ற மென்பொருள் என்று மட்டும் சொல்வது பிடிக்காது. பல கட்டற்ற மென்பொருள் காரருக்குத் தம்மைத் திறந்த ஆணைமூலம் என்று சொல்வது பிடிக்காது.

கட்டற்ற மென்பொருட்கள் எல்லாம் திறந்த ஆணைமூலமே அதில் பிரச்சினை இல்லை. சில திறந்த ஆணைமூல மென்பொருட்களும் கட்டற்றவை. எனவே இருவரும் ஓர் உடன்பாடு கண்டு இந்தச் சொல்லைப் பயன்படுத்துகின்றனர்.

மேற்சொன்ன நான்கு சுதந்திரங்களைக் கொடுக்காத திறந்த ஆணைமூல மென்பொருட்கள் இந்த வகைக்குள் அடங்காது.

மிக மிக மோட்டுத்தனமான எளிமையாகச்சொன்னால் (;-), கட்டற்ற மென்பொருட்களும் , நல்ல திறந்த ஆணைமூல மென்பொருட்களும் இந்த வகைக்குள் அடங்கும். கெட்ட திறந்த ஆணைமூல மென்பொருட்கள் இந்த வகைக்குள் அடங்காது.

ஆங்கிலத்தில் இது FOSS எனப்படுகிறது. ( Free and Open Source Software)

பிரான்சியர்கள் இதனை FLOSS என்கிறார்கள். அதாவது Free/Libre/Open Source Software.

லினக்ஸ்

இதுவும் மிகத்தவறாகப் பயன்படுத்தப்படும் சொற்களிலொன்று.

உண்மையில் லினக்ஸ் என்பது இயங்குதளத்தின் அடிப்படையாய் அமையும் கருனி யாகும் (kernel)

Linus என்பவர் இக்கருனியை உருவாக்கினார். கருனி இயங்குதளமொன்றின் இன்றியமையாத கூறாகும். இயங்குதளத்தில் வேறு இன்றியமையாத பாகங்களும் உண்டு.

இன்று நாம் பொத்தாம்பொதுவாக லினக்சஸ் என்று சொல்லும் இயங்குதளங்கள்(Operating Systems) லினக்ஸ் கருனியினையும் மிகுதி GNU பாகங்களையும் கொண்டிருக்கிறது.

GNU என்பது எண்பதுகளில் ரிச்சர்ட் ஸ்டால்மன் என்பவரால் உருவாக்க முயலப்பட்ட முழுமையான கட்டற்ற இயங்குதளமாகும். அவ்வியங்குதளத்தின் கருனியாக லினக்ஸ் பரவலக ஏற்றுக்கொள்ளப்பட்டுள்ளது. லினக்ஸ் இல்லாத க்னூ இயங்குதளங்களும் உண்டு. எடுத்துக்காட்டாக Nexanta வினை சொல்லலாம். இது தனது கருனியாக Open solaris இனைக் கொண்டிருக்கிறது.

ஆகவே இக்கட்டற்ற இயங்குதளத்தினை லினக்ஸ் என்று சொல்வது மிகத்தவறனதாகும். GNU/Linux என்றே சொல்ல வேண்டும்.

லினக்ஸ் என்று பரவலாக அறியாமை கரணமாகவே பயன்படுத்தப்படுகிறது.

இப்பதிவில் சொல்லப்பட்ட விடயங்கள் தொடர்பான மேலதிக விளக்கங்கள் தேவைப்பட்டால், சந்தேகங்கள் இருந்தால், முரண்பாடுகள் இருந்தால், பின்னூட்டமிடுங்கள். பின்னூட்டங்கள் வழியாக இவை தொடர்பான கேள்வி-பதில் ஆவணம் ஒன்றை உருவாக்கலாம்.

செல்பேசி - GNU/Linux - புளூட்டூத் - சிறு விளையாட்டு

2007-12-10T00:16:00.000+05:30

கிருஷாந்தன் வாங்கித்தந்த புதிய செல்பேசியோடு எனது வாழ்க்கையில் முதன்முறையாக புளூட்டூத் வரவளிக்கிறது.

புளூட்டூத் செல்பேசியை வைத்துக்கொண்டு என்ன விளையாட்டு விளையாடலாம் என்று இணையத்தைக்குடைந்து தேடியபோது சுவாரஸ்யமான இந்தச்சிறு மென்பொருள் கிடைத்தது.

கோப்புப்பரிமாற்றம், குரல் பரிமாற்றம் என்பதையெல்லாம் தாண்டி, புளூட்டூத்தின் பாரிய குறைபாடொன்றை அழகாகப்பயன்படுத்தி இந்த மென்பொருள் செய்யப்பட்டிருக்கிறது.

இது என்ன செய்யும்?

நீங்கள் அலுவலகத்தில் கணினி முன் இருக்கிறீர்கள். அவசரமாக சிறுநீர்கழிப்பதற்காக எழுந்து போய்விடுகிறீர்கள். நீங்கள் எழுந்து அப்பால் சென்று விட்டீர்கள் என்பதை உங்கள் கணினி உணர்ந்து தன்னை பூட்டி வைத்துக்கொண்டால் எவ்வளவு நன்றாக இருக்கும்?

இந்த உதவியைத்தான் Blueproximity என்ற இம்மென்பொருள் செய்கிறது.

இம்மென்பொருளை உங்கள் GNU/Linux கணினியில் நிறுவி, உங்கள் குறித்த செல்பேசியின் புளூட்டூத் முகவரியை கண்காணிக்குமாறு அமைத்துக்கொண்டீர்களானால் சரி. உங்கள் செல்பேசி உங்களோடு அப்பால் போகும்போது கணினித்திரை தானாகப் பூட்டப்படும். எவரும் கணினியைப் பயன்படுத்த வேண்டுமானால் கடவுச்சொல் தெரிந்திருக்கவேண்டும்.

நீங்கள் அருகில் வந்தவுடன் திரை தானாகவே திறந்துகொள்ளும். நீங்கள் எந்தப்பிரச்சினையும் இல்லாமல் தொடர்ந்து வேலை செய்யலாம்.

எவ்வளவு தூரம் போனதும் திரையைப் பூட்ட வேண்டும் என்பதை நீங்கள் உங்கள் விருப்பப்படி அமைத்து வைத்துக்கொள்ளலாம்.

எப்படி இருக்கு?

புளூட்டூத் நிரலாக்கத்துக்கு மிகச்சிறப்பான இயங்குதளம் GNU/Linux. நீங்களும் இத்தகைய பல விளையாட்டுக்களை விளையாடிப்பார்க்கலாம்.

தற்போது பைத்தன் கணிமொழியையும் செல்பேசிகளின் புளூட்டூத் சேவைகளையும் வைத்து வேறென்ன விளையாடலாம் என்று பார்த்துக்கொண்டிருக்கிறேன்.

சுவையான தகவல்கள் இருந்தால் அடுத்தடுத்த பதிவுகளில் பகிர்ந்து கொள்ளலாம்.

Gutsy க்கான தபுண்டு வெளிவந்துவிட்டது

2007-11-12T03:52:00.000+05:30

தபுண்டு (தமிழ் உபுண்டு) (பார்க்க: முன்னைய வலைப்பதிவொன்று) பொதியின் Gutsy யுடன் ஒத்திசையும் பதிப்பை இன்றுமுதல் தரவிறக்கிக்கொள்ளலாம்.

புதிய பொதி தபுண்டு வலைமனையில் தரவேற்றப்பட்டிருக்கிறது.

பொதி, "tabuntu_7.10.1_i386" எனப் பெயரிடப்பட்டிருக்கிறது.

அளவு 4.1 MB.

நிறுவலில், பயன்பாட்டில் ஏற்படும் சிக்கலகளை, வழுக்களை உடனுக்குடன் எனக்கு அறிவிப்பதன்மூலம் மற்றவர்களுக்கு உதவுங்கள். தபுண்டு நிரலாக்கத்திலும் தபுண்டு செயற்றிட்டத்திலும் பங்கெடுக்க வாருங்கள்.

== என்ன புதுசு?==

இந்தத் தமிழ் உபுண்டு பதிப்பில் பாரிய மாற்றங்கள் பலவற்றைச் செய்வதாக உத்தேசித்திருந்தேன். நேரமின்மை காரணமாக அவ்வாறெதனையும் செய்து முடிக்க முடியவில்லை. 7.10.2 அல்லது 7.10.3 இல் திட்டமிட்டபடி பெரியளவான மாற்றங்கள் இருக்கும்.

இருந்தாலும் இந்தப்பதிப்பில் பல கவனிக்கத்தகுந்த மாற்றங்கள் உண்டு.

1. பொதிகள் அத்தனையும் கட்ஸி பொதிக்களஞ்சியத்திலிருந்து (Gutsy repositories) பெறப்பட்டு இற்றைப்படுத்தப்பட்டிருக்கின்றன.

2. m17n-contrib பொதி நீக்கப்பட்டுள்ளது. பதிலாக m17n தமிழ் உள்ளீட்டு முறைகள் தனியாக நிறுவப்படுகின்றன.

3. www.wsws.org போன்ற வலைத்தளங்கள் இன்னமும் பயன்படுத்திக்கொண்டிருப்பதால் tam-maduram ஆஸ்கி எழுத்துரு சேர்க்கப்பட்டுள்ளது.

4. பாமினி விசைப்பலகை வடிவத்தை பயன்படுத்துபவர்களுக்கான "பாலினி" தன்னியக்கமாக நிறுவப்படுகிறது.

5. குழப்பங்களைத் தவிர்க்குமுகமாக நீங்கள் பயன்படுத்தும் உபுண்டு பதிப்பைச் சோதனையிட்டுத் திருப்திகண்டால் மட்டுமே நிறுவல் தொடரும்படி வடிவமைக்கப்பட்டுள்ளது.

== என்ன குறை? ==

1. ஓப்பன் ஆபீசில் தமிழ் எழுத்துருவை இயல்பிருப்பாக்குவதற்கான வழிமுறை இன்னும் எனக்கு கண்டுபிடிக்க முடியாதிருப்பதால் இம்முறையும் அதே பழைய அரைகுறை முறை மூலமே இப்பணி செய்யப்படுகிறது.

2. scim மென்பொருள் ஏனைய மென்பொருட்களோடு சேர்ந்து இயங்கும் போது ஏற்படும் வேகக்குறைவு, முறிவு போன்றன தொடரக்கூடும். இதை சரிப்படுத்துவது scim மேநிலை தொழிநுட்பவியலாளர்களுடைய பணி.

3. திறந்த மூலமாக அறிவிக்கப்படாத நிலையிலேயே இம்முறையும் பாமினி, சூரியன், tam-maduram எழுத்துருக்கள் சேர்க்கப்பட்டுள்ளன.

4. நிறுவலின் ஆரம்பத்தில் இம்முறையும் உங்களைக்கேட்காமலே இடைமுகப்பின் எழுத்துருவை தபுண்டு மாற்றும். (அடுத்த பதிப்பில் சரி செய்து விடுகிறேன் அதுவரை இம்முறைப்பாட்டைச்செய்த பழனி ராஜா மன்னிக்கவும்)

5. தமிழ் விசை நீட்சி சேர்க்கப்படவில்லை. சில குழப்பங்கள் உண்டு. அடுத்த பதிப்பில் எதிர்பார்க்கலாம்.

== நன்றி ==

Mr. Palani Rajah
Mr. Sethuramalingam
Mr. Sri ramados
Mr. T.Vasudevan
Ven. Mettavihari
Mr. Ravishankar
All Ubuntu-tam group members
Google Search Engine

== ஆதரவு ==

தபுண்டு தொடர்பான உதவிகளுக்கும் ஆதரவுக்கும் இந்த வலைப்பதிவின் மூலமோ மின்னஞ்சல் மூலமோ உரையாடுங்கள்.

வரலற்றின் முப்பரிமாணம் / முப்பரிமாணப் படம் ( 3D Image) ஒன்றினை மிக எளிதாக உருவாக்குவது எப்படி?

2007-11-10T21:43:00.000+05:30

நிவேதாவின் வலைப்பதிவில் வரலாற்றின் முப்பரிமாண இயல்பு பற்றி உரையாடியதைத்தொடர்ந்து முப்பரிமாணத்தின் பால் ஆர்வம் ஏற்பட்டுப்போனது ;-)

== முப்பரிமாணப் படம் என்றால் என்ன? ==

(என் பழைய பதிவொன்றையும் பார்த்துவிடுங்கள் )

சாதாரண படங்கள் தட்டையானவை. இரு பரிமாணங்களைக் கொண்டவை. அவை நீளம், அகலம் ஆகியவை மட்டுமே. நேரில் பார்க்கும் காட்சிக்கும் படத்தில் காணும் காட்சிக்கும் இடையிலான பாரிய வித்தியாசம் இந்த முப்பரிமாணத்தோற்றம்தான். ஆழம், தூரம் போன்ற மூன்றாவது பரிமாணத்தை நாம் வெற்றுக்கண்களால் பார்த்து அனுபவிக்கலாம். படத்தில் முடியாது.

படத்தில் பொண்ணு மாப்பிள்ளைக்கு அருகில் நீங்கள் நின்றால், யார் முன்னுக்கு, யார் பின்னுக்கு நிற்கிறீர்கள் என்பதை சரியாகச் சொல்ல முடியாது. மாப்பிள்ளைக்கு முன்னால் நிற்கும்போது, சிலவேளை படத்தில் மாப்பிள்ளைக்கு அருகாக முட்டிக்கொண்டு நிற்பதுபோல தோன்றிச் சங்கடங்களும் ஏற்படும் (வாசிப்பவர் ஆணாக இருந்தால் உங்களுக்கு ஏற்றவாறு பால்மாற்றம் செய்துகொள்ளுங்கள்).

இந்த சிக்கல் எல்லாம் தட்டையான இருபரிமாணப்படங்களில் ஏற்படுவது. முப்பரிமாணப்படம் என்றால் மாப்பிள்ளைக்கும் உங்களுக்கும் இடையில் உள்ள தூர இடைவெளி நன்றாக விளங்கும்.

== முப்பரிமாணம் எப்படி உருவாகிறது? ==

எங்களுக்கு இரு கண்கள் இருப்பதால்தான் முப்பரிமாணத்தோற்றத்தினை நாம் பார்க்கிறோம். இருகண்களும் உண்மையில் ஒரே படத்தை எம் மூளைக்கு அனுப்புவதில்லை. ஒரு காட்சியின் வெவ்வேறுபட்ட கோணங்களில் எடுக்கப்பட்ட படங்களையே இரு கண்களும் மூளைக்கு அனுப்புகின்றன. மூளை அந்த இரு படங்களையும் ஒரே நேரத்தில் அனுபவிக்கும்போது முப்பரிமாணத்தோற்றம் உருவாகிறது.

செயற்கையாக நம் முப்பரிமாணத்தினை உருவாக்க வேண்டி வரும்போது, மூளையை சற்று ஏய்க்க வேண்டியுள்ளது. அதாவது, செயற்கையாக நாம் இரு கண்களுக்கும் வெவ்வேறு தகவல்களை வழங்கவேண்டும்.
அப்போதுதான் மூளை ஏமாந்து தான் முப்பரிமாணத்தோற்றத்தினைப்பார்ப்பதாக நினைத்துக்கொள்ளும்.

இப்படி இரு கண்களுக்கும் இருவேறுபட்ட படத்தகவல்களை வழங்கவென ஏராளமான தொழிநுட்பங்கள் இருக்கின்றன.

அவற்றுள் நம் வீட்டில் செய்துபார்க்க வசதியான எளிமையான தொழிநுட்பம், சிவப்பு- நீல கண்ணாடித்தொழிநுட்பம் தான்.

தொடர்ச்சியாக இரு சுட்டி விகடன் இதழ்கள் முப்பரிமாணப்படங்களுடனும் கண்ணாடியுடனும் வந்ததைத்தொடர்ந்து நானும் தம்பிமாரும் முப்பரிமாணப்படம் ஒன்றை உருவாக்குவது குறித்துத் தேடத்தொடங்கினோம்.

/* நீங்களும் சிவப்பு, cyan/green/blue கண்ணாடிகளை, பிளாத்திக்கு கண்ணாடிகளை பயன்படுத்தி இந்த கண்ணாடியை செய்துகொள்ளலாம் **/

சில அடிப்படைக் கோட்பாடுகளையும் செய்முறைகளையும் கற்றுக்கொண்ட பிறகு "Set" ஆகி செயலில் இறங்கினோம்.

பிரசன்னாவின் செல்பேசியில் கமரா உள்ளது. அதனைப்பயன்படுத்துவதாக முடிவு செய்தோம்.

பின்வரும் பொருட்களைத் தயார்படுத்தி வைத்துக்கொண்டோம்.

1. வெள்ளைக் காகிதம்
2. அடிமட்டம்
3. செல்பேசி
4. கணினி, க்னூ/லினக்ஸ் இயங்குதளம், கிம்ப் (GIMP) மென்பொருள்
5.bluetooth சாதனங்கள்
6. ஜெயா டீவி முன்னர் வழங்கிய சிவப்பு - நீல கண்ணாடி, சுட்டி விகடனோடு வந்த சிவப்பு-பச்சை கண்ணாடி

== படமெடுத்தல் ==

1. ஒரு வெள்ளைத்தாளில் நேர்கோடொன்றினைக் கீறி, அதில் அடிமட்டத்தினைப்பயன்படுத்தி 3 அங்குல இடைவெளியில் இரு குறுக்குக்கோடுகளை போட்டுக்கொண்டோம் (படத்தில் காட்டப்பட்டவாறு)

2..படமாக்கப்பட வேண்டிய காட்சியைத் தெரிவு செய்வதில் அனுபவத்தின் வழி சில உண்மைகளை உணர்ந்துகொண்டோம்.

அ. காட்சியில் எந்தப்பொருளும் அசையக்கூடாது. மனிதரை எடுப்பதானால் அசையாமலிருக்கும் வல்லமை கொண்டவர்களை தெரிவு செய்ய வேண்டும். (என்னைத் தெரிவு செய்தார்கள் :-))

ஆ. காட்சி சற்றே தூரமும் ஆழமும் கூடியதாக இருக்கவேண்டும். ஆகக்கிட்ட உள்ள பொருட்கள் தெளிவாகத்தெரியாது.

இ. போதிய வெளிச்சமும், பிரகாசமான காட்சிகளும் இருப்பது நல்லது.

3. காட்சியைப் படம்பிடிக்க வேண்டிய கோணத்தைத் தெரிவு செய்து அதில் சிறு மேசை ஒன்றினை வைத்தோம்.

4. மேசை மீது, கோடு வரையப்பட்ட வெள்ளைத்தாளை அசையாதவாறு பொருத்திக்கொண்டோம்.

5. தாளின் கோட்டில் சரியாக பொருந்தும்படி செல்பேசியை வைத்தோம். அதன் ஒரு விளிம்பினை முதலாவது குறுக்குக்கோட்டோடு சரியாக பொருந்தும்படி அமைத்துக்கொண்டோம். (அதாவதுங்க, சரியாக 3 அங்குல இடைவெளியில் சற்றும் பிசகாமல் இரண்டு படங்கள் வேண்டும். அதற்கான முன்னேற்பாடுகள்தான்)

6. வெற்றிகரமாக முதலாவது படத்தினை எடுத்தோம்.

7. எதையும் அசைக்காது, செல்பேசியை மட்டும் கிடைக்கோட்டின் வழி அசைத்து, மூன்றங்குல தூரத்தில் அமைந்த இரண்டாவது குறுக்குக்கோட்டோடு மறுபடி விளிம்பினைப் பொருந்தச்செய்தோம்.

8. இரண்டாவது படத்தினையும் வெற்றிகரமாகப் பிடித்துவிட்டோம்.

== கணினியில் ==

1. எடுத்த இரண்டு படங்களையும் கணினியில் சேமித்துக்கொண்டோம்.

2. இடதுபக்கம் எடுத்த படத்தை "இடம்.jpg" என்றும் , வலது பக்கம் எடுத்த படத்தை "வலம்.jpg" என்றும் பெயரிட்டுக்கொண்டோம்.

3. வலம்.jpg இனை இடதுசொடுக்கி gimp இல் திறந்துகொண்டோம்.

4. ctrl +l இனை அழுத்தி "layers" சாளரத்தை பெற்றுக்கொண்டோம்.

5. layers சாளரத்தைப் பயன்படுத்தி புதிய layer ஒன்றினை உருவாக்கினோம். ( ctrl + shift + n)

6. shift + b இனை அழுத்தி வண்ணம் நிரப்பும் கருவியினைப் பெற்றுக்கொண்டோம்.

7. சிவப்பு வண்ணத்தை தெரிவு செய்துகொண்டோம். (மிகச்சரியான சிவப்பு வண்ணத்தின் குறியீட்டெண் ff0000) படத்தில் மஞ்சள் வட்டமிட்டு காட்டப்பட்டுள்ள இடங்கள் இந்த படிமுறையில் பயன்படுத்தப்படுகின்றன.

8. layers சாளரத்தில் புதிதாக சேர்த்த layer இனை தெரிவு செய்து அதனை சிவப்பு வண்ணத்தால் நிரப்பினோம். பின்னர் அந்த layer இனை "screen" mode இற்கு மாற்றிக்கொண்டோம். இதன்போது படம் சிவப்பு வண்ணத்தில் தெரியும்.

9. சிவப்பு layer தெரிவு செய்யப்பட்ட நிலையிலேயே ctrl + shift + d இனை அழுத்தி அதனை நகல் செய்துகொண்டோம். இப்போது மற்றுமொரு சிவப்பு layer உங்கள் layers சாளரத்தில் தோன்றும்.

10 புதிதாகத்தோன்றிய சிவப்பு layer இனை தெரிவு செய்து படம் உள்ள சாளரத்தின் menu வழியாக color -> invert இனை பயன்படுத்தி முற்றாக எதிர்மறை நிறத்துக்கு கொண்டுவந்தோம். ( இதன்போது படம் இருந்த இடத்தில் வெள்ளையாக இருந்தது)

11. ctrl + alt + o இனை அழுத்தி "இடம்.jpg" படத்தினை புதிய layer ஆகத் திறந்துகொண்டோம். இதன்பின் புதிய படம் layers சாளரத்தில் இன்னுமொரு layer ஆகக் காட்சி தந்தது.

12. இடம். jpg இன் கீழே காணப்பட்ட ( layers சாளரத்தில்) cyan நிற layer இனை மவுசால் தூக்கி இடம். jpg படத்துக்கு மேலாக விட்டுவிட்டோம். இதன்போது படம் cyan நிறத்தில் காட்சியளித்தது.

13. அடுத்து layers சாளரத்தில் சிவப்பு நிற layer மற்றும் background ஆகியவற்றுக்கு அருகிலிருந்த கண்வடிவ சின்னத்தை அழுத்தி தெரியாமலாக்கிவிட்டு ctrl + m இனை அழுத்தி எஞ்சியிக்கும் cyan layer இனையும் இடது படத்தினையும் ஒன்றிணைத்தோம்.

14. இதேபோன்று புதிதாக உருவான cyan படத்தினை அருகிலிருக்கும் கண் சின்னத்தினை அழுத்தி மறைத்துவிட்டு சிவப்பு layer மற்றும் background layer களுக்கு அருகிலிருந்த கண் சின்னத்தினை அழுத்தி தெரிய வைத்துவிட்டு ctrl + m இனை அழுத்தி சிவப்பு படங்களை ஒன்றிணைத்தோம்.

15. இப்போது cyan படம் உள்ள layer இனைத் தெரிவு செய்து அதனருகிலுள்ள கண் சின்னத்தினை அழுத்தி தெரியவைத்துவிட்டு அதனை multiply mode இற்கு மாற்றிக்கொண்டோம். (படத்தை அவதானிக்கவும்)

16. முப்பரிமாணப்படம் தயாராகிவிட்டது. படத்தினை save as கொடுத்து "முப்பரிமாணம்.png" என்ற பெயரில் சேமித்துக்கொண்டோம்.

எம் கைவசமிருந்த சிவப்பு - cyan கண்ணாடியை பயன்படுத்தி மூவரும் நாம் உருவாக்கிய முப்பரிமாணப்படங்களை அதன் ஆழ அகலங்களோடு பார்த்து மகிழ்ந்தோம்.

ஒளிப்படப்பிடிப்பில் ஆர்வமுள்ள பிரசன்னா கொஞ்சநாளைக்கு முப்பரிமாணப்படங்களை பிடித்துக்கொண்டு திரியப்போகிறார்.

"தட்டையான தத்துவங்கள்' , "ஒட்டுமொத்தப்படுத்துபவை" , "முப்பரிமாணத்தை காட்ட மறுக்கும் அதிகாரம்" என்றெல்லாம் விளங்காத தமிழில் எங்கள் "தீவிர" இலக்கியகாரர்களும் அவர்தம் இதழ்களும் விளங்காமல்படுத்திக்கொண்டிருந்தபோது மிகுந்த பயவுணர்வோடு, குற்றவுணர்வோடு படித்திருக்கிறேன். இப்போ நானும் இந்த உலகை முப்பரிமாணமாக படம்பிடித்துக்காட்டப்போகிறேன் எனும்போது மகிழ்ச்சியாக இருக்கிறதூ...! ;-)

== Making of 3d images!! ==

[GNU] பாட்டுக்கேட்டபடியே படிப்பதற்கு ஒரு மென்பொருள்.

2007-09-29T03:49:00.000+05:30

கணினியில் பாடல் ஒன்றினைக் கேட்டுக்கொண்டிருக்கிறீர்கள். பாடல் பிடித்துப்போய்விட்டது. பாடலை எழுதியவர் யார் என்ற தகவலை உங்கள் ஒலிச்செயலி (media player) தருகிறது.

சு. வில்வரெத்தினம் எழுதிய பாடல் என்று வைத்துக்கொள்வோமே. உங்களுக்கு அவரைப்பற்றித் தெரியாது. உங்கள் ஒலிச்செயலியின் விசை ஒன்றினைச்சொடுக்கிய உடனே சு. வில்வெரெத்தினம் பற்றிய சகல தகவல்களையும் தமிழிலேயே படங்களுடன் உங்களுக்கு அச்செயலி தருமாக இருந்தால் எவ்வளவு நன்றாக இருக்கும்?

இளையராஜாவின் திருவாசகம் கேட்டுக்கொண்டிருக்கிறீர்கள். திருவாசகம் பற்றியும், இளையராஜா பற்றியும் தகவல்கள அனைத்தையும் பாடல் கேட்டபடி ஒலிச்செயலியிலிருந்தே தமிழில் பெற முடிந்தால் எப்படி இருக்கும்?

முதலாவது, இப்படியான சிறப்பு வசதிமிக்க ஒலிச்செயலியை எந்த இழிச்ச வாய்ச்சியும் வாயனும் உங்களுக்கு இலவாமாகத் தர மாட்டார்கள். அத்தோடு, இப்படி நீங்கள் கேட்கும் பாடல்களின், உரைகளின் கலைஞர்கள் பற்றிய தகவல்களை எல்லாம் எவராவது உட்கார்ந்து தமிழில் தட்டெழுதி பராமரித்துக்கொண்டிருக்க மாட்டார்கள். அப்படியே பராமரித்தாலும் நல்லாத்தந்தாங்க போங்க இலவசமா!

அப்படியானால் இந்த வசதி எப்படிக் கிடைக்கும். தோழர் மருதய்யனின் பேச்சைக் கேட்டபடியே அவரைப்பற்றியும் மக்கள் கலை இலக்கியக் கழகம் பற்றியும் எப்படித் தமிழில் தகவல் பெறுவது? இலவசமாகவே?

எங்கே தகவல்கள் அனைத்தும் பெருமெடுப்பில் தொகுக்கப்பட்டு இலவசமாக வழங்கப்படுகிறது? எங்கே நீங்களும் பங்குபற்றக்கூடியதாய் தொடர்ச்சியாக நூற்றுக்கணக்கான மனிதர்களால் இரவுபகலாகத் தகவல்கள் தமிழில் தொகுக்கப்படுகின்றன?

வி..

வி....

விக்கிபீடியா!
தமிழ் விக்கிபீடியா!

இப்பொழுது உங்களுக்குப் பொறிதட்டுகிறதா?

இந்த விக்கிபீடியாவின் தாவல்களை உங்கள் ஒலிச்செயலி உங்களுக்காகக் கறந்து தனது சாளரத்திலேயே தேவையானபடி காட்டினால் மேலே சொன்ன வசதி சாத்தியம் தானே?

தமிழிலேயே விக்கிபீடியா இருக்கும் போது இது தமிழுக்கும் சத்தியம் தானே?

உங்களுக்காகத் தன்னார்வலர்கள் பலர் ஒன்றுகூடி இப்படியான ஒலிச்செயலி ஒன்றினை வடிவமைத்திருக்கிறார்கள்.

அநேகமாக க்னூ/லினக்ஸ் பயன்படுத்தும் இசைப்பிரியர்கள் அனைவரும் நன்கறிந்திருக்கக்கூடிய சிறப்பான இசைக்களஞ்சிய முகாமையாளரும். ஒலிச்செயலியுமான Amarok தான் அது.

அமாரொக், அன்றாடம் கணினியில் இசை கேட்பவர்களுக்குத் தேவைப்படும் சகல வசதிகளையும் தன்னகத்தே கொண்டிருப்பதுடன் இந்தச் சிறப்பு வசதியையும் அறிமுகப்படுத்தியிருக்கிறது.

உங்கள் மொழியிலேயே விக்கிபீடியாவில் இருந்து தகவல் கறத்தல், பாடல் வரிகளைத் தேடல் என்று ஏராளம் வசதிகள்.

இந்தப்படத்தைப் பாருங்கள். வைரமுத்துவின் பாடலைக் கேட்டபடி அவரைப்பற்றியும் அறிந்துகொள்ள முடிகிறது.

இயல்பிருப்பாக ஆங்கில விக்கிபீடியாவிலிருந்தே தகவல்கள் கறக்கப்படுகின்றன. நீங்கள் தமிழ் விக்கிபீடியாவுக்கு மாற்றி வைத்துக்கொள்ள வேண்டும். மாற்றும் முறையைப் படம் விளக்குகிறது.

சரி,

நீங்கள் தேடும் நபர் பற்றியோ அல்லது இசைத்தொகுப்புப் பற்றியோ தகவல்கள் தமிழ் விக்கிபீடியாவில் இல்லாவிட்டால் என்ன செய்வது?

அப்படி ஒரு சந்தர்ப்பம் நேரும்போது உங்கள் கடமை என்ன/?
திறந்த இலவசமான எவருக்கும் உரிமையுள்ள அந்த கலைக்களஞ்சியதுக்கு நீங்கள் தானே தகவல்களை வழங்க வேண்டும்?
அது உங்கள் கடமை மட்டுமல்ல. உங்கள் உரிமை.

அமாரொக் இல் இருந்தபடியே நீங்கள் விக்கிபீடியாவில் தகவல்களைத் தட்டெழுதிச் சேர்க்க முடியும்.

படத்தைப்பாருங்க.

சபேஷ் முரளி பற்றி விக்கிபீடியாவில் தகவல் இல்லை. கட்டுரைய உருவாக்கும்படி விக்கிபீடியா கேட்கிறது. நீங்கள் அந்த தொடுப்பை அழுத்தியதும் நீங்கள் பயன்படுத்திக்கொண்டிருக்கும் உலாவியில் புதிய கீற்றில் விக்கிபீடியாவைத் தொகுத்தலுக்கான பக்கம் திறக்கிறது.

இசைப்பிரியரான உங்களுக்கு அந்த இசையமைப்பாளரைப்பற்றி ஏதாவது தெரிந்திருக்கும் தானே? தெரிந்ததை தட்டெழுதிச் சேமித்துவிட்டு வாருங்கள்.
நாளைக்கு எவருக்காவது, ஏன் உங்களுக்கும்கூடப் பயனப்டும்.

குறிப்பு: இந்த வசதிகள் தமிழில் கிடைக்க வேண்டுமானால் உங்கள் பாடற் கோப்புக்கள் அனைத்தும் தமிழ்ப் பெயருடன் சேமிக்கப்பட்டிருக்க வேண்டும். அத்தோடு பாடல் விபரங்களும் தமிழில் கொடுக்கப்பட்டிருக்க வேண்டும். ஆங்கிலம் தான் உங்களுக்குப் பிடிக்கும் என்றால், ஆங்கிலத்தில் மட்டுமே தகவல்கள் பெறலாம்.

கணினிச் சஞ்சிகைக்கு ஆங்கிலத்தில் தான் பெயர் இருக்க வேண்டும்!

2007-06-22T09:56:00.000+05:30

(GNU/Linux குறிப்பேடு)

அண்மையில் இலங்கையில் வெளிவந்து மிகவும் பிரபலமாகியிருக்கும் நல்லதொரு கணினிச் சஞ்சிகைதான் தமிழ் PC Times.

திறந்த மூலத்துக்கு ஆதரவான பாதையை தேர்ந்தெடுத்திருப்பதுடன், ஆரோக்கியமான, ஆழமான பல கட்டுரைகளையும் இச்சஞ்சிகை கொண்டிருக்கிறது.

கூடவே தனது கட்டுரைகளும் உள்ளடங்கும் வலைப்பதிவொன்றினை இலவசமாகவே நடத்தி வருகிறது.

இப்பொழுதெல்லாம் கணினிச்சஞ்சிகைகள் பற்றி கேட்பவர்களுக்கு நான் பரிந்துரைப்பது "தமிழ் கம்பியூட்டர்" இதழும், இந்தச் சஞ்சிகையும் தான்.

இச்சஞ்சிகையின் முதல் இதழ் வெளியான காலந்தொட்டே எனக்கு உறுத்தலாயிருக்கும் விடயம் இதன் பெயர்.

அது என்னய்யா தமிழ் பீசீ டைம்ஸ்?

இந்த ஆதங்கத்தை இவ்விதழின் ஆசிரியர் திரு. ருஷாங்கன் அவர்களிடம் நேரடியாகவும் வெளிப்படுத்தியிருந்தேன்.

நீண்டலாகமாக தமிழ்ச் சூழலில் இந்தப் பாரம்பரியம் இருக்கிறது.

கணினிச் சஞ்சிகை என்றால் அதற்கு ஆங்கிலத்தில் பெயர் இருக்க வேண்டும்.

இந்த மனோபாவம் எல்லாச் சஞ்சிகைக்காரர்களிடத்திலும் இருக்கிறது.

தமிழ் கம்பியூட்டர்
கம்பியூட்டர் டுடே
பீ சீ ஃபோக்கஸ்

என்று நீள்கிறது இந்தப்பட்டியல்.

"கணினி என்றால் ஆங்கிலம்" என்ற ஆழ்மனத் தாக்கத்தின் விளைவே இது என்று கருதுகிறேன்.

தீவிர எழுத்துச்சூழலில் பரிச்சயமுள்ள ருஷாங்கன் போன்றவர்கள் இடம்பெறும் சஞ்சிகைகூட இதிலிருந்து தப்பவில்லை.

இத்தகைய பெயர்கள் சஞ்சிகை வாங்கிப்படிப்பதையே தடுக்கும் மனவுறுத்தலாக பலமுறை எனக்கு இருந்திருக்கிறது.

இந்த சஞ்சிகைக்கு ஆரம்பம் தொட்டே எதுவும் எழுதாமலிருப்பதற்கு ஒரே காரணமும் இந்தப்பெயர்தான்.

தமது சஞ்சிகையின் பெயரை நல்ல தமிழ்ப்பெயராக மாற்றியமைப்பதன்மூலம் பரம்பரை பரம்பரையாகத்தொடர்ந்துவரும் இந்த அடிமை மனோபாவத்துக்கு முற்றுப்புள்ளி வைக்க தமிழ் PC Times இதழ்க்காரர்கள் முன்வருவார்களா?

பெயரை மாற்றுவது அவர்களது சந்தைப்படுத்தலுக்கு பாரிய தாக்கமெதனையும் ஏற்படுத்தாது என்பதை என்னால் உறுதிபடக் கூற முடியும்.
இப்போது இலங்கையிலிருந்து வெளிவரும் ஒரேயொரு தரமான கணினிச் சஞ்சிகை இதுதான்.

இரண்டு இதழ்களில் உட்பக்கம் மாற்றப்பட்ட பெயரைப்போட்டு, மூன்றாவது இதழிலிருந்து ஒரேயடியாகப் பெயர் மாற்றம் செய்துவிடலாம்.

இது தமிழ் சூழலுக்கு செய்யும் கைம்மாறு.

இம்மாற்றத்தினை செய்ய முன்வருமாறு சஞ்சிகையின் ஆசிரியர் குழுவினரை தயவுடன் வேண்டிக்கொள்கிறேன்.

எனது இக்கருத்துக்கு ஆதரவானவர்கள் இந்த சஞ்சிகைக்காரர்களுக்கு பெயர் மாற்றத்துக்கான அழுத்தத்தைக் கொடுக்கவும்.

வீட்டுக்கு வீடு ஒரு வலைத்திரட்டி - From Liferea to Liferea

2007-06-16T20:19:00.000+05:30

(GNU/Linux)
முன்னைப்போல இல்லை இப்பொழுது. ஆளுக்காள் வலைபப்திவுத் திரட்டிகளை ஆரம்பித்துவிட்டார்கள். போதாக்குறைக்கு கூகிள், யாகூ போன்ற நிறுவனங்களும் தனித்தனித் திரட்டிகளை வழங்க ஆரம்பித்துவிட்டன.

செய்தித்தளங்களும் எண்ணிக்கையால் அதிகரித்துவிட்டன.

ஒவ்வொரு நாளும் எல்லாத்தளங்களிலும், எல்லாத்திரட்டிகளிலும் என்னென்ன புதிதாக வந்திருக்கிறது என்று தனித்தனியாகப் போய்ப்பார்ப்பதில் எமது இணைய நேரம் கணிசமாக வீணடிகப்படுகிறது.

இதற்கெலாம் என்ன தீர்வு?

நாம் பார்வையிடும் எல்லாத் தளங்களினதும் செய்தியோடைகளை வீட்டில் திரட்டுவதுதான்.
எமக்கென்று ஒரு வலைத்திரட்டியை வைத்துக்கொள்வதுதான்.

இதற்காக ஏராளம் வலைத்திரட்டி மென்பொருட்கள் க்னூ/லினக்ஸ் இயங்குதளத்துக்குக் கிடைக்கின்றன.

இவற்றில் எது சிறந்தது? எதனைப் பயன்படுத்தலாம்?

இந்தக்கேள்வியோடே இத்தனைநாள் போராடிக்கொண்டிருந்தேன்.

ஆரம்பத்தில் Liferea என்ற திரட்டியைப் பயன்படுத்திக்கொண்டிருந்தேன். ஆனால் வேறு உறுமீன்கள் இருக்கக்கூடும் என்ற நம்பிக்கையில் வேறு வேறு திரட்டிகளையும் மேய்ந்துகொண்டிருந்தேன்.

ஒவ்வொன்றிலும் ஒவ்வொரு சிறப்பு, ஒவ்வொன்றிலும் ஒவ்வொரு குறைபாடு.

நான் பயன்படுத்திக்கழித்த சில வலைத்திரட்டிகள் வருமாறு,

Straw

Liferea விற்கு பிறகு பயன்படுத்தத்தொடங்கியது இதுதான். எளிமையான இதன் இடைமுகம் கவர்ந்தது. ஆனால் அந்த எளிமையே பின்பு இடைஞ்சலாகவும் போய்விட்டது.

எல்லாவற்றையும் ஒரேயிடத்தில் செய்யும் வாய்ப்பு குறைவாக இருந்தது. தலைப்புக்களைப் படித்துவிட்டு மிகுதியை வலை உலாவி மூலமே திறந்து படிக்க வேண்டிய நிலை. இது அவ்வளவாகப் பிடிக்கவில்லை.

Akregetor

இது நல்லது. அனைத்து வசதிகளையும் கொண்டது. பயன்பாட்டு எளிமையும் மிக்கது. எல்லாவற்றையும் விட இது ஒரு K மென்பொருள் என்பதுதான் என்னுடைய பிரச்சினை ;-)

நான் க்னோம் பயன்படுதுவதால் கே மென்பொருட்கள் பயன்படுத்துவதில் நிறைய நன்மையற்ற விளைவுகள் இருக்கின்றன. கே டீ ஈ உதவிச்சேவைகளும் ஆரம்பிக்கப்படவேண்டியிருப்பதால் நினைவகம் அடைத்துக்கொள்கிறது. கே டீ ஈ பயன்படுத்துபவர்களுக்கு இந்தத் திரட்டி பரவாயில்லை.

Thunderbird

இது மொசில்லாக் குழுமத்தின் தயாரிப்பு. ஏராளம் வசதிகளும், எண்ணற்ற நீட்டிப்புக்களும் கொண்டது. செய்தியோடையின் சுருக்கத்தையும் விரிவாகப் பின் வலைத்தளத்தையும் இதனுள்ளே பார்வையிடக்கூடிய வசதி கவர்ந்தது.

அத்தோடு மின்னஞ்சல் பெறும் செயலியாகவும் இதுவே அமைவதால், உலாவிக்குப் போகாமலேயே எம்முடைய இணையப்பயன்பாட்டின் பெரும்பகுதியை இதனுள் செய்து முடித்துவிட முடியும் என்பது இதன் சிறப்பம்சம்.

ஆனால் இந்த பிரமாண்டமே இதை வெறுக்கப் போதுமான காரணமாகிவிட்டது. தொடங்குவதற்கான நேரம் சற்றே அதிகம். சில இடங்களில் தமிழ் ஒருங்குறியைச் சரியாக கையாள்கிறதில்லை. நான் மின்னஞ்சலை உலாவியிலேயே பயன்படுத்த விரும்புவதால் தேவையற்ற வசதிகள் சுமையாகப்போய்விட்டது.

Wizz rss

சரி உலாவியிலேயே திரட்டி இருந்தால் நன்றாக இருக்குமே என்ற எண்ணத்தில் Firefox இற்கான வலைத்திரட்டி நீட்சிகளைத் தேட ஆரம்பித்தேன்.
கிடைத்தவற்றுள் சிறப்பாக இருந்தது இதுவே.

நிறைய வசதிகளைக் கொண்டிருந்தது.
குறை என்று சொல்லப் பொதுவாக எதுவுமில்லை.
ஆனால் என்னுடைய உலாவியில் தேவையற்ற பட்டைகளைப் போட்டுவிடுவது உறுத்தலாக இருந்தமையாலும், "உலாவி அற்ற வலைத்திரட்டி" ஒன்று நல்லது என்று பட்டதாலும் இதனை விட்டு வரவேண்டியதானது.

Liferea.

வலைத்திரட்டிக்கான எனது தேடல் கடைசில் தொடங்கிய இடத்திலேயே வந்து முடிந்தது. :-)

ஊர் மேய்ந்து பார்த்ததில் முன்னர் பயன்படுத்திய இந்தத்திரட்டியே சிறப்பானது என்று முடிவெடுக்க வேண்டியதாயிற்று.

எளிமை. அதே நேரம் பல்வேறு பணிகளைச் செய்யக்கூடிய வாய்ப்பு.
திரட்டியினுள்ளேயே வலைப்பக்கத்தையும் பார்வையிடக்கூடிய வாய்ப்பு.
மிகக்குறைந்த தொடங்கும் நேரம்.
எளிமையான வகைப்படுத்தல் வசதி
GTK பின்பலம்
சிறப்பான ஒருங்குறிக் கையாள்கை

போன்றவை கவர்கின்றன.

ஏனோ தெரியவில்லை விக்கிபீடியாவின் செய்தியோடையைத் திரட்டுவதில் சிக்கல்களை எதிர்கொள்கின்றது இச்செயலி. இது யாருடைய தவறு என்று தெரியவில்லை. இப்போதைக்கு தமிழ் விக்கியின் அண்மைய மாற்றங்களை வலைத்தளம் வழியாகவே பார்க்கவேண்டியதாகிறது.

ஆகவே இத்தால் சகலமானவர்களுக்கும் நான் தெரிவிப்பது யாதெனில்,
உங்கள் வீட்டில் வலைத்திரட்டி ஒன்றை வைத்திருக்க நான் பரிந்துரைக்கும் மென்பொருள் Liferea.

எல்லா திரட்டிகளுமே எமது செய்தியோடைச் சேகரிப்பை opml கோப்பாக சேமித்துத்தரக்கூடிய வசதியைக்கொண்டிருக்கின்றன. அதனால் ஒன்றிலிருந்து ஒன்றுக்கு மாறுவது அவ்வளவு குழப்பகரமானதல்ல.

இவைதவிர வேறு சிறப்பான வலைத்திரட்டிகளுடனான பரிச்சயம் உங்களுக்கு இருக்குமெனில் பின்னூட்டம் வழியாக அறியத்தாருங்கள்.

உபுண்டு தமிழ் கோளரங்கம்

2007-06-15T11:50:00.000+05:30

(GNU/Linux)

தமிழ்மணம் தளம் மட்டுமே என்றில்லாது இப்போது பல்வேறு தேவைகளுக்குமான சிறு சிறு குழுக்கள் சார்ந்த வலைபப்திவுத்திரட்டிகள் உருவாகிக்கொண்டிருக்கும் ஆரோக்கியமான சூழல் வளரத்தொடங்கியிருக்கிறது. இதில் தற்போது புதிதாக இணைந்துகொண்டிருப்பது உபுண்டு தமிழ் கோளரங்கம்.

தற்போது வளர் நிலையில் இருந்தாலும் தமிழில் உபுண்டு தொடர்பாகவும், கட்டற்ற இயங்குதளம் தொடர்பாகவும் எழுதும் வலைப்பதிவர்களின் பதிவுகளைத் திரட்டித்தரப்போகிறது இந்தக் கோளரங்கம்.

Planet என்கிற செய்தியோடைத் திரட்டி மென்பொருளைக்கொண்டு இயங்குகின்ற இவ்வாறான ஏராளம் திரட்டிகள் ஆங்கிலத்தில் உண்டு.

அவற்றுள் பிரபலமானவை,

Planet Ubuntu Women
ubuntu planet
debian planet
gnome planet

போன்றவை.

தமிழில் இதுவே முதன்முறை.

இத்திரட்டி தற்போது கைமுறையாகவே இற்றைப்படுத்தப்படுகிறது என்ற போதிலும் எதிர்காலத்தில் தன்னியக்க இற்றைப்படுத்தல் நிகழும் என உறுதியளிக்கிறார்கள்.

உண்மையில் உபுண்டுவின் ஜனநாயகத்தன்மையே இப்படியான திரட்டியொன்றின் வருகைக்கு உந்துவிசையாக இருந்திருக்கிறது.

இது ஒரு நல்ல வருகை.

இவ்வாறன திரட்டி ஒன்றினை உருவாக்கிப் பராமரிக்க முன்வந்திருக்கும் உபுண்டுத் தோழர்கள் ராமதாஸ், ஷங்கர் போன்றோருக்கும் மனமார்ந்த நன்றிகளும் வாழ்த்துக்களும்.

நீங்களும் உபுண்டு மற்றும் கட்டற்ற இயங்குதளம், GNU/Linux தொடர்பான பதிவுகளைச் செய்பவராயின் உபுண்டு கோளரங்கத்தில் உங்கள் பதிவையும் இணைத்துக்கொள்ளலாம்.

அதற்கான வழிமுறைகள் இங்கே.

உபுண்டு Feisty யின் VCD பிரச்சினை - தற்காலிகத் தீர்வு

2007-05-28T21:35:00.000+05:30

வாங்குகின்ற திருட்டு வட்டுக்களை போட்டுப் பார்க்க முடியாவிட்டால் அது ஒரு கணினியா?

உபுண்டுவின் அண்மைய பதிப்பு வெளிவந்த நாள் தொட்டு இது ஒரு பிரச்சினையாகவே இருந்தது. VCD வேலை செய்யாமல் அடம்பிடித்துக்கொண்டிருந்தது.

அண்மைய பதிப்பு வந்ததிலிருந்து மிக அவசரமாக எந்தப்படமும் பார்க்கவேண்டியிருந்திராதபடியினால் இந்தப்பிரச்சினை எனக்குத் தலையிடியாக இருக்கவில்லை. நான் உபுண்டு நிறுவிக்கொடுத்த நண்பர்கள் நச்சரித்துக்கொண்டிருந்தார்கள்.

இன்றைக்கு வீதியில் பெரியார் படத்தின் திருட்டு நகல் ஒன்றினை வாங்கிக்கொண்டுவந்து பார்க்கமுயன்றபோதுதான் இந்தப்பிரச்சினையை தீர்ப்பதற்கான உந்துவிசை கிடைத்தது.

இயல்பிருப்பாக உபுண்டுவோடு வரும் Totem ஊடக இயக்கி வழுச்செய்தி ஒன்றினை தந்துகொண்டிருக்கிறது.

மற்றைய மென்பொருட்களும் ஏதாவது சொல்லிவிட்டுப் பேசாமலிருந்துவிடுகின்றன.

கடைசியாகப் பிரச்சினையை கூகிளாண்டவரிடம் முறையிட்டபோது தீர்வு கிடைத்தது.

பிரச்சினையின் மூலகாரணத்தை இன்னமும் அறியமுடியவில்லை.
வழங்கலின் வழுவாக இருக்கலாம்.

அதுவரை இந்த வழிமுறையைப் பின்பற்றிப் படம் பாருங்கள்.

1. mplayer மென்பொருளை நிறுவிக்கொள்ளுங்கள்

sudo apt-get install mplayer

2. முனையத்தை (terminal) திறந்துவைத்துக்கொள்ளுங்கள்.

3. பின்வரும் ஆணையை வழங்குங்கள்

mplayer vcd://2

இப்பொழுது உங்கள் இறுவட்டு இயங்கும்.

முழுத்திரையில் பார்க்கவேண்டுமானால் f விசையினை உங்கள் விசைப்பலகையில் அழுத்துங்கள்.

முன்னே பின்னே ஓடவிட்டுப் பார்க்க அம்புக்குறிகளைப் பயன்படுத்துங்கள்.

நிறுத்த, முழுத்திரை இயக்கத்தை நிறுத்த esc விசையினைப் பயன்படுத்துங்கள்.

ஏனைய உதவிகளுக்கு

man mplayer

என்ற ஆணை மூலம் உதவிக்குறிப்புக்களை பெறலாம்.

mplayer vcd://2 ஆணை வேலைசெய்யாவிட்டால்

mplayer vcd://1
mplayer vcd://

போன்ற ஆணைகளை முயன்றுபாருங்கள்.

ஏதாவது பிரச்சினைகள் ஏற்பட்டாலோ, மேலதிக விளக்கங்கள் தேவைப்பட்டாலோ பின்னூட்டம் மூலம் உரையாடுங்கள்.

பறக்கத் தெரியாதவர் தமிழரா?

2007-05-24T03:22:00.000+05:30

திடீரென என் ஒன்று விட்ட தம்பி ஒருவருக்கு வானூர்தி ஒட்டிப்பார்க்கும் ஆசை வந்துவிட்டது. எப்படி வந்திருக்கும் என்று தெரியும் தானே? அவர் சொன்ன வார்த்தை ஒன்றைத்தான் தலைப்பாய்ப் போட்டிருக்கிறேன்.

Microsoft Flight Simulator இனை எப்படியாவது வாங்கிவிட வேண்டும் என்று அலைந்துகொண்டிருக்கிறார்.

இது எனக்குப் புதிய தேடும் படலத்தைத் தொடக்கி வைத்துவிட்டது.

திறந்தமூலமாகப் பறந்துபழகும் மென்பொருட்கள் ஏதாவது கிடைக்காதா?

என்ன செய்வது, எங்களுக்கு பறக்கும் ஆசை வந்தால் மென்பொருளைத்தான் தேடவேண்டும்.

பறக்கப்படித்துக்கொண்டிருப்பவர்கள் சிரிக்கிறீர்களா?

தேடிலில் ஓர் அழகிய, அற்புத மென்பொருள் கிடைத்தது.

அதுதான் Flight Gear!

முற்றிலும் திறந்தமூலமாக கிடைக்கும் இந்த மென்பொருள் மிக அழகாக க்னூ/லினக்ஸ் இயங்குதளங்களில் செயலாற்றுகிறது.

இந்த விளையாட்டு மென்பொருள் பற்றிய அறிமுகப்பக்கத்திலே,

"வணிக மென்பொருட்களாக வரும் வானூர்தி போன்மி மென்பொருட்களில் இருக்கும் மிகப்பெரிய குறையான, மூடப்பட்ட நிலைக்கு மாற்றாக, நீட்டிக்கப்படக்கூடிய, பெரும் பரப்பிலான சாத்தியங்களை வழங்கக்கூடிய, பறப்புப் பயிற்சிகளை முறையாக வழங்கக்கூடிய மென்பொருள் " என்று குறிப்பிடுகிறார்கள்.

வானூர்திகளின் உண்மையான உள்ளமைப்பைப், பௌதீகத் தத்துவங்களை உள்வாங்கி, அப்படியே தந்திருப்பது இதன் சிறப்பு.

ஏறத்தாழ உண்மையாகவே வானூர்தி ஒன்றினை ஓட்டிப்பார்க்கும் அனுபவத்தை இந்த விளையாட்டு உங்களுக்குத்தரும்.

இது உண்மையில் ஒரு கற்றல் மென்பொருள்.
இதனை பயன்படுத்த நீங்கள் சற்றே ஆழமாக சில விடயங்களைக் கற்றுக்கொள்ள வேண்டும்.

ஆரம்பநிலை மாணவர்களுக்கு உதவக்கூடிய வழிகாட்டி ஒன்று இணையத்தில் கிடைத்தது.

இம்மென்பொருளின் வலைமனையில் ஏராளமான வானூர்திகள், வானூர்தித்தளங்கள், சிறப்புப் பொருத்துக்கள் போன்றவற்றை தரவிறக்கிக்கொள்ளலாம்.

இப்பொழுது நான் ஓரளவு பறக்கக்கற்றுக்கொண்டுவிட்டேன். சில நிமிடங்கள் அலுங்காமல் குலுங்காமல் பறப்பில் ஈடுபட முடிகிறது. ஆனால் தரையிறங்கத்தான் தெரியவில்லை.

நீங்களும் விளையாடிப்பாருங்கள்.

உபுண்டுவில் இம்மென்பொருளை நிறுவுவதற்கான ஆணை,

sudo apt-get install flightgear

மற்றைய வழங்கல்களில் பொதி முகாமைத்துவ செயலியில் flightgear என்று தேடி நிறுவுங்கள்.

பொதிகளை நேரடியாகத் தரவிறக்கி நிறுவ வலைமனைக்கு போய்ப்பாருங்கள்.

----

வானூர்தி, பறப்பு, தரையிறக்கம், வான் தாக்குதல், பறப்பில் ஈடுபடுதல், வானோடிகள், வான்படை......

எவ்வளவு அழகான தமிழ்ச்சொற்கள்!

இந்த விளையாட்டை விளையாடும்போது நண்பர்கள் வாயில் அநாயாசமாக இந்தச் சொற்கள் வந்துபோகின்றன.

ஈழப்போர் நல்ல தமிழ்ச்சொற்களை மக்களுக்கு அறிமுகம் செய்கிறது. இயல்பாக புழங்கச்செய்கிறது.

----

ஒரு பாடலின் சில வரிகள்...

"ஆழக்கடல் நேற்றெமக்கு
நீல வானம் இன்றெமக்கு
நாளை தமிழ் ஈழமதும் எமக்குத்தான்! -புலி
வானமேறிப் போனதுவும் இதுக்குத்தான்

நூறு வருடங்கள் நெஞ்சில் இருந்திட்ட கனவு பலித்தது -நேற்று
நீரு கொழும்பிற்கு மேலே இருந்திட்ட நிலவும் சிலிர்த்தது.

நிலவு பார்த்த வானம் ஒரு நிமிர்வு பார்த்தது -புலி
இளவல் நான்கு பறந்துபோன அழகைப்பார்த்தது!"

பாடல் கேட்க

பாலினி - Bamini for GNU/Linux

2007-05-14T19:17:00.000+05:30

பல நாட்கள் தள்ளிப்போய்க்கொண்டிருந்த பணி, சக லினக்ஸ் தோழர் சயந்தனால் இப்போது நிறைவேறி முடிந்திருக்கிறது.

பெரும்பாலான மொழிகளின் பெரும்பாலான விசைப்பலகை வடிவங்களைப் பயன்படுத்தக்கூடியதாக இருந்த லினக்சில் பாமினி வடிவத்தை பயன்படுத்தி ஒருங்குறித்தமிழை உள்ளிட முடியவில்லையே என்ற குறை பல நாட்களாக இருந்துவந்துள்ளது.

இதற்கு ஈழத்தமிழர்கள்தான் பெரும் காரணம். அதிலும் குறிப்பாக யாழ்ப்பாண-வடபுலத் தமிழர்கள். இவர்களுக்கு ஏனோ தெரியவில்லை லினக்சைப்பிடிப்பதில்லை.;-) அத்தோடு இவர்கள்தான் இந்த பாமினியை விடாமல் தொடர்ந்து பயன்படுத்திக்கொண்டிருப்பவர்கள். ஆக இவர்கள் லினக்சை பெரிதாக பயன்படுத்தாமற்போனதால் பாமினியும் லினக்சுக்கு இல்லாமற்போய்விட்டது.

சயந்தன் லினக்சில் காதல் கொள்ளவே, அவருக்கு பாமினி தேவைப்பட்டுப்போய் ஒரு கோரிக்கை விடுத்திருந்தார். அத்தோடு நான் கேட்டுக்கொண்ட பாமினியில் தட்டெழுதப்பட்ட அரிச்சுவடியினையும் உடனே எந்த தாமதமுமின்றி எனக்கு அனுப்பி வைத்தார். அவரது பேருதவியுடன் இந்த பாலினி விசைப்பலகை இயக்கியினை எழுதி முடித்தேன்.

scim-tables முறையில் வைத்திருப்பதா அல்லது m17n உள்ளீட்டுமுறையாக மாற்றி வெளியிடுவதா என்ற கேள்விக்கு பதில் கிடைத்ததும். பாலினி பொதுப்பயன்பாட்டுக்கு வந்துவிடும். அடுத்த தபுண்டு கட்டாயம் பாலினியைக் கொண்டிருக்கும். அதற்கு சில நாட்கள் பொறுத்திருக்கவேண்டியிருக்கும்.
அதுவரை பாலினியின் சோதனைப்பதிப்பான scim-tables script இங்கே கிடைக்கும்.

== புதிய "ஐடியா"க்கள் ==

சும்மா இருக்கும் பாமினி விசைப்பலகையை அப்படியே தருவதானால் லினகின் பேராற்றலைப் பயன்படுத்திக்கொள்ளாததாகிப்போய்விடும்.
சயந்தன் சில யோசனைகள் சொன்னார். அந்த யோசனைகளைத் தொட்டு இந்த பாலினியில் பாமினியில் இல்லாத பல புதிய வசதிகளை சேர்ப்பதாய் உத்தேசம்.

அதாவது பாமினி முறைப்படி தட்டினால் அழகாக இந்த இயக்கி ஒருங்குறி எழுத்துக்களைத் தரும்.

அதற்கும் மேலதிகமாக சில இலகுபடுத்தல்கள், மாற்றங்கள் இந்த பாலினி கொண்டிருக்கும்.

என்னென்ன புதிய வசதிகள் வேண்டும் என இங்கே பின்னூட்டமிட்டீர்களானால் அவற்றையும் சேர்த்துக்கொள்ளலாம்.

எடுத்துக்காட்டாக, சயந்தனுக்கு ஊகார எழுத்துக்களோடு பிரச்சினை. பல ஊகார எழுத்துக்கள், (ழூ, கூ, சூ) போன்றவை பாமினியில் எங்கே இருக்கிறதென சயந்தனுக்கு ஒரே குழப்பம்.
அவர் எளிய வழிமுறை ஒன்றினைப்பரிந்துரைத்தார்.

உகர எழுத்துக்களுடன் அரவை அடித்தால் ஊகாரம் வரும்படி செய்து தரச்சொன்னார். செய்தாப்போச்சு!

இப்போது பாலினியில் இந்த வசதி உண்டு.

Ah என்று தட்டினால் அது "யூ" என்ற எழுத்தைத்தரும். இப்படியாக எல்லா எழுத்துக்களுக்கும்.

உங்களுக்கும் பாமினி விசைப்பலகையில் இப்படியான புதிய வசதிகள் வேண்டுமா?

பின்னூட்டமிடுங்கள்.

அனைவருக்கும் மிகவும் உதவக்கூடிய பாலினியை பெற்றெடுப்போம்.

** மேலதிக தகவல் : என்னுடைய சுட்டி (mouse) பழுதடைந்துவிட்டது. இன்று முழுக்க சுட்டி இல்லாமற்தான் கணினியைப் பயன்படுத்திக்கொண்டிருக்கிறேன். நல்ல அனுபவம். இந்த பதிவை இடும் செயற்பாட்டில் கூட சுட்டி பங்குபற்றவில்லை. GNOME இன் mouse key function இற்கு நன்றி. வாழ்க்கை ஒரேமாதிரியாக போய்க்கொண்டிருந்தால் இப்படியான வீரதீர செயல்களை நீங்களும் செய்துபார்க்கலாம். :-)))

தபுண்டு - மூன்றே படிகளில் உபுண்டுவில் சகல தமிழ் வசதிகளும்

2007-05-11T00:20:00.000+05:30

இன்றைக்குத்தான் ஃபீஸ்டிக்கான (Feisty) தபுண்டு (tabuntu) பொதியினை முழுமைப்படுத்தி தரவேற்றினேன்.

சரி, முதலில் தபுண்டு என்றால் என்ன என்று சொல்லிவிடுகிறேன்.

தமிழ் உபுண்டு என்பதன் சுருக்கமே தபுண்டு. ;-)

உங்களை அதிகம் அலைக்கழிக்காமல், மிக எளிமையாக மூன்றே மூன்று படிகளில் உங்களுக்குத்தேவையான சகல தமிழ் வசதிகளையும் உபுண்டு க்னூ/லினக்ஸ் இயங்குதளத்தில் நிறுவித்தரும் பொதிதான் தபுண்டு.

நீங்கள் வின்டோஸ் பயனராக இருந்தால், உங்கள் கணினியில் இயங்குதளத்தை நிறுவியதும் ஏகப்பட்ட சடங்காசாரங்களை பின்பற்ற வேண்டிவரும்.

வன்பொருள் இயக்கிகளை ஒவ்வொன்றாக நிறுவுவது, வைரஸ் தடுப்பூசி, அப்புறம் ஆபீஸ், மற்றைய மென்பொருட்கள்...... இப்படி.

பிறகு தமிழை பயன்படுத்த வேண்டுமானால் இன்னும் தலையிடி.
ஒருங்குறி ஆதரவு, ஏ கலப்பை, இத்தியாதி....

லினக்ஸ் ஓரளவு பரவாயில்லை நிறுவியதும் பயன்படுத்தக்கக்கூடியதாக இருக்கும். ஆனால் தமிழை பயன்படுத்த அங்கேயும் ஏகப்பட்ட படிமுறைகளைத் தாண்ட வேண்டும்.

உபுண்டு இப்போதைக்கு தமிழ் பயனர்களுக்கு மிகச்சிறந்த லினக்ஸ் தெரிவாக அமைகிறது. கவனிக்க, "உபுண்டு". குபுண்டுவோ மற்றையவையோ அல்ல.

ஆனால் அதில் தமிழை பயன்படுத்த பின்வரும் தடைகள் தாண்டப்படவேண்டும்.

1. போதிய எழுத்துருக்கள் நிறுவுதல்.

2,. தமிழ் எழுத்துக்களை உலாவியில் சரிவரத் தெரியப்பண்ணுதல்.

3. தமிழ் உள்ளீடு. (தமிழ் 99, அஞ்சல் ...)

எழுத்துருக்கள் பரவாயில்லை. உள்ளீடு மற்றும் firefox பிரச்சனைகளை தீர்க்க சற்றே தேர்ந்த பயனருக்குரிய அனுபவம் தேவைப்படும்.
சிலவேளை scim சட்டகவமைப்புடன் m17n உள்ளீட்டமைப்புகள் இணைந்து வேலை செய்யாமல் அடம்பிடிக்கும். இப்படியாக பல.

இதற்கெல்லாம் வேண்டிய நேரத்தில் இணையம் கையில் இருக்க வேண்டும்.

க்னூ/லினக்ஸ் இனை தமிழ் பயனர் மத்தியில் பரவலாக்கும் முயற்சியில் ஈடுபட்டபோதுதான் சில முக்கிய தடைகள் தாண்டப்பட வேண்டும் என்பதனை உணர்ந்தேன்.

1. இணைய வசதி இல்லாத பயனர்களும் தேவையான மென்பொருட்களைப் பெறக்கூடியதாக இருக்க வேண்டும்.

2. சிக்கல்கள் இல்லாமல் தமிழ் வசதிகளை நிறுவக்கூடியதாக இருக்க வேண்டும்.

இதற்கு என்ன செய்யலாம் என்று யோசித்தபோது உருவானதே தபுண்டு எனும் எண்ணக்கரு.

சராசரித் தமிழ்ப்பயனருக்குத் தேவைப்படக்கூடிய பொதிகள் அனைத்தையும் தன்னகத்தே கொண்டிருப்பதன்மூலமும், அதனை மிக அழகாக, எளிமையாக வரைகலை இடைமுகப்புடன் (Graphical Interface) நிறுவித்தருவதன்மூலமும் இவ்விரு தடைகளையும் தாண்ட தபுண்டு இலகுவாக உதவிவிடுகிறது.

தபுண்டுவின் இந்தப்பதிப்பில் வரைகலை இடைமுகப்பைச் சேர்த்திருக்கிறேன்.

இப்போது கணினியில் தமிழைப்பயன்படுத்த வின்டோசைப்பயன்படுத்துவதை விடவும் உபுண்டுவினைப் பயன்படுத்துவது மிகவும் இலகுவானதாக மாறிப்போனது.

நீங்கள் செய்யவேண்டியதெல்லாம் இதுதான்.

உபுண்டுவின் அண்மைய பதிப்பொன்றினை நிறுவிக்கொள்ளுங்கள்.

தபுண்டுவை அதில் நிறுவிக்கொள்ளுங்கள்.

அவ்வளவுதான். தமிழ் பயன்பாட்டுக்கு உங்கள் கணினி தயார்!!!

நீங்கள் உபுண்டுவின் 7.04 பதிப்பினை பயன்படுத்துகிறீர்களா?
தமிழை பயன்படுத்த, தட்டெழுத அங்கே சிரமப்படுகிறீர்களா?

அப்படியானால்,

தபுண்டுவின் வலைத்தளத்துக்கு வருகை தாருங்கள்.

http://tabuntu.googlepages.com/home

கொடுக்கப்பட்ட அறிவுறுத்தல்களுக்கமைய தபுண்டுவினை நிறுவிக்கொள்ளுங்கள்.

இனி என்ன? உபுண்டு க்னூ/லினக்சில் தங்குதடையின்றி தமிழைப் பயன்படுத்துங்கள்!

குறிப்பு: தபுண்டு "உபுண்டு 7.04 " இற்கானது. குபுண்டு உள்ளிட்ட ஏனைய வழங்கல்களில் சோதிக்கப்படவில்லை.

விஸ்தா என்ன விஸ்தா? - Beryl on Linux

2007-04-07T20:28:00.000+05:30

ஆறிப்போன விசயம் தான் என்றாலும், இனியும் ஆற விடாமல் சொல்லிவிடுகிறேன்.

பெருங் கருமேகங்கள் எல்லாம் கிளம்பி மனிசர் எல்லாம் பயந்தோடி கடைசியில் மெல்லிய தூறல் போட்டுவிட்டு விஸ்டா சுருங்கிக்கொண்டது.

என் தனிப்பட்ட பார்வையில் என் தனிப்பட்ட அனுபவத்தில் மைரோசொஃப்டின் பெருமெடுப்பு வெளியீடு ஒன்று சாதாரண க்னூ/லினக்ஸ் இடம் சண்டையில்லாமல் தோற்று மண்டியிட்ட முக்கிய சம்பவங்களில் ஒன்று இதுதான்.

சாதாரண சராசரி பயனர் மட்டத்தில் விஸ்டா மீதான எதிர்பார்ப்பு அதன் இடைமுகப்புப்பற்றிய ஆர்ப்பாட்டங்களால்தான் ஏற்பட்டிருக்கமுடியும்.

ஆனால் இந்த இடைமுகப்புப்பற்றிய கதைகள் எல்லாம் இலவம்பழமாய் வெடித்துப்போனது.

சராசரிக்கு சற்றே மேலான க்னூ/லினக்ஸ் பயனர் ஒருவருக்கு இந்த விஸ்டா இடைமுகப்புப் பற்றிய எதிர்பார்ப்புக்கள் இருந்திருக்காது. மைக்ரோசொஃப்டின் ஆரவாரங்களைப்பார்த்து சிரிப்புத்தான் வந்திருக்கும்.

ஏனென்றால் இந்த "வாவ்" இடை முகப்பை சில வருடங்களுக்கு முன்னரே அவர்கள் விதம்விதமாக லினக்சில் பார்த்துவிட்டார்கள்.

இரண்டு வருடங்களுக்கு முன்னர் சன் மைக்ரோசொஸ்டத்தின் ஜாவா தொழிநுட்பத்தில் அமைந்த Looking Glass என்ற முப்பரிமாண இடைமுகப்பு லினக்சுக்கு வந்தது. கொஞ்சம் வலுக்கூடிய கணினிகளில் இதனை நிறுவி பயன்படுத்த முடியும்.

பின்னர் வலுக்குறைந்த வரைகலை அட்டைகளிலும் சீரிய இடைமுகப்பு ஜாலங்களை காண்பிக்கும் சவாலை நொவெல் நிறுவனத்தின் xgl தொழிநுட்பம் முறியடித்தது. அத்தொழிநுட்பத்தை நொவெல் திறந்தமூலமாக்கியதும் பல்வேறு செயற்றிட்ட முன்னெடுப்புக்களோடு இத்தொழிநுட்பம் பாரிய வளர்ச்சியை கண்டது.

சாதாரண வரைகலை அடைகளை பயன்படுத்தி மிக அழகான பிரமாண்டமான இடைமுகப்பு ஜாலங்களை AIGL , XGL போன்றன இன்று தரவாரம்பித்துவிட்டன.

இதில் அண்மைய வரவு Beryl.

இதோ பெரில் குறித்த ஆங்கில விக்கிபீடியா கட்டுரை!

அட்டகாசமான பெரில் இடைமுகப்பை மிக இலகுவாக உங்கள் லினக்ஸ் கணினிகளில் நிறுவி அனுபவிக்கலாம்.

பெரிலை நிறுவும் படிமுறைகள் இதோ,

பொதுவான கையேடுகள்

உபுண்டுவிற்கானது

விஸ்டாவின், அதன் கூட்டாளிகளின் வியாபார நோக்கிலான இடைமுகப்பையும் அதற்கென வாங்கவேண்டியிருக்கும் பெருஞ்செலவுடனான அட்டைகள், நினைவகங்களையும் பார்த்து "பழிப்பம்" காட்டிவிட்டு பெரிலை நிறுவுங்கள்.

உங்கள் விஸ்டா நண்பர்களை அதிரச்செய்யுங்கள்.

வின்டோசின் format சடங்கும் GRUB இனை மீள நிறுவுதலும்.

2007-03-02T20:44:00.000+05:30

வின்டோஸ், லினக்ஸ் இரண்டையும் கணினியில் நிறுவி வைத்துப் பயன்படுத்துபவர்கள் இந்தப்பிரச்சினையை அடிக்கடி எதிர்கொள்வீர்கள்.

அபரிமிதமான வைரஸ் தாக்குதல், இயக்குதளத்தின் வேகம் குறைதல் போன்ற பிரச்சினைகளுக்கு வின்டோஸ் அடிக்கடி ஆட்பட்டுவிடும். அதனால் மாதத்துக்கு ஒருமுறையாவது வின்டோசை மீள நிறுவலாமா என யோசிக்க ஆரம்பித்துவிடுவீர்கள்.

ஆனால் லினக்சுக்கு வைரஸ் தாக்குதலோ, அடிக்கடி மீள நிறுவ வேண்டிய அவசியமோ இருக்காது. வருடக்கணக்கில் நிறுவும் போது இருந்த மாதிரியே அழகாக வேலை செய்யும்.

இங்கேதான் பிரச்சினை எழுகிறது.

வின்டோசை தனியாக அழித்து மீள நிறுவிக்கொள்ளும்போது கணினியை ஆரம்பித்தால் அது எந்த கேள்வியும் இல்லாமல் வின்டோசினையே ஆரம்பிக்கும்.

எந்த இயக்குதளத்தை ஆரம்பிக்கப்போகிறீர்கள் என்ற பட்டியலைத் தொடக்கத்தில் காட்டாது.

அந்தப்பட்டியலை காட்டுவதுதான் தொடக்க இயக்கி, அதாவது boot loader. இன்றைக்கு வரும் பெரும்பாலான லினக்ஸ் வழங்கல்கள் GRUB இனையே தொடக்க இயக்கியாக நிறுவித்தருகின்றன.

வின்டோசை மறுபடி நிறுவும் போது என்ன ஆகிறதென்றால், அது லினக்ஸ் உங்கள் MBR இல் எழுதிவைத்த தொடக்க இயக்கியை அழித்து துடைத்துவிட்டு, உங்களை எந்த கேவியும் கேட்காமல், உங்கள் கணினியிலிருக்கும் மற்றைய இயங்குதளங்களைக் கண்டுபிடிக்கும் வல்லமையற்ற தனது தொடக்க இயக்கியை நிறுவி விடுகிறது.

அடுத்த முறை கணினியை தொடக்கும்போது கணினி இயல்பாக வேறு வழியில்லாமல் உங்களை எதுவும் கேட்காமல் வின்டோசையே ஆரம்பிக்கிறது.

அபப்டியானால், நீங்கள் ஏற்கனவே நிறுவி வைத்துப் பயன்படுத்திக்கொண்டிருந்த லினக்ஸ் இயங்குதளத்தை எப்படி பயன்படுத்துவது?

GRUB இனை மீள நிறுவிக்கொள்வதன்மூலம் இந்தப் பிரச்சினையை நீங்கள் தீர்த்துக்கொள்ளலாம்.

கீழுள்ள படிமுறைகள் GRUB இனை மீள நிறுவிக்கொள்ளும் வழிமுறைகளை விளக்குகிறது.

தேவையான பொருட்கள்: தேனீர், Gparted அல்லது cfdisk நிறுவப்பட்ட ஏதாவதொரு நிகழ்வட்டு (ubuntu வினை பரிந்துரைக்கிறேன்)
படங்கள் அனைத்தும் உபுண்டு நிகழ் வட்டினைப் பயன்படுத்தி இதனை செய்வதைக் காட்டுகிறது.

1. உங்கள் கைவசமிருக்கும் நிகழ்வட்டினை (LIVE CD) தொடக்கி ஏதாவதொரு லினக்ஸ் சூழலை பெற்றுக்கொள்ளுங்கள்.

(நிகழ்வட்டு என்றால் என்ன, அதை எப்படி தொடக்குவது என்று இங்கே கேட்டால் அடி விழும்! போய் விக்கிபீடியாவில் கேட்டுக்கொள்ளுங்கள்)

2. GParted இனை ஆரம்பியுங்கள்.

3. வின்டோஸ் இனை நிறுவிவைத்திருக்கும் வகிர்வினை (partition) படத்தில் காட்டப்பட்டவாறு இடது புறம் சொடுக்குங்கள்.

4. manage flags என்பதை தெரிவு செய்யுங்கள்.

5. படத்தில் காட்டப்பட்டவாறு boot என்பதை தெரிவகற்றுங்கள்.

6. நீங்கள் ஏற்கனவே லினக்சின் மூல அடைவினை (/) இனை நிறுவிவைத்திருக்கும் வகிர்வை ( partition) வலப்புறம் சொடுக்குங்கள்

7. manage flags என்பதை தெரிவு செய்யுங்கள்

8. boot என்பதை தெரிவு செய்யுங்கள்.

இப்போது மாற்றங்கள் பதிவாகும். இதையே cfdisk கொண்டும் செய்யலாம். cfdisk பயன்படுத்தத்தெரிந்தவர்களுக்கு இப்படி படிமுறைகளை எல்லாம் விளக்க வேண்டியிராது என்று நம்புகிறேன்.

9. முனையத்தை திறந்து வைத்துக்கொள்ளுங்கள் ( terminal)

10. முனையத்தில் sudo grub என ஆணையிடுங்கள் (உபுண்டு என்பதால் sudo. பொதுவாக நிர்வாக அனுமதியுடன் இதை செய்ய வேண்டும் என்பது சட்டம். (root access))

11. இப்பொழுது grub> என்று சொல்லிக்கொண்டு நிற்கும்.

12. அதில் find /boot/grub/stage1 என்ற ஆணையை வழங்குங்கள்.

இந்த படிமுறை நீங்கள் எங்கே grub இனை நிறுவி வைத்திருக்கிறீர்கள் என்பதைக் கண்டு பிடித்துச் சொல்லும்.

எடுத்துக்காட்டாக, (hd0,0) என்று கண்டுபிடித்திருக்கிறது என்று வைத்துக்கொள்ளுங்கள்.

13. இப்பொழுது root (hd0,0) என்ற ஆணையை வழங்குங்கள்.

14 setup (hd0) என்ற ஆணையை இப்போது வழங்கி grub இனை மீள நிறுவிக்கொள்ளுங்கள்.

15 அவ்வளவு தான். இனி QUIT என்ற ஆணையை வழங்கி grub செயலியை நிறுத்துங்கள்.

அடுத்தமுறை நீங்கள் கணினியை தொடங்கும்போது உங்கள் கணினியில் இருக்கும் எல்லா இயக்குதளங்களும் ஆரம்பத்திலேயே பட்டியலிடப்படும். வேண்டியதை தெரிவு செய்து தொடக்கலாம்.

இது தொடர்பான கேள்விகள், மேலதிகமாக சேர்க்கப்படவேண்டிய குறிப்புக்கள் இருந்தால் பின்னூட்டமிடுங்கள்.

இலங்கையின் CDMA பயனரும் லினக்சும்

2007-03-02T15:08:00.000+05:30

இலங்கையில் கொழும்புக்கு வெளியே வாழும் அதிகளவான மக்களிடம் சென்று சேரக்கூடிய செலவு குறைந்த ஒரே ஒரு இணையத்தொடர்பு தொழிநுட்பம், CDMA தொலைபேசி வழியாக இணைப்பை ஏற்படுத்துவதுதான்.

கொழும்பிலும் கூட slt தொலை பேசி ஒன்றினை வைத்திருக்காதவர்களுக்கு இந்த தொழிநுட்பமே உதவி புரிகிறது.

இலங்கையில் லினக்சை பரந்தளவில் அறிமுகப்படுத்துவதற்கு தடையாக இருந்த காரணிகளுள் முக்கியமானவை இந்த CDMA மோடத்தின் இயக்கிகளை லினக்சில் நிறுவிக்கொள்ளுதல் மற்றும் அதனூடாக அழைத்து இணைக்கும் முறைய விளங்கப்படுத்துதல் சற்று சிக்கலானதாக இருந்தமைதான்.

இவ்வளவு காலமும் அங்கொன்று இங்கொன்றாக சில வழிகாட்டிகள் வந்திருந்தாலும், எமது இலங்கை லினக்ஸ் பயனர் குழுமத்தை சேர்ந்த இந்த நண்பர் தயாரித்துள்ள வழிகாட்டி மிக எளிமையானதாகவும் பயனுள்ளதாகவும் இருக்கிறது.

இவ்வழிகாட்டி, suntel, lankabel ஆகிய சேவைகள் வழியாக தொடர்பை ஏற்படுத்துபவர்களுக்கானது.

சரியில்லை. ஆனாலும் வழியில்லை Flash player 9 for GNU/Linux

2006-11-03T18:09:00.000+05:30

இதற்கு முந்தைய பதிவொன்றில் flash player மென்பொருளின் ஒன்பதாம் பதிப்பு க்னூ/லினக்ஸ் இயங்குதளங்களுக்கு இல்லாதிருந்தமையால் இந்த பிரச்சனையை எதிர்கொள்ளும் மாற்று வழிமுறை பற்றி சொல்லியிருந்தேன்.

இப்போது அந்த மென்பொருளின் ஒன்பதாம் பதிப்பு சோதனைப்பதிப்பாக க்னூ/லினக்ஸ் இயங்குதளத்துக்க்கு கிடைக்கிறது.

தனியுரிமை மென்பொருளாக இருக்கிற, மூடிய ஆணைமூல flash மென்பொருட்கள் எமக்கு கிடைப்பதை இட்டு மகிழ்வதற்கு எதுவுமில்லை. உண்மையில் இது க்னூ/லினக்ஸ் இயங்குதளத்தை தத்துவரீதியாக மாசுபடுத்தி பலவீனப்படுத்தவே உதவும்.

இருந்தாலும் flash இணைய உலகை ஆக்கிரமித்துக்கொண்டிருக்கும் தொழிநுட்பம்.

மிக அண்மையில் இணையத்தில் நிகழ்ந்த புரட்சிகர மாற்றமான நிகழ்பட பகிர்வு வலையமைப்புக்கள் ( Video Sharing Networks) தமது வினைத்திறன் மிக்க தொழிநுட்ப அடிப்படையாக flash தொழிநுட்பத்தையே கைக்கொள்ளுகின்றன.

flash தவிர்க்கமுடியாததாக மாறிக்கொண்டிருப்பதால்தான் கட்டற்ற flash மென்பொருட்களை உருவாக்கும் முயற்சியை கட்டற்ற மென்பொருள் அமைப்புக்கள் வலுவாக ஆதரிக்கின்றன.

----

flash 9 இன் சோதனைப்பதிப்பை உங்கள் க்னூ/லினக்ஸ் இயங்குதளத்தில் நிறுவிக்கொள்வது மிக இலகுவானது.

பின்வரும் படிமுறைகளை பின்பற்றினால் சரி.

1. flash 9 Mozilla plug in இனை இங்கே தரவிறக்கிக்கொள்ளுங்கள்

2. நெருக்கப்பட்ட அந்த பொதியினை tar zxvf FP9_plugin_beta_101806.tar.gz ஆணையினை பயன்படுத்தி பிரித்தெடுத்துக்கொள்ளுங்கள்

3. பிரித்தெடுக்கப்பட்டபின்னர் உங்களுக்கு libflashplayer.so என்ற கோப்பு கிடைக்கும்

4. அக்கோப்பினை உங்கள் /home அடைவில் உள்ள .mozilla எனும் மறைக்கப்பட்ட அடைவினுள் plugins என்ற உப அடைவினுள் போட்டுக்கொள்ளுங்கள். அப்படி ஒரு அடைவு இல்லாவிட்டால் அதனை உருவாக்கிக்கொள்ளுங்கள்.

5. Mozilla அல்லது Firefox உலாவியினை நிறுத்தி மீண்டும் தொடக்கிக்கொள்ளுங்கள்.

(மேலதிக விளக்கங்களுக்கு read me கோப்பினை படிக்கவும்.)

இப்போது நீங்கள் flash 9 இனை பயன்படுத்தி அமைப்பட்டிருக்கும் வலைத்தளங்களை நிகழ்படங்களை பார்வையிட முடியும்.

metacafe நிகழ்பட பகிர்வு வலைத்தளத்தில் flash 9 மூலம் காண்பிக்கப்படும் நிகழ்படத்தை பார்வையிடுவதை இந்த படம் காண்பிக்கிறது.

இம்முறை அடோப் நிறுவனம் standalone flash player இனையும் க்னூ/லினக்சுக்கு தருகிறது.
இந்த தனித்தியங்கும் flash இயக்கிதான் மிகவும் ஆர்வமூட்டக்கூடியதாக இருக்கிறது.

flash கொப்புக்களை (swf போன்றன) இந்த இயக்கி மூலம் நீங்கள் பார்வையிடலாம். ஆனால் மிக முக்கியமான வசதி என்னவென்றால் நீங்கள் பார்வையிடும் கோப்புக்களை projector பவிவில் சேமித்து வைத்துக்கொள்ள முடியும் என்பதுதான்.

இது இவ்வளவு நாளும் வின்டோஸ் இயங்குதளத்துக்கு இருந்தது.

flash கோப்புக்களை exe .கோப்புக்களாக சேமித்து வைத்துக்கொள்ள முடியும். அந்த .exe கோப்பினை இயக்குவதன்மூலம் flash player இல்லாத கணினிகளில் கூட அவற்றை நீங்கள் பார்வையிட முடியும்.

இப்போது இந்த வசதி எமக்கும் கிடைத்திருக்கிறது.

எமக்கு .exe இல்லையே/ எப்படி இது நிகழும்?

எமக்கு flash கோப்புக்களை இருமக்கோப்புக்களாக (binaries) சேமிக்கும் வசதியை தந்திருக்கிறார்கள். இயக்கக்கூடிய இருமக்கோப்புக்கள் ( executable binaries).

இவ்வாறு சேமிக்கபப்டும் இருமக்கோப்புக்களிலுள்ள flash நிகழ்படத்தை flash player இல்லாத க்னூ/லினக்ஸ் கணினிகளில் கூட ./ ஆணையை பயன்படுத்தி இயக்குவதன்மூலம் பார்வையிடலாம்.
மிக நல்ல வசதி தானே?

எனக்கு உண்மையிலேயே இது ஆர்வமூட்டுகிறது.

பின்வரும்படம், இவ்வாறான இருமக்கோப்புுக்கள் flash player இல்லாத நிலையில் இயக்கிப்பார்க்கப்படுவதையும் காண்பிக்கின்றது.

Bootable floppy ஒன்றை Bootable CD ஆக்குவது எப்படி?

2006-10-18T04:03:00.000+05:30

தற்போது ஏற்றுக்கொண்டிருக்கும் ஒரு பணி நிமித்தமாக மிகப்பழைய கணினிகளை கையாளும் பேறு கிடைத்திருக்கிறது.

வின்டோஸ் அடிமை உலகினால் தூக்கியெறியப்பட்ட "காலங்கடந்த" கணினிகளில் க்னூ/லினக்சை நிறுவி அவற்றுக்கு மறுவாழ்வு கொடுக்கும் செயன்முறை ஆய்வு.

இதில் நான் பெற்றுக்கொண்ட அறிவினை அடுத்ததடுத்து வரும் பதிவுகளில் பகிர்ந்துகொள்கிறேன்.

Floppy என்று ஒரு பொருள் முன்னர் பாவனையிலிருந்திருக்கிறது. (!)
அதனை நெகிழ்வட்டு என்று தமிழில் அழைத்தார்கள். அதில் தரவுகளை சேமிக்க, சேமித்து கொண்டுசெல்ல, கணினிக்கு வழங்க முடியும். இறுவட்டுக்களின் வருகைக்கு சற்றே முற்பட்ட காலப்பகுதிகளில் இது பாவனையிலிருந்திருக்கிறது.

தனது இறுதிக்காலப்பகுதியில் இந்த நெகிழ்வட்டு பழைய கணினிகளை தொடக்குவதற்கு பயன்பட்டிருக்கிறது. தொடக்கிவைக்கும் வட்டுக்களாக. அதாவது bootable disk.

பென்டியம் 1 இற்கு முன்னர் வந்த பழைய கணினிகளில் இணைய உலாவல் செய்ய, படம் பார்க்க, பாட்டுக்கேட்க இன்னும் சில சில அடிப்படை பணிகளை செய்ய க்னூ/லினக்ஸ் மிகுந்த உதவிகளை செய்கிறது.

Basic Linux என்று ஒரு வழங்கல். இதனை பயன்படுத்தி அரதப்பழைய கணினிகளில் கூட புதிய மென்பொருட்களை (opera browser உள்ளிட) நிறுவி வேகமாக பணியாற்ற முடியும். இதனை கணினி ஒன்றில் நிறுவியோ, நிறுவாமலோ பயன்ப்டுத்த bootable floppy disks தேவை.

இந்த அருமையான வழங்கல் பற்றி பிறகு உரையாடுவோம்

என்னுடைய கணினியிலோ நெகிழ்வட்டு இயக்கியே இல்லை. வீட்டில் இந்த வழங்கலை பரீட்சித்துப்பார்க்க qemu வைதான் பயன்படுத்த வேண்டியிருக்கிறது.

நெகிழ்வட்டுக்கள் அவ்வளவு நம்பகமானவை அல்ல. நாளைக்கு நான் இந்த வழங்கலை நிறுவ வேண்டிய கணினியில் இறுவட்டு இயக்கி இருக்கிறது. நெகிழ்வட்டுக்கள் விலை அதிகம்.

என்ன செய்யலாம்?

இந்த "தொடக்கும் நெகிழ்வட்டுக்களை" "தொடக்கும் இறுவட்டுக்களாக" மாற்றிக்கொள்வதுதான் பிரச்சனைக்கு தீர்வு.

எப்படி இதனை செய்வது என்று தேடிக்கொண்டிருந்தபோது mkisofs என்ற சிறு உரைவழி மென்பொருள் கிடைத்தது.

அநேகமாக தற்போதைய க்னூ/லினக்ஸ் வழங்கல்கள் எல்லாம் இம்மென்பொருளை கொண்டிருக்கும் என்றே நம்புகிறேன். இது cdrecord மென்பொருளோடு வரும் cdrecord இல்லாத வழங்கல்களே தற்போது இல்லை. இல்லாவிட்டால் நீங்கள் தரவிறக்கி நிறுவிக்கொள்ளலாம்.

பின்வரும் படிமுறைகள் மூலம் நீங்கள் தொடக்கத்தக்க இறுவட்டினை உருவாக்கலாம்.

1. முதலில் உங்கள் பணிகளுக்கென ஒரு அடைவினை உருவாக்கிக்கொள்ளுங்கள். [ mkdir convert ]

2. முனையதில் அந்த அடைவிற்குள் நுழையுங்கள் [ cd convert/]

3. இப்போது நீங்கள் மாற்றவேண்டிய bootable floppy image இனை convert என்ற அடைவினுள் போட்டுவிடுங்கள். (இக்கோப்பு .IMG என்ற பின்னொட்டுடன் இருக்கும்)

4. பின்வரும் ஆணையை இயக்குங்கள்.

mkisofs -pad -b DISK.IMG -R -o cd.iso DISK.IMG

வெளியீடாக நீங்கள் cd.iso என்ற bootable cd image இனை பெற்றுக்கொள்வீர்கள்.

அந்த இறுவட்டு பிம்பத்தினை இறுவட்டாக எழுதிக்கொள்வதன்மூலம் நீங்கள் இப்போது உங்கள் பணிக்கு தேவையான bootable disk இனை பெற்றுக்கொண்டுவிட்டீர்கள்.

iso பிம்பம் ஒன்றினை இறுவட்டாக எழுதிக்கொள்வது எப்படி என்று உங்களுக்கு தெரிந்திருக்கும் என்றே நம்புகிறேன்.

ஜெயா tv கண்ணாடியை வைத்து லினக்சில் ஒரு விளையாட்டு

2006-10-07T23:39:00.000+05:30

Anaglyphs!

ஜெயா தொலைகாட்சியின் உபயத்தில் இன்று தெரிந்தோ தெரியாமலோ எல்லோரும் இந்த தொழிநுட்பத்தோடு நெருக்கமாகிவிட்டோம்.

மிகவும் செலவு குறைவான பயனர் நிலை உபகரணங்களை கொண்டு காட்டப்படக்கூடிய முப்பரிமாண படங்கள் இத்தொழிநுட்பத்தையே கொண்டிருக்கின்றன.
பயனருக்கு தேவையானதெல்லாம் ஒரு சிவப்பு, நீல/பசும்நீல கண்ணாடிகளை பொருத்திய மூக்கு கண்ணாடி.

மிட்டாய் தாள்களையோ, நிறமூட்டிய கண்ணாடித்தாள்களையோகொண்டு இதனை நாமே இலகுவாக வீட்டில் தயாரித்துக்கொள்ளலாம்.

மாயாவி தொடரை இப்பொழுதுதான் பார்த்துவிட்டுவந்தேன்.

தொழிநுட்பரீதியான நிறைய போதாமைகளோடு ஏறத்தாழ நல்ல முப்பரிமாண ஜாலத்தை தந்தது.

இந்த தொழிநுட்பம் பற்றிய தேடல்களில் நிறைய சேகரித்து வைத்திருக்கிறேன். யாராவது anagliphs என்பதற்கு நல்ல தமிழ் கலைச்சொல்லை உருவாக்கித்தந்தால் விக்கிபீடியாவில் ஒரு கட்டுரை போடுகிறேன்.

சரி,

ஜெயா தொலைக்காட்சிக்கென வாங்கிய (ஐம்பது ரூபாய்க்கு விற்றார்கள்) கண்ணாடி வாரத்துக்கு ஆறு நாட்கள் சும்மா கிடப்பதா? பெரிய அநியாயமல்லவா?
சிலர் ஆனந்தவிகடனுக்கென்று வாங்கியதையே இன்னும் வைத்துக்கொண்டிருப்பார்கள்.

வலையை மேய்ந்ததில் இந்த தொழிநுட்பத்தை பயன்படுத்தும் எண்ணற்ற வீடியோக்களும் படங்களும் கிடைத்தன. பார்த்து ரசித்து பொழுதுபோக்கிக்கொண்டிருக்கிறேன்.

சரி எல்லா பரிசோதனைகளையும் தயங்காமல் செய்துபார்க்கும் நம்ம திறந்தமூல சமூகம் இதை வைத்து என்ன செய்திருக்கிறது?

இருக்கவே இருக்கிறது ஒரு 3D காரோட்ட விளையாட்டு.

Trigger!

ஜெயா tv கண்ணாடியை அணிந்துகொண்டு இதனை விளையாடினீர்கள் என்றால் மெய்யாகவே காரோட்டுவது போன்ற ஆழ, நீள, அகல பரிமாணங்களுடன் வியப்பான அனுபவம் கிடைக்கும்.

கார் மரங்களுக்குள்ளால் போகும்போது இலைகள் உங்கள் கண்ணுக்கருகில் வந்து பயமுறுத்தும்.

விளையாடலாமா/

நீங்கள் உபுண்டு லினக்ஸ் பயன்படுத்துபவராக இருந்தால் மிக எளிதாக இந்த விளையாட்டினை இறுவிக்கொள்ளலாம்.

(எல்லா repositiries உம் செயற்படுத்தப்பட்டுள்ளனவா என்று பார்க்கவும்)

sudo apt-get install trigger

அவ்வளவுதான்

சில நிமிடங்களுள் உங்கள் கணினியில் இந்த விளையாட்டு தயார் நிலையில் இருக்கும்.

ஏனைய வழங்கல்களை பயன்படுத்துபவர்கள், உங்கள் வழங்கல்களுக்கான பொதிகளையோ அல்லது மூலப்பொதியையோ இவ்விளையாட்டு மென்பொருளின் வலைமனையிலிருந்து தரவிறக்கிக்கொள்ளுங்கள்.

நிறுவியவுடன் விளையாட்டை ஆரம்பித்தீர்களானால் சாதாரண விளையாட்டைப்போன்றே இருக்கும்.

முப்பரிமாண ஜாலத்தை பெறுவதற்கு இவ்விளையாட்டுக்குரிய அமைப்புக்கோப்பினை திருத்த வேண்டும்.
இக்கோப்பு உங்கள் home அடைவில் புள்ளியிடப்பட்ட மறைந்து அடைவொன்றுக்குள் இருக்கும்.

home அடைவினுள்

.trigger/trigger.config

என்பதே அந்த கோப்பு.
அதனை திறந்துவைத்துக்கொள்ளுங்கள்.

பின்வரும் வரிகளை தேடுங்கள்.

stereo="none"
stereoeyeseparation="0.07"
stereoswapeyes="no"

அவற்றை பின்வருமாறு மாற்றிக்கொள்ளுங்கள்

stereo="red-cyan"
stereoeyeseparation="0.07"
stereoswapeyes="yes"

கோப்பினை சேமித்துவிட்டு

மறுபடி trigger விளையாட்டினை ஆரம்பித்தீர்களானால், சிவப்பு-நீல கலங்கலாக உருவங்கள் காணப்படும்.
எடுங்கள் உங்கள் ஜெயா tv கண்ணாடியை.

அணிந்துகொண்டு விளையாடுங்கள்.

புதிய விளையாட்டு அனுபவம் காத்திருக்கிறது!

எந்தக்கண்ணுக்கு எந்த நிறக்கண்ணாடி என்பதை திரைக்கென படங்களை தயாரிப்பவர்கள் பயன்படுத்திய முறையே தீர்மானிக்கிறது.

எனவே சரியான முப்பரிமாணம் கிடைக்கவில்லையானால், கண்ணாடிகள் இடம் மாறி வரும்படி கண்ணாடியை மாற்றி அணிந்துகொள்ள வேண்டும்.
(காகித அட்டையில் செய்யப்பட்ட கண்ணாடியை இலகுவாக மறுவலம் மடிக்கலாம்)

வெவ்வேறு வலைத்தளங்கள் தந்த முப்பரிமாணப்படங்களுக்கு வேவ்வேறு முறைமள் உண்டு சிலவேளை சிவப்பு இடக்கண்ணிற்கு வரவேண்டியிருக்கிறது, சிலவேளை வலக்கண்ணுக்கு வரவேண்டியிருக்கிறது. கவனிக்க.

இந்த பதிவில் உள்ள படங்களை ஜெயா தொலைகாட்சி கண்ணாடியை அணிந்துகொண்டு பாருங்கள். இங்குள்ள படங்களுக்கு சிவப்பு கண்ணாடி இடதுபுறம் வரவேண்டும்.

Flash 8 or later... நாங்கள் என்ன செய்வது?

2006-09-28T21:19:00.000+05:30

இந்த வின்டோஸ் மய உலகத்தில் இப்போது அடிக்கடி வலைத்தளங்களுக்கு போகும்போது அவை flash player 8 இனை கேட்டு உயிரை எடுக்கின்றன.

இல்லாத ஒன்றுக்கு எங்கே போவது? அடோப் நிறுவனமோ இதோ வருது இந்தா வந்திட்டு flash 9 for linux என்று பூச்சாண்டி காட்டிக்கொண்டு இருக்கின்றது. ஆனால் இன்னமும் flash 7 மட்டும்தான் எமக்கு.

இப்போதைக்கு தற்காலிகமாக இந்த பிரச்சனைக்கு எப்படி தீர்வைக்காணலாம்?

என்னுடைய பரிசோதனைகளின்படி wine ஐ பயன்படுத்தலாம் என்ற முடிவுக்கு வந்திருக்கிறேன்.

flash player ஆனது வின்டோஸ் பதிப்பான உலாவிகளுக்கு வின்டோஸ் இயங்குதளத்தில் இயக்க வழங்கப்படுகிறது.
சரி நாங்கள் அவர்கள் வழியிலேயே போவோம். firefox இன் வின்டோஸ் பதிப்பையே லினக்சில் நிறுவிக்கொள்வோம்.வின்டோஸ் பதிப்பா/ வின்டோசுக்கு எங்கே போவது?

இருக்கவே இருக்கிறது WINE எமது மெய்நிகர் திறந்த வின்டோஸ்.

WINE நிறுவிக்கொள்ளல் தொடர்பான விளக்கங்களை இந்த பதிவில் நான் உள்ளடக்கவில்லை. பின்னர் பிறிதொரு பதிவாக போடுகிறேன். அதுவரை அவர்களது வலைத்தளத்திலுள்ள உதவி ஆவணங்களை படித்து வைனை நிறுவிக்கொள்ளுங்கள். என்னால் தரக்கூடிய ஆலோசனை, wine நிறுவிக்கொண்ட பிறகு wine tools ஐயும் நிறுவி, அதன் உதவியோடு வின்டோசின் முக்கிய தளைகளை நிறுவிக்கொள்ளுங்கள்.

பின்வரும் படிமுறைகளூடாக flash பிரச்சனைக்கு நாம் தற்காலிக தீர்வினை கண்டடையலாம்.

1. உங்கள் லினக்சில் wine ஐ நிறுவிக்கொள்ளல்
2. wine tools ஐ பயன்படுத்தி முக்கிய வின்டோஸ் பாகங்களை நிறுவுதல்
3. firefox இன் அண்மைய வின்டோஸ் பதிப்பினை தரவிறக்குதல்
4. தரவிறக்கப்பட்ட .exe கோப்பினை wine கொண்டு திறந்து இயக்குதல். firefox நிறுவிக்கொள்ளப்படும்.

5. flash மென்பொருளை தரவிறக்குதல்

6. திறந்திருக்கும் எல்லா உலாவிகளையும் மூடிவிடுதல்
7.flash மென்பொருளின் .exe கோப்பினை wine கொண்டு திறந்து நிறுவுதல் (நிறுவல் முடிந்தது என்றெல்லாம் அது அறிவிக்காது. ஒரு progress bar தோன்றி மறைவதோடு நிறுவல் நின்றுவிடும். பயப்பட வேண்டாம்.

8. மேசைத்தளத்தில் உருவாகியிருக்கும் புதிய firefox windows version icon இனை சொடுக்கி வேண்டிய தளத்தை பார்வையிடலாம். தமிழ் தளங்கள் கேள்விக்குறிகளாகத்தான் தெரிகின்றன. வழியில்லை. உங்களுக்குத்தான் தரமான லினக்ஸ் firefox இருக்கின்றதே. பிரச்சனைகுரிய தளங்களை பார்க்க மட்டும்தான் windows firefox.

சிலவேளை நாளைக்கே அடோப் நிறுவனம் flash 9 இனை லினக்சுக்கு தரலாம். அப்போது இந்த பதிவு காலாவதியாகிவிடும். ஆனால் இந்த உத்தியினை பயன்படுத்தி எதிர்காலத்தில் இதுபோன்று எழும் சவால்களை நீங்கள் எதிர்கொள்ளமுடியும்.

istanbul: உங்கள் கணினித்திரையை சலனத்துடன் படம்பிடித்தல்

2006-09-20T02:54:00.000+05:30

அண்மையில் என் பதிவொன்றில் எனது கணினித்திரையை சலனப்படமாய் பிடித்து பிரசுரித்திருந்தேன்.

எப்படி அது படம்பிடிக்கப்பட்டது என்ற கேள்வி வரும் என எதிர்பார்த்திருந்தபோதும். யாரும் கேட்கவில்லை.

istanbul என்ற மென்பொருளை பயன்படுத்தியே அதை செய்தேன்.

இஸ்தான்புல் உபுண்டுவின் பொதிக்குவைகளுக்குள் ( repositories) இருக்கின்றது. உபுண்டு பயனர் அல்லாதவர்கள் இங்கே பெற்றுக்கொள்ளலாம்.

இதன் அண்மைய பதிப்பினை (0.2.1) நிறுவிப்பார்த்தேன். ஒலியையும் பதிவுசெய்யக்கூடியதாக அது இருந்தது. அத்தோடு ஏராளம் புதிய வசதிகள் காணப்பட்டன. ஆனால் அது சரியாக இயங்கவில்லை. அதனை எவரும் இப்போதைக்கு நிறுவ வேண்டாம். அது சரியாக வேலை செய்யாது. இறுதி பொதி வந்த பிறகு பயன்படுத்துங்கள்.

இப்போதைக்கு 0.1.1 பதிப்பு நன்றாக வேலை செய்கிறது. ஆனால் குரலை பதிவு செய்யும் வசதி இல்லை. குரலை தனியாக பதிவுசெய்து cinelerra போன்ற மென்பொருட்களை கொண்டு கலக்க வேண்டியிருக்கிறது.

வின்டோஸ் பயன்படுத்திய காலத்தில் இவ்வாறான திரையை படமெடுக்கும் மென்பொருட்களை பயன்படுத்தியிருக்கிறேன். அவற்றுள் சில உளவு மென்பொருட்கள். அத்தோடு நினைவகத்தை அடைத்துக்கொள்ளும். இதனால் படம் சரியாக பிடிக்கப்படாமல் தரம் குறைந்துபோகும்.

ஆனால் இஸ்தான்புல் மிகக்குறைந்த நினைவகத்தையே எடுத்துக்கொள்கிறது (57-58 மெகாபைட்) உயர்ந்த துல்லியத்துடன் படம் தருகிறது. (நான் கூகிள் வீடியோவில் தரவேற்றி தருவதால் துல்லியம் கணிசமாக குறைந்துபோகிறது.

பதிவுசெய்யப்பட்ட கோப்பின் அளவு அதிசயிக்கத்தக்க அளவில் மிகக்குறைவாகவே உள்ளது. வேண்டுமானால் நாங்களாகவே துல்லியத்தை குறைத்து கோப்பை சிறிதாக்கலாம்.

சலனப்பட ஊற்றாக (streaming) வழங்கிவழியாக நாம் மற்றவர்களுக்கு திரைக்காட்சி செய்யக்கூடிய வசதியும் இதில் உண்டு.

இது பல வழிகளில் எனக்கு உதவிக்கொண்டிருக்கிறது.

முக்கியமான வேலைகள், அமைப்புக்களை செய்யும்போது ஆவணப்படுத்தலுக்காக எல்லாவற்றையும் உடனுக்குடன் குறிப்பெடுத்துக்கொள்ள வேண்டிவரும். இது எரிச்சலூட்டுவதோடு நேரத்தையும் எடுத்து வேலையும் குழப்பும். இப்போது பிரச்சனையில்லை. இஸ்தான்புல்லை ஓடவிட்டுவிட்டு எமது வேலைகளை செய்யவேண்டியதுதான். எல்லாவற்றையும் அழகாக வீடியோப்படமாய் பிடித்துவைத்திருக்கும். ஆறுதலாக ஆவணப்படுத்திக்கொள்ளலாம். அல்லது வீடியோ ஆணமாகவே வைத்திருக்கலாம். (வீடியோவுக்கு "சலனப்படம்" என்பதைவிட வேறு நல்ல கலைச்சொல் ஏதாவது சொல்லுங்களேன்)

லினக்ஸ் உலகத்தில் இதை எப்படி செய்வது அதை எப்படி செய்வது என்று நச்சரிக்கும் அன்புத்தொல்லை மின்னஞ்சல்கள் அடிக்கடி வரும். உரைவழியாக விஷ்யங்களை விளக்குவது போதும் போதுமென்றாகிவிடுகிறது. இப்போது இஸ்தான்புல் இருக்கிறது. எப்படி செய்வது என்பதை செய்துகாட்டி படமாக பிடித்து மின்னஞ்சல் வழியாக அனுப்பிவிடலாம் (இப்போது அதைத்தான் செய்கிறேன் ;-)) அலது கூகிள் வீடியோவில் ஏற்றிவைத்துவிட்டு தொடுப்பு அனுப்பலாம்.

மாணவர்களுக்கு நேர்த்தியான விளக்கப்படங்களை உருவாக்கி கொடுக்கலாம்.

இது நேரடியாகவே சலனப்படத்தை ogg theora வடிவில் சேமிப்பதால் லினக்ஸ் பயனர்கள் எந்த பிரச்சனையும் இல்லாமல் அடிப்படை மென்பொருட்களை பயன்படுத்தியே கோப்பினை இயக்கிப்பார்க்கலாம். (வின்டோஸ்காரர்களைப்பற்றி என்ன கவலை?)

அருமையான இந்த மென்பொருளை இலவசமாகவும் திறந்தமூலமாகவும் தரும் இஸ்தான்புல்லின் விருத்தியாளர்களுக்கும். திறந்தமூல சமுதாயத்துக்கும் நன்றிகள் பல.

எனது webcam இயங்குக்கொண்டிருக்கும்போது இஸ்தான்புல் பிடித்தபடம்

Firefox பிரச்சனைக்கு ஒரு தற்காலிக தீர்வு

2006-09-17T13:47:00.000+05:30

Firefox இனை பயன்படுத்தி பழகிவிட்டால் மறுபடி IE பயன்படுத்துவதை நினைத்துக்கூட பார்க்கமுடியாது. (இது புரிந்துதானோ என்னவோ மைக்ரோசொப்ட் Forefox இனை அப்படியே ஈயடிச்சான் காப்பி அடித்து IE7 ஆக வெளியிடுகிறது) லினக்சில் கூட Epiphany ஓரளவு மாற்றாக இருந்தாலும் அதுவும் கூட மொசில்லா அடிக்கட்டுமானத்திலேயே இயங்குகிறது.

எழிலூட்டம் செய்யப்பட்ட (குறிப்பாக Justify) தமிழ் தளங்களை பார்வையிடும்போது Mozilla குடும்ப உலாவிகள் எழுத்துக்களை குதறிப்போட்டுவிடுகின்றன. வின்டோஸ் காரர்கள் என்றால் பரவாயில்லை அந்த பக்கங்களை மட்டும் IE இல் பார்த்துவிடலாம் அல்லது IE tab நீட்சியை நிறுவி சமாளிக்கலாம். லினக்ஸ்காரர்களுக்கு வழியில்லை. அநேகமாக லினக்ஸின் எல்லா உலாவிகளும் மொசில்லா அடிக்கட்டுமானத்தில்தான் இயங்குகின்றன். கான்கரரில் கூட இதே பிரச்சனை இருக்கிறது. என்னசெய்வது?

இன்றைக்கு காலை மின்னஞ்சல்கள் பார்க்கும்போது தமிழ்லினிக்ஸ் மடலாடற்குழுமத்திலிருந்து வந்த மடல் ஒன்று இதற்கான தீர்வை சொல்கிறது.
அநேகமாக இந்த பிரச்சனையால் அதிகம் பாதிக்கப்படும் தமிழ் வலைப்பதிவாளர்களுடன் அந்த தீர்வை பகிர்ந்துகொள்ள வேண்டிய அவசியத்தை உணர்ந்து இந்த பதிவை இடுகிறேன்.

(இக்குறிப்புக்கள் யாவும் சரவணனின் ஆங்கில வலைப்பதிவிலிருந்து எடுக்கப்பட்டவை)

1. firefox உலாவியை திறந்துவைத்துக்கொள்ளுங்கள்

2. இந்த நீட்சியை நிறுவிக்கொள்ளுங்கள்

3. உலாவியை மூடி திரும்ப திறந்துவைத்துக்கொள்ளுங்கள்

4. இந்த பக்கத்தை திறந்துவைத்துக்கொள்ளுங்கள்

தற்போது புதிய பதிப்பில் கீழே சிறப்புறுத்திக் காட்டப்பட்டுள்ள படிமுறைகள் அனைத்தையும் தன்னியக்கமாக்கிவிட்டார்கள். இவற்றை தற்போது கவனிக்கத்தேவையில்லை - [மு.மயூரன் 27-6-2007]

5. tools -> new user script என்பதை தெரிவு செய்யுங்கள். திறந்துவைத்திருக்கும் பக்கத்திலுள்ள நிரல் நிறுவப்பட்டு வெற்றிச்செய்தி காண்பிக்கப்படும்.

6. firefox இனை மீள ஆரம்பித்து பக்கத்தை திறந்தீர்களானால் எழுத்துக்கள் அழகாக தெரியும். எந்த பிரச்சனையும் இல்லை. (உலாவியின்
கீழ்பட்டையில் உள்ள சிரிக்கும் குரங்கு உருவம் சிரித்துக்கொண்டிருக்கிறதா என்பதை கவனியுங்கள்)

7. இப்பொழுது புதிய பிரச்சனை எல்லா வலைத்தளங்களின் எழிலூட்டங்களும் மாற்றப்பட்டுவிட்டது. ஆனால் உங்களுக்கு சில குறிப்பிட்ட தளங்களுக்கு மட்டுமே இம்மாற்றத்தை செய்யவேண்டும். என்னசெய்வது?

8. tools -> manage user scripts என்பதை தெரிவு செய்யுங்கள்

9. http* ftp* என இருக்கும் தெரிவுகளை எல்லாம் நீக்கிவிட்டு நீங்கள் பார்க்கவிரும்பும் வலைப்பக்க முகவரியை சேர்த்துக்கொள்ளுங்கள்.

10 குறித்த வலைத்தளத்தின் எல்லா பக்கங்களுக்கும் இவ்வசதி வேண்டுமானால், வலைத்தளத்தின் முதன்மை முகவரியை இட்டு அதன் முடிவில் நட்சத்திரக்குறி இடவேண்டும். எடுத்துக்காட்டாக, http://www.tamilsite.com*

இந்த வார தமிழ்மணம் நட்சத்திரத்தின் வலைப்பதிவை எப்படி சரியாக்கிப்பார்த்தேன் என்பதை படங்களில் பார்த்துக்கொள்ளுங்கள்.

qemu: ஒரு சலனப்படப்பதிவு

2006-09-13T01:47:00.000+05:30

qemu என்று ஒரு கட்டற்ற மென்பொருள் இருக்கிறது.

இதனை பயன்படுத்தி லினக்ஸ் இயங்குதளத்தில் இருந்தபடியே நீங்கள் இன்னொரு இயங்குதளத்தை அதே கணினியில் ஆரம்பித்து பயன்படுத்தலாம். (வேகம் உங்கள் கணினியின் வளங்களை பொறுத்தது).

பொதுவாக நாளாந்தம் வெளிவந்துகொண்டிருக்கும் லினக்ஸ் வழங்கல்களோடு விளையாடிப்பார்க்க அவற்றை ஒவ்வொரு முறையும் கணினியில் நிறுவிக்கொண்டிருக்க முடியாது. அந்த வேளைகளில் இம்மென்பொருளை பயன்படுத்தி மெய்நிகர் வெளியில் லினக்ஸ் இறுவட்டு ஒன்றினை boot செய்து பார்க்கலாம். நிகழ்வட்டுக்களை (live cds) இயக்கிப்பார்க்கலாம்.

அத்தோடு கணினியில் சேமிக்கப்பட்டிருக்கும் iso உருவத்தில் வைக்கப்பட்டிருக்கும் லினக்ஸ் வழங்கல்களை கூட boot செய்யலாம்.

இந்த படத்தில், என்னுடைய கணினியின் இயங்குதளத்தில் (ubuntu 6.06) இருந்தவாறு,
kubuntu live cd ஒன்றினை எப்படி boot செய்து பார்க்கிறேன் என்பதை காட்டியிருக்கிறேன்.

இங்கே காட்டப்படுவது qemu மென்பொருளின் மிக அடிப்படையான பயன்பாடுதான். இதனை பல்வேறு வழிகளில் மிக பிரயோசனமாக பயன்படுத்த முடியும்.

இம்மென்பொருள் பற்றிய விக்கிபீடியா பக்கம்

find எனும் அற்புத ஆணை.

2006-09-11T23:42:00.000+05:30

"இந்த உலகத்தை திரும்ப கண்டுபிடிக்கவேண்டியிருக்கிறது" என்று முன்பு நண்பர் ஒருவர் சொன்னார்.

இருக்கின்ற, கண்டுபிடிக்கப்பட்ட விடயங்களை நாம் கற்றுக்கொண்டு பயன்படுத்துவதற்கு தேவையான உழைப்பு, அவற்றை கண்டுபிடிப்பதற்கான நேரம், உழைப்பு போன்றதாக மாறிக்கொண்டிருக்கிறது என்பதே அதன் பொருள்.

உரைவழி ஆணைகளின் மகிமை stupid friendly இயங்குதளங்களை பயன்படுத்துபவர்களுக்கு அனுபவிக்க கிடைத்திருக்காது. உரைவழி ஆணைகள் மூலம் கருந்திரையின் முன்னால் உட்கார்ந்து அதிவேகமாக பணியாற்றும் அனுபவம் அவர்களுக்கு வாய்த்துமிருக்காது.

உரைவழி ஆணைகள் பற்றி இன்னும் ஏராளமான பதிவுகள் எழுதவேண்டியிருக்கிறது.

இன்றைக்கு மிகப்பொதுவாக நாம் பயன்படுத்தும் find ஆணையின் ஒரு சிறு வியத்தகு இயலுகை பற்றி பார்க்கலாம்.

find என்பது கோப்புக்களை தேடுவதற்கு பயன்படுத்தும் ஆணை.

------

google video, youtube போன்ற தளங்களிலிருந்து திருடிய கணிசமானளவு சலனப்பட கோப்புக்கள் என்னிடம் உள்ளன. அவை பொதுவாக flv வகை கோப்புக்கள். flash video வகை கோப்புக்களை mplayer இல் பார்க்கமுடியும் என்றாலும், முழுமையான பயன்பாட்டினை பெறமுடியாது. உதாரணமாக படத்தை வேகமாக ஓடவிடவோ, பட்டையை உருட்டி விரும்பிய இடத்திலிருந்து படத்தை பார்க்கவோ முடியாது.

அத்தோடு திறந்த ஆணைமூல வடிவங்களிலேயே என்னுடைய கோப்புக்களை வைத்திருக்க நான் விரும்புகிறேன். லினக்சில் கையாள்வதற்கு அது இலகுவானது. அத்தோடு எதிர்ப்பு புளகாகிதம் வேறு.

பொதுவாக ஊடகக்கோப்புக்களை மாற்றுவதற்கு ffmpeg , ffmpeg2theora போன்ற உரைவழி மென்பொருட்களை பயன்படுத்துவேன்.

என்னிடமுள்ள கோப்புக்களை ஒவ்வொன்றாக மாற்றிவைத்துக்கொள்ள மிகவும் சோம்பலாக இருந்தது.

மொத்தமாக ஒரு அடைவை அப்படியே மாற்றுவதற்கு ஏதேனும் வழி இருக்கிறதா என்று தேடிப்பார்த்தேன். பொருத்தமாக எதுவும் மாட்டுப்படவில்லை.

கடைசியில் நானாகவே ஒரு shell script இனை இதற்கென உருவாக்குவது என்ற முடிவுக்கு வந்தேன். script இல் ffmpeg2theora வை பயன்படுத்தி கோப்புக்களை மாற்றுவதற்கான செயற்பாட்டை எழுதுவது என்பது முடிவு. இதில் பல சிக்கல்கள் எழும். கோப்புக்கள் மீள மீள மாற்றப்படக்கூடாது. அத்தோடு ஒன்றுக்கு பின் ஒன்றாக மாற்றப்படவேண்டும். இதற்கு என்ன வழி?

இதுபற்றி நண்பர்களிடம் விசாரித்தபோதுதான், முழுமையான லினக்சை அடிப்படையாகக்கொண்ட தொலைக்காட்சியை நடத்திவரும் துறவி மெத்தவிகாரியிடமிருந்து பயனுள்ள குறிப்பொன்று கிடைத்தது.

find ஆணையில் இப்படியான வசதி ஒன்று இருக்கிறது என்பதே அது.

தேடிப்பார்த்தால். ஆம் இருக்கிறது. மிக மிக பிரயோசனமான வசதி.

கோப்புக்களை தேடுவது, தேடிப்பெறப்பட்ட கோப்புக்கள் மீது ஆணை ஒன்றினை செயற்படுத்துவது. இதற்கு -exec அல்லது -ok போன்ற ஆளிகளை (switches) பயன்படுத்தவேண்டும்.

script எதுவும் எழுதாமல் ஒரு வரியிலேயே எனக்கு தேவையான செயற்பாட்டினை பெற்றுக்கொண்டுவிட முடியும்.

இதோ ஆணை :

எடுத்துக்காட்டாக flv/ என்ற அடைவில் கோப்புக்கள் இருக்கின்றன என்று வைத்துக்கொள்வோம்.

find flv/ -name *.flv -exec ffmpeg2theora -v 10 {} \;

இந்த ஆணையை செயற்படுத்த ஒன்றன்பின் ஒன்றாக அழகாக நல்ல துல்லியத்துடன் கோப்புக்களை மாற்றிவைத்துவிட்டு நல்லபிள்ள்ளையாக உட்கார்ந்துவிடுகிறது.

இப்பொழுது இந்த ஆணையை பிரித்து பிரித்து விளங்கிக்கொள்ளலாம்.

find - தேடுக

flv/ - flv/ என்ற அடைவினுள்

-name - பெயராக

*.flv -.flv என்று முடியும் அத்தனை கோப்புக்களையும்

-exec - செயற்படுத்துக

ffmpeg2theora - இந்த மென்பொருளை

-v 10 - உயர் துல்லியத்துடன் (இது ffmpeg2theora மென்பொருளுக்குரிய ஆளி)

{} - கண்டுபிடிக்கப்படும் கோப்புக்களின் மீது செயற்படுத்துக

\; - எல்லா கோப்புக்களையும் செய்ற்படுத்தியவுடன் முடிக்க.

-ok என்ற ஆளியை -exec இற்கு பதிலாக பயன்படுத்தினீர்களானால் ஒவ்வொன்றாக உங்கள் அனுமதி பெற்று ஆணை கோப்புக்களின் மீது செயற்படுத்தப்படும்.

--------------

இது மிக சிறிய எடுத்துக்காட்டு மாத்திரம்தான். லினக்ஸ் உரைவழி ஆணைகளின் உலகத்தில் எத்தனையோ லட்சக்கணக்கான அதிசயங்கள் ஒளிந்திருக்கின்றன.

வின்டோஸ் வாசிகளுக்கு webcam காட்டுதல்

2006-09-06T01:16:00.001+05:30

கட்ந்த ஏப்ரல் மாதம் நண்பர் ஒருவர் எனக்கு webcam ஒன்று அன்பளித்தார். வாழ்க்கையில் இதற்கு முன்னர் சொந்தமாக நான் அதனை பயண்ன்படுத்தியது கிடையாது. வலை உலாவு நிலையங்களில் ஓரிருமுறை பயன்படுத்திப்பார்த்திருக்கிறேன். (என்னை நானே பார்த்துக்கொள்ள)

இப்படி ஒரு விளையாட்டுப்பொருள் கிடைத்ததும் எனக்கு விளையாட ஆசை வந்துவிட்டது. வழக்கமான பெரிய கேள்வி முன்னால் எழுந்தது. இது லினக்சில் இயங்குமா?

எப்படி பரீட்சிப்பது? முகம்பார்த்து உரையாடுவதற்கான லினக்ஸ் செயலி என்ன? மெய்நிகர் அலுவலகக்கூட்டங்கள் போடுவதற்கு லினக்ஸ் வைத்திருக்கும் தீர்வு என்ன? இருக்கவே இருக்கிறது "ekiga" (பழைய gnomemeeting). இந்த மென்பொருள் உபுண்டுவில் இயல்பிருப்பாகவே இணைக்கப்பட்டுள்ளது.
ekiga.net சென்று எனக்கென்று ஒரு sip முகவரியை பதிவுசெய்த பிற்பாடு புகுபதிகை செய்துகொண்டேன். ஆசை ஆசையாய் முகம்பார்க்க முயன்றால் , சோகம். நீலத்திரைதான் தெரிந்து. என் முகத்தை காணவில்லை. edit -> prefereces சென்று உள்ளீட்டு கருவிகளை பரீட்சித்தால் அங்கே இரண்டு கருவிகளை எகிகா காட்டுகிறது.

அடடா மற்றையது என்னுடைய தொலைக்காட்சி அட்டை. லினக்சில் இயங்க மறுக்கும் அந்த தொலைக்காட்சி அட்டையின் நீலத்திரை தான் தெரிந்துகொண்டிருந்தது. இன்னொரு தெரிவாக என்னுடைய webcam இன் சாதனப்பெயர் இருந்தது. அதனை தெரிவு செய்ய என் முகம் அழகாய் தெரிய ஆரம்பித்தது.

ஒருவாறாக பெரிய பிரச்சனை தீர்ந்தாகிவிட்டது. இன்னொரு லினக்ஸ் பயனருடன் ekiga வை பயன்படுத்தி முகம் பார்த்து உரையாடலாம்.

ஆனால் webcam வைத்திருக்கும் என் நண்பர்கள் எல்லோரும் வின்டோஸ் அல்லவா பயன்படுத்துகிறார்கள்? அவர்களோடு எப்படி முகம்பார்த்து உரையாடுவது? ekiga இன்னமும் தனது வின்டோஸ் பதிப்பினை வெளியிடவில்லை. யாகூ, எம் எஸ் என் எதுவுமே லினக்சுக்கு தமது மென்பொருட்களை தருவதில்லை. ஸ்கைப் இருக்கு ஆனால் அதன் லினக்ஸ் பதிப்பில் webcam வசதி இல்லை. yahoo, msn காரர்களோடு உரைவழி அரட்டயடிக்க பயன்படும் gaim இன்னமும் குரல், ஒளி ஆதரவை வழங்கக்காணோம். என்ன செய்வது?

முன்பே கேள்விப்பட்டிருந்த openwengo தொலைபேசியை பயன்படுத்திப்பார்க்கலாம் என்ற எண்ணத்தில் அதனை தரவிறக்கி நிறுவிக்கொண்டேன். நண்பர்களையும் அதன் வின்டோஸ் பதிப்பினை கட்டாயப்படுத்தி நிறுவிக்கொள்ளச்செய்தேன். ஆனால் ஒளி வழி உரையாடலுக்கு அழைப்பது எப்படி, என் வெப்காம் படத்தினை அவர்களுக்கு அனுப்புவது எப்படி என்று எனக்கு புரியவில்லை. இன்றுவரைக்கும் புரியவில்லை.

பெரிய மானப்பிரச்சனையாய் வேறு போய்விட்டது. webcam வாங்கித்தந்த நண்பர் அதனை நினைவுபடுத்தும்போதெல்லாம் பெரிய குற்றவுணர்ச்சியாகிக்கொண்டிருந்தது. அதை பயன்படுத்தி ஒரு நாளேனும் அவருக்கு நான் முகம் காட்டவில்லை. தனது அன்பளிப்பு எனக்கு பிடிக்காமல் நான் பயன்படுத்தாமல் விட்டுவிட்டேனோ என்று அவர் கவலைப்படுவாரோ என்ற எண்ணம் வேறு வாட்டியது.

இதென்னடா பெரிய சவாலாய் போய்விட்டது. ராணுவ நடவடிக்கையின் முனைப்போடு கூகிளை கலைத்துப்போட்டு தேடத்தொடங்கினேன். சில லினக்ஸ் குழுமங்களுக்கு எழுதி உதவி கேட்டேன். பலன் எதுவும் ஏற்படவில்லை.

சிறிய கீற்றாய் ஒரு வெளிச்சம் கிடைத்தது. microsoft netmeeting என்றொரு மென்பொருள் sip வரைமுறைக்கு ஆதரவளிக்கிறது என்று கேள்விப்பட்டேன். sip வரைமுறைக்கு ஆதரவிருந்தால் ekiga வினை பயன்படுத்தி வின்டோஸ் பயனருடன் உரையாடலாம். ஆனால் openwengo போன்ற அனுபவம்தான் இதிலும் கிடைத்தது. எப்படி பயன்படுத்துவது என்று புரியவில்லை. என்னிடமோ வின்டோஸ் இல்லை. நண்பர்களின் பொறுமைக்கும் அளவுண்டு. என்ன செய்யலாம்?

பாரிய தேடுதல் நடவடிக்கையின் பிற்பாடு kopete இல் ஒளிவழி உரையாடல் வசதி இருப்பதாக ஒரு செய்தி கிடைத்தது.

இந்த இடத்தில் kpoete பற்றி சில வார்த்தைகள் சொல்லவேண்டும்.

kopete என்பது gaim போன்ற ஒரு செயலி. KDE காரர்களின் தயாரிப்பு. யாகூ, எம் எஸ் என், கூகிள் டாக், ஏ ஓ எல் , ஜாப்பர் போன்ற பல்வேறு இணைய அரட்டை சேவைகளூடாகவும் இச்செயலியை பயன்படுத்தி அரட்டையடிக்கலாம்.

முன்னர் ஒரு சில தடைவைகள் இதனை பயன்படுத்தி பார்த்திருக்கிறேன். ஆனால் gaim இன் எளிமை பிடித்துப்போகவே அதனையே தொடர்ந்து பயன்படுத்தி வந்தேன் kopete இனை நாளடைவில் மறந்துபோய்விட்டேன்.

தகவல் கேள்விப்பட்டவுடன் என்னால் நம்ப முடியவில்லை. kopete இல் இப்படி ஒரு வசதி இருந்ததாய் எனக்கு நினைவில்லை. synaptic வழியாக என் dapperdrake இல் அதனை நிறுவிப்பார்த்தேன். ஒளி வழி உரையாடல் வசதி எதுவும் இருப்பதாய் தெரியவில்லை. ஆனால் preferebces இல் அமைப்புக்கள் இருக்கின்றன.

அட, இது என்ன புது பிரச்சனை.

kopete இன் வலைமனைக்கு சென்று பார்த்த போதுதான் புரிந்தது ubuntu வைத்திருக்கும் kopete பொதி சற்றே பழையது. ஒளிவழி உரையாடல் வசதி தற்போது சோதனையில் இருக்கும் பதிப்பிலேயே சேர்க்கப்பட்டிருந்தது.

மிகப்பிந்தைய பதிப்பொன்றினை மூல நிரலாக இறக்கி இருமவாக்கம் செய்யத்தொடங்கினேன் (compile) ஏறத்தாழ ரைமணி நேரத்துக்கும் மேலால் இருமவாக்கம் நிகழ்ந்து கடைசியில் வழுச்செய்தியுடன் முடிந்தது.

பிறகு அவர்கள் தமது வலைத்தளத்தில் தந்திருந்த உபுண்டு பொதியினை தரவிறக்கி நிறுவிக்கொண்டேன்.

ஆம் உண்மையிலேயே அது வேலைசெய்தது. எம் எஸ் என் வழியாக வின்டோஸ் காரர்களுக்கு எனது முகத்தை காண்பிக்கமுடிந்தது.

ஆனால் புது பிரசனை. யக்கூ புகுபதிகையாகிறதில்லை. (login)

தேடிப்பார்த்தால் அது குறிப்பிட்ட அந்த kopete பதிப்பிலிருக்கும் (0.12 beta 1) வழு என தெரியவந்தது.

அதற்கு முந்தைய பதிப்பிற்கு தரக்குறைப்பு செய்யவேண்டியிருந்தது.

ஒருவாறாக kopete 1.12.0 பதிப்பிற்கான உபுண்டு பொதியினை தரவிறக்கி நிறுவிக்கொண்டேன். எல்லாம் சுபம்.

அழகாக வேலை செய்கிறது.

பாருங்க.... எவ்வளவு அழகா அரட்டை அடிக்கிறேன்... (தந்திரோபாயமாக முகத்தை காட்டாமல் விட்டுவிட்டேனே!)

ஆக, வின்டோஸ் காரர்களுக்கு வெப்காம் காட்ட இருக்கவே இருக்கிறது kopete!

Firefox இல் தமிழ் எழுத்துக்கள் பிய்ந்து பிய்ந்து தெரிகின்றன.

2006-08-28T20:51:00.000+05:30

இப்பொழுதுதான் லண்டனில் இருந்து ஒரு நண்பர் தொலைபேசி வழியாக இந்த பிரச்சனைக்கு தீர்வு என்ன என்று கேட்டார். நான் அன்று பட்ட பாடு நினைவுக்கு வந்தது.

இந்த பிரச்சனைக்கான அடிப்படைக்காரணம், firefox நிறுவனம், சிக்கலான ஒருங்குறி எழுத்துக்களை கையாள்வதற்கான மென்பொருளான pango வுடனான தொடர்பை இயல்பிருப்பில் துண்டித்துவிட்டிருக்கிறது.

ஒவ்வொரு தடவை firefox ஆரம்பிக்கும்போதும் pango வுடனான தொடர்பு ஏற்படுத்தப்பட மாட்டாது.

இந்த துண்டிப்பு pango இலிருக்கும் வழுவொன்றின் காரணமாக ஏற்படுத்தப்பட்டதாக செவிவழியாக அறிந்திருக்கிறேன். உண்மை தெரியவில்லை.

open suse போன்ற வழங்கல்களில் அவர்கள் pango உடனான தொடர்பை தாமாக இயல்பிருப்பில் ஏற்படுத்தியிருக்கிறார்கள். அதனால் எழுத்துக்கள் இயங்குதளத்தை நிறுவிக்கொண்டவுடனேயே எந்த பிரச்சனையும் இல்லாமல் தெரிகிறது.

இப்போது உபுண்டுவில் இதனை நாம் கையால்தான் செய்யவேண்டியுள்ளது.

/etc/environment என்ற கோப்பினை திறந்து அதில் பின்வரும் ஆணையை சேர்க்கவேண்டும்

MOZ_ENABLE_PANGO=1

சேர்த்து சேமித்தபிறகு firefox இனை மூடி மறுபடி திறந்தால் தமிழ் எழுத்துக்கள் அழகாக தெரியும்.

தீ கீ போன்ற எழுத்துக்களின் விசிறி வித்தியாசமாக இருக்கும். பயப்படவேண்டாம். அது உபுண்டு இயல்பிருப்பாக வைத்திருக்கும் தமிழ் எழுத்துருவின் வடிவம். வழு எதுவுமில்லை. இந்த எழுத்துரு பிடிக்காவிட்டால் வேறு எழுத்துருக்களை firefox அமைப்புக்கள் பகுதிக்கு சென்று மாற்றி வைத்துக்கொள்ளுங்கள்.

பிறகுதான் கேள்விப்பட்டேன் pango இனை உயிர்ப்பூட்டும் இந்த செயன்முறையை நாம் கையால் செய்ய தேவையில்லை. language-support-ta என்று ஒரு பொதி உபுண்டுவிற்கென இருக்கிறது. அந்த பொது இந்த மாற்றம் உள்ளிட்ட தமிழ் பயனர்களுக்கு தேவையான பல மாற்றங்களையும் அமைப்புக்களையும் தானே செய்துதருகிறது. இதனை நிறுவிக்கொண்டால் போதுமானது.

repositories எல்லாம் செயற்படுத்தப்பட்ட பின்னர்,

sudo apt-get install language-support-ta

என்ற ஆணையை வழங்கினால் போதும். (இணைய இணைப்பு உள்ளவர்கள்)

முன்பொருமுறை வேறொரு நண்பர் இந்த பொதி நிறுவப்பட்ட பின்னரும் தனக்கு தமிழ் தெரியவில்லை என ரொம்ப கவலைப்பட்டார்.

பிறகுதான் கண்டுபிடித்தோம் அவர் பயன்படுத்தியது மெய்யான firefox இல்லை. அதன் மூல நிரலிலிருந்து வேறு ஒரு நிறுவனத்தால் இருமவாக்கம் செய்யப்பட்டு வெளியிடப்படும் swiftfox என்று.

ஆக, swiftfox இல் தமிழ் தெரியாது.

சூரியன் டொட் கொம் இற்கு நன்றி.

2006-08-28T18:19:00.000+05:30

பொதுவாக க்னூ லினக்ஸ் பயனர்களுக்கு ஏற்படும் பிரச்சனை ஒப்பன் ஆபீஸ் மென்பொருளில் தமிழ் எழுத்துக்கள் உடைந்தும் பிரிந்தும் தெரிவது. குறிப்பாக அச்சிடும்போது இந்த பிரச்சனை ஏற்படுகிறது.

இந்த பிரச்சனை என்னை முதலில் தாக்கிய காலங்களில் தனிக்குறியீட்டு சேவையை அளிக்கும் மென்பொருட்களோடு ஓபன் ஆபீஸ் சரியாக தொடர்புற்று இயங்கவில்லையோ என்ற சந்தேகத்தில் நிறைய குடைந்தேன். பயன் எதுவும் இல்லை.

பிறகுதான் எழுத்துருக்களை மாற்றும்போது உடைவுறுவதும் வெவ்வேறு அளவுகளில் மாறுவதை அவதானித்தேன். இவ்வாறகா மாற்றி மாற்றி பார்த்தபோதே தற்செயலாக கண்டுபிடித்தேன், சூரியன் டொட் கொம் எழுத்துருவில் அழகாகவும் நேர்த்தியாகவும் தமிழ் தெரிகிறது.

இன்றுவரைக்கும் இதற்கான காரணம் என்ன என்று எனக்கு சரியாக தெரியவில்லை. தெரிந்தவர்கள் இங்கே எனக்கு சொல்லித்தாருங்கள்.

மொத்தத்தில் ஓபன் ஆபீஸ் பயன்படுத்துபவர்கள் எழுத்துருக்கள் தெரிவதில் பிரச்சனை ஏற்பட்டால் சூரியன் டொட் கொம் எழுத்துருவை பரிந்துரைக்கிறேன்.

குறிப்பு - இந்த எழுத்துரு இன்னமும் திறந்த மூலம் இல்லை. ஆனால் இதனை திறந்த மூலமாக்கும் அனுமதியை இவ்வெழுத்துருவின் உரிமையாளர் உ. ஜெயதீபன் அவர்களிடம் பெற்றுக்கொண்டிருக்கிறேன். க்னூ பொதுமக்கள் உரிமத்தை சரியான முறையில் இவ்வெழுத்துருவுக்கு வழங்கும் முறைவழிகள் எனக்கு தெரியாதிருக்கிறது. ஆலோசனை வழங்கவும்.

jEdit தந்த தொல்லை.

2006-08-27T21:03:00.000+05:30

விக்கிபீடியா கட்டுரைகளை இலகுவாக தொகுப்பதற்கு ஏதாவது நல்ல மென்பொருள் கிடைக்குமா என்று தேடிக்கொண்டிருந்தபோது அகப்பட்டதுதான் jEdit.

வழமைபோல இந்த மென்பொருளை நிறுவிக்கொள்ள டெபியன் பொதி ஒன்றினை தேடிப்பெற்றேன். (மூலத்திலிருந்து இருமவாக்கம் (compile) செய்துகொண்டிருப்பதற்கு சோம்பலில் டெபியன் பொதியின் தயவை நாடினேன்)

மேற்கண்ட பொதியினை நிறுவிக்கொண்டிருக்கும்போது, dpkg வழுச்செய்தியை தந்தது. பொதியை நிறுவ முடியாதாம்.

பிரச்சனை இப்படித்தான் ஆரம்பமாகியது.

வழமையாக இப்படி ஏதாவது பொதி நிறுவிக்கொள்ளும்போது வழுவுற்றால் இலகுவாக synaptic சென்று உடைந்த பொதியாகவிருக்கும் அதனை அகற்றிவிட்டால் போதுமானது. ஆனால் இந்தமுறை அது சரிவரவில்லை.
synaptic மறுபடி மறுபடி உடைந்த பொதி ஒன்று மீள் நிறுவலுக்காக காத்திருக்கிறது என்ற வழுச்செய்தியை தந்துகொண்டிருந்ததே அல்லாமல், அகற்றுவதற்கான வழி எதனையும் விட்டுவைக்கவில்லை. பொதியை அகற்றுவதற்கு தேவையான தகவல் பொதியில் இல்லை. அதுதான் பிரச்சனை.

jEdit பயன் படுத்தும் ஆசை விட்டுப்போய்விட்டது. ஆகக்குறைந்தது என்னுடைய apt அல்லது synaptic ஆவது ஒழுங்காய் வேலைசெய்தால் போதும் என்றாகிவிட்டது

எப்பாடுபட்டும் உடைந்துபோன jedit பொதியினை நீக்க முடியவில்லை.

இறுதி ஆயுதமாக ஒவ்வொரு கோப்பாக தேடிச்சென்று அகற்றும் நிலைக்கு போனாலும் கூட apt இனை சரிப்படுத்த முடியாதே?

synaptic பொதிகளை பட்டியலிட்டு கூட காட்டவில்லை. ஏறத்தாழ apt செத்துவிட்டது என்ற முடிவுக்கே வரவேண்டியதாகிற்று.

apt இயங்கமறுத்தால் என்னுடைய கணினிப்பயன்பாட்டின் அர்த்தமே இல்லாதுபோய்விடும். ஏற்கனவே நிறுவப்பட்டுள்ள பொதிகளை மட்டுமே பயன்படுத்தவேண்டிவரும்.

ஆசை ஆசையாய் எல்லாவகையான வசதிகளையும் ஒவ்வொன்றாய் பொருத்தி கட்டமைத்து வைத்திருக்கும் என்னுடைய dapper drake இயங்குதளத்தை மீள நிறுவ வேண்டி வந்துவிடுமோ என்கிற பயம் வேறு தொற்றிக்கொண்டது.

கடைசியாக google இன் உதவியை நாடினேன்.

பலன் கிடைத்தது.

இதே பிரச்சனை, இதே பொதியை நிறுவ முற்பட்ட ஒருவருக்கு ஏற்பட்டிருக்கிறது. அவர் தனது வலைப்பதிவில் இதற்கான தீர்வினை வெளியிட்டிருக்கிறார்.

அடிப்படை இதுதான்.

apt, பொதிகளின் நிறுவல் விபரத்தை சேமித்துவைத்திருக்கும் ஒரு கோப்பில் jEdit உடைந்துபோய்விட்டது என்ற தகவலை வைத்திருக்கிறது. இந்த தகவலையே வழுச்செய்தியாக காட்டிக்கொண்டு இயங்க மறுக்கிறது. அந்த தகவலை கைமுறையாக மாற்றிவிட்டால் வழுச்செய்தி வராதுதானே?

அந்த கோப்பு எங்கே இருக்கிறது?

இதுதான் அந்த கோப்பு

/var/lib/dpkg/status

இந்த கோப்பை உரைச்செயலி ஒன்றில் திறந்துவைத்துகொண்டு jedit என்பதை தேடினேன்.
jedit இற்கன தகவலில் status வரியில் reinstall needed என்பதாக இருந்த தகவை மாற்றி Status: install ok installed
என்று அமைத்துக்கொண்டேன்.

ஆசைக்கு ஒருமுறை sudo apt-get update இனை ஓடவிட்டுவிட்ட பின் எல்லாம் சரி.
பிரச்சனை தீர்ந்தது.

உடைந்த jEdit என் கணினியில் குற்றுயிராயும் ஆவியாயும் உலாவுவதாக தகவல்கள் உண்டு.
கணக்கெடுப்பதில்லை.

ஆக, இனி இப்போதைக்கு jEdit பயன்படுத்துவதாய் இல்லை.

வணக்கம்

2006-08-26T21:38:00.000+05:30

"ம்..." இருக்கு. அதிலேயே தொடர்ச்சியாக எழுதக்காணோம். அதற்கிடையில் இது இன்னொரு வலைப்பதிவு.

வெவ்வேறு விடயங்களுக்கென இரண்டு மூன்று வலைப்பதிவுகளை வைத்திருக்க எனக்கு அவ்வளவாய் விருப்பமில்லை. கவனச்சிதறல், ஒழுங்கீனம் ஏற்படலாம்.

இதனால்தான் தொழிநுட்பம், அரசியல், விமர்சனம் என்று எல்லாவற்றையும் "ம்..." இலேயே எழுதிவந்தேன்.

தற்போது "ம்..." பெற்றுக்கொண்டிருக்கும் தோழர்களை இப்படி ஒரு குறிப்பேட்டினை அங்கே திணிப்பதன்மூலம் தொந்தரவு செய்ய விருப்பமில்லாதிருக்கிறது.

அத்தோடு இப்படி ஒரு குறிப்பேட்டினை பேணிவரவேண்டும் என்ற எண்ணம் நீண்ட நாட்களாக மனதுள் இருந்தே வந்தது.

இதற்காகவே கணினியில் டொக்குவிக்கியினை நிறுவி பயன்படுத்த தொடங்கினேன். மாதத்துக்கு இரண்டுதரம் இயங்குதளத்தை மாற்றும் எனக்கு அது அவ்வளவாய் சரிப்பட்டுவரவில்லை.
ஆகக்குறைந்தது ஒரு தனிக்கோப்பினையாவது இவ்வாறான குறிப்புக்களுக்கு பயன்படுத்துவோம் என்ற எண்ணமும் வெற்றிபெறவில்லை.

கடைசியாக இப்படியான குறிப்பேட்டினை வலைப்பதிவாக வைத்திருந்து வாசகர் முன்னால் திறந்துவிடும்போது, ஒழுங்காகவும், தொடர்ச்சியாகவும் இவ்வாறான ஆவணப்படுத்தலை செய்ய உற்சாகம் கிடைக்கலாம் என்ற நம்பிக்கையில் இப்பதிவினை ஆரம்பிக்கிறேன்.

இப்படியான வலைப்பதிவுகள் ஆங்கிலத்தில் ஏராளமாக இருக்கின்றன. சில வேளைகளில் அவசரத்துக்கு இவ்வாறான வலைப்பதிவுகளே பெரும் உதவிகள் செய்கின்றன. இச்செல்நெறியை தமிழுக்கும் அறிமுகப்படுத்தலாம் என்ற நோக்கமும் இப்பதிவின் தொடக்கத்தில் அடக்கம்.

வின்டோஸ் போன்ற தனியுரிமை மென்பொருட்களுக்கு பெரும் பணம் செலவழித்து பெரு நிறுவனங்கள் ஆவணப்படுத்தல்களை செய்கின்றன. மிகப்பெரிய நிறுவனங்கள் தொலைபேசி வழியாகவும் மின்னஞ்சல் வழியாகவும் உதவிகள் வழங்குகின்றன.

ஆனால் க்னூ போன்ற சமுதாய மென்பொருட்களுக்கும் சமுதாய தொழிநுட்பங்களுக்கும் அச்சமுதாயமே எல்லாவற்றையும் செய்யவேண்டியிருக்கிறது.

நாம் கற்றுக்கொண்டதை, நாம் அனுபவப்பட்டதை மற்றவர்களோடு பகிர்ந்து மகிழும் பேரனுபவத்தை இந்த சமுதாய உணர்வின் மூலம் பெறலாம்.

க்னூ/லினக்ஸ் எனும் சமுதாய உற்பத்திப்பொருள் ஒன்றினை பயன்படுத்திவரும் நான் அன்றாடம் சந்திக்கும் தொழிநுட்பச்சிக்கல்களை, அவற்றை எப்படி தீர்த்துக்கொண்டேன் என்பதை, புதிதாக இது சார்ந்து என்ன அறிந்துகொண்டேன் என்பதை மற்றவரோடு பகிர்தல் என்பது கட்டற்ற மென்பொருள் உலகில் மட்டுமே காணப்படும் சுகம்.

அதனை தமிழிலும் காண ஆசைப்படுகிறேன்.

இப்படியான சிறுசிறு பயன்பாட்டு குறிப்புக்களை பகிர்தல் மூலம் ஆவணப்படுத்திக்கொண்டால், இக்குறிப்பு தேவைப்படும் இன்னொருவர் தனது தேடலை முதலில் இருந்து தொடங்காமல், இந்த ஆவணங்கள் வழியாக இலகுவாகப்பெற்று, அறிவினை மேலும் விருத்தி செய்வதற்கான அடிப்படையையும் அவகாசத்தையும் பெற்றுக்கொள்வார்.

இந்த பகிர்தல் தமிழ் தளயறு மென்பொருள் பயன்பாட்டாளர்களிடையேயான ஊடாட்டத்தையும் நட்புறவினையும் வளர்க்கும்.

இந்த வலைப்பதிவில், நான் எனது கட்டற்ற மென்பொருள் பயன்பாட்டு அனுபவங்களை, அன்றாடம் சந்திக்கும் சிறு சிறு சவால்களை, அதனை எப்படி தீர்த்துக்கொண்டேன் என்பதை, கட்டற்ற மென்பொருட்கள் தொடர்பாக பெற்றுக்கொண்ட செய்திகளை உங்களோடு பகிர்ந்துகொள்ளப்போகிறேன்.

இவ்வாறான பகிர்தலை வளர்த்தெடுக்க னைவரையும் அழைக்கிறேன்.

அறிவு திறந்தே இருக்கட்டும்.